• Муштири топлаш — 2017
• 09 Желтоқсан, 2016

«Қайрат» Түрксиб наһийәсиниң тәркивигә кирди

Алмута шәһиридики Рысқулов проспектиниң бойиға җайлашқан «Қайрат» мәһәллиси Түрксиб наһийәсиниң тәркивигә кирди. Шу мунасивәт билән йеқинда  мәзкүр наһийә һакимийитиниң, шундақла наһийәлик Уйғур этномәдәнийәт мәркизиниң биртоп вәкиллири қайратлиқ уйғур җамаәтчилиги  билән учришиш өткүзди. Жиғинға «Қайрат» мәһәллисиниң турғуни, җәмийәтлик ишларниң активисти Халима Шаваева риясәтчилик қилип, дәсләпки сөзни Түрксиб наһийәлик йәрлик өзини өзи башқуруш комитетиниң рәиси Һосманҗан Обуловқа бәрди. — «Қайрат» — Түрксиб наһийәсигә киргән күндин башлап, турғунлардин мәһәллидә һәл қилишқа тегишлик болған мәсилиләр әтрапида көплигән хәтләр келип чүшти, —  деди у. —  Шуларниң арисидики мәктәп селиш, кочиларни ясаш охшаш әң муһим болған мәсилиләр наһийәниң кәлгүсидә қилинидиған реҗилириниң тизимидин орун алди. Аңлишимчә, бу йәрдә икки йүзгә йеқин уйғур аилиси яшайдекән. Мән силәрниң Түрксиб наһийәлик Уйғур этномәдәнийәт мәркизи билән һәмкарлиқта иш елип беришиңларни халиған болар едим. Наһийәдики мәдәний һаят вә башқиму җәмийәтлик ишлар һәққидә шу күни жиғинға иштрак қилған наһийәлик Уйғур этномәдәнийәт мәркизиниң рәиси Нурдөләт Мурадилов, наһийәлик ханим-қизлар кеңишиниң рәиси Нүрбүви Фазилова әтраплиқ сөзләп бәрди. —  Кочиларни җөндәш билән биллә уларға нам беришниму унтумисаңлар, чүнки биздә «Новая» дегән бирнәччә коча бар. Мән шуларниң биридә яшаймән, —  деди  новәттики натиқ Абдулһәй Дөләтов. — Йәнә бир ейтмасқа болмайдиған нәрсә, бизниң мәһәллигә ағриқханиму һавадәк һаҗәт. Һазир жутдашлар дохтурға көрүнүш үчүн бирнәччә чақирим йолни бесип өтүватиду. Шуниңдин кейин сөзгә чиққан җумһурийәтлик Уйғур этномәдәнийәт мәркизи йенидики Нураний анилар кеңишиниң рәиси Гүлҗаһан Муратова, жут имами Әнвәр Һосманов, «Қайрат» мәһәллисидики ханим-қизлар кеңишиниң  рәиси Асийәм Самсақова, Нураний анилар кеңишиниң рәиси Асийәм Арзиева, жигитбеши Мәрүпҗан Ахунов вә униң ярдәмчиси Һашимҗан Арзиев сөзгә чиқип, йезидики у яки бу мәсилиләр әтрапида өз пикирлири билән ортақлашти. Мәрүпҗан Ахунов саламәтлигигә бола өз вәзиписини ярдәмчисигә өткүзүш тәкливини бәрди. Өз новитидә, жут жигитбешиниң атқурған ишлириға өзлириниң иҗабий баһасини берип, униңға чапан кийгүзди. Һашимҗан Арзиевни болса, бир еғиздин жигитбеши қилип сайлиди. Бу баш қошушқа алайтән тәклип қилинған «Уйғур авази» гезитиниң баш муһәррири Ершат Әсмәтов қайрат­лиқларниң җәми­йәт­лик ишлардики паалийәтчанлиғини алаһидә тилға елип, мәзкүр йезида «Уйғур авазиниң» йүздин ошуқ оқуғучисиниң барлиғини қәйт қилди. —  Гезитни һазирчә өзимиз йәткүзүп бериватимиз. Әнди уни өйму-өй тарқитишта  жут активистлири Җаһангәр ака Илиясов билән Асийәм һәдә Самсақова ярдәм қиливатиду. Демәк, бу йәрдә почта мәсилисиму йоқ әмәс, һакимийәттикиләрниң мошуниңғиму көңүл бөлүшини халиған болар едим, —  деди у. – Мошу йәрдә, пурсәттин пайдилинип, муштириларниң көпийишигә өз үлүшини қошуватқан Гүлҗаһан Муратова, Тиләпҗан Йүсүпов билән Мәсимҗан Асимов қатарлиқ миллий мәдәнийитимиз җанкөйәрлиригә миннәтдарлиғимни изһар қилмақчимән. Келәр жили муштирилар саниниң икки йүзгә йетидиғанлиғиға ишәнчим камил. Бәхтишат СОПИЕВ.