• Йеңилиқлар
• 16 Желтоқсан, 2016

Течлиқ вә разимәнлик – Мустәқилликниң әң чоң байлиғи

Нурсултан Назарбаев Қазақстан хәлқи Ассамблеяси этномәдәнийәт бирләшмилириниң мәмликәт Мустәқиллигиниң 25 жиллиғиға беғишланған фестивалиға қатнашти.ҚХА этномәдәнийәт бирләшмилириниң «Течлиқ вә разимәнликтә өткән 25 жил» намлиқ фестивали мәмликәтниң чоң утуқлириниң бири – хәлиқләр бирлигини күйләп-мәдһийилигән ярқин вә миқияслиқ мәйрәмгә айланди. Астанадики «Сарыарқа» велотрегиниң стадиониға 10 миңдин ошуқ адәм жиғилди. Улар – мәмликәтниң барлиқ регионлиридики нурғунлиған этномәдәнийәт мәркәзлириниң вәкиллири, меценатлар, мәдәнийәт әрбаплири, атақлиқ спортчилар. Тәнтәниләргә чәтәллик меһманларму – Қазақстанни иккинчи вәтини һесаплиғанларму қошулди. Нурсултан Назарбаев фестиваль қатнашқучилириға мураҗиәт қилип, Қазақстан хәлқи Ассамблеясиниң мәмликәт тәрәққиятида вә гүллинишидә алаһидә роль ойниғанлиғини тәкитлиди. — Мошу жилларда Ассамблея һәқиқәтәнму түрлүк милләт вә динлардики хәлиқләрни бирләштүрди, һәрбир мәдәнийәт вә әнъәниләрдә моҗут яхшилиқларниң һәммисини көрсәтти. Биз бир-биримизгә йеқинлаштуқ, бирпүтүн милләт болдуқ. Течлиқ вә разимәнлик – Мустәқилликниң пүткүл 25 жилиниң асасий байлиғи, — деди Нурсултан Назарбаев. Дөләт рәһбири һазирқи дунияда мәмликәт тәрипидин этномәдәнийәт бирләшмилирини қоллап-қувәтләшниң надир әмәлиятқа айланғанлиғини атап көрсәтти. Қазақстанда бу адәттики әһвал. Униң үстигә пәқәт этномәдәнийәт бирләшмилирила қоллап-қувәтләнмәй, балилар ана тилида билим еливатқан мәктәпләрму мәбләғ билән тәминлиниватиду. Униңдин ташқири, Нурсултан Әбиш оғли Қазақстан гезит-журналлириниң 15, театрлириниң 7 тилда «сөзләватқанлиғини» әслитип өтти. — Бүгүн мән мошу фестивальда үч миллий театрға – корей, немис вә уйғур театрлириға академиялик мәртивә бериш қарари тоғрилиқ елан қилимән. Мошуниң өзи мәмликәтниң пүткүл театр сәнъитиниң тәрәққиятида йеңи басқучни ачидиғанлиғиға ишәнчим камил. Коллективларни мошу шанлиқ вақиә билән тәбрикләймән. Чоң иҗадий утуқ тиләймән, —дәп елан қилди Президент. Нурсултан Назарбаев шундақла бийилқи мәйрәмгә буниңдин 20 жилдин ошуқ илгири Қазақстан хәлқи Ассамблеясини биллә қурған сәпдашлири балилириниң қатнишиватқанлиғиға диққәт ағдурди. Президент мошуниң өзи әвлатлар варислиғиниң үлгиси екәнлигини тәкитләп, фестивальниң яш қатнашқучилирини алаһидә алқишлиди. — Силәр нәқ бизниң «Мәңгілік Ел» умуммиллий идеяси әтрапиға җипсилашқан Бирпүтүн Келәчәк Миллити. Қазақстанимизниң гүллиниши үчүн адил әмгәк қилиңлар. Вәтиниңларни сөйүңлар. Бир-бириңларни қоллап-қувәтләңлар. Җипсилиғимизни, һәрбир адәмниң бир-биригә болған ишәнчисини баһалаңлар, — дәп мураҗиәт қилди Дөләт рәһбири яш қазақстанлиқларға. Ахирида Нурсултан Назарбаев жиғилғанларни Қазақстан Мустәқиллигиниң 25 жиллиғи билән тәбриклиди. Мәмликәтни Мустәқилликниң чарәк әсирлик тәвәллуди билән тәбрикләш үчүн фестивальға һаят йоли Қазақстанда башланған атақлиқ вәтәндашларму кәлди. Швейцариядин кәлгән атақлиқ балет педагоги, атақлиқ балерина Майя Плисецкаяниң бир туққан акиси Азарий Плисецкий иккинчи вәтинигә қизғин һәм жүрәк қетидин чиққан салимини йәткүзди. — Апам мени көтирип, Ақмола вәтән хаинлири аяллири лагериниң, қисқартип ейтқанда, АЛЖИРниң босуғисини атлиғанда, мән 8 айлиқ екәнмән, — деди у. — Аман қелишқа үмүт аз еди. Бирақ бизгә яхши адәмләр – қийин вақитта қоллап-қувәтлигән қазақлар ярдәм қилди. Мошу йәрдә, мошу зиминда дәсләпки қәдәмлиримни ташлидим. Мошу йәрдә дәсләпки қетим иним Александр билән сиңлим Майяни  көрдүм. Маэстро өзиниң түрлүк мәмликәтләрдә болғанлиғини, бирақ һәрқачан Қазақстанни, у йәрдә яшаватқан адәмләрни миннәтдарлиқ билән әсләп жүридиғанлиғини тәкитлиди. Кеңәш Иттипақиниң Қәһримани, көрнәклик сәясий вә җәмийәт әрбаби, Ингушетия Җумһурийитиниң биринчи Президенти Руслан Аушев Қазақстанға вә қазақ хәлқигә миннәтдарлиқ билдүрди. — Қиммәтлик жутдашлар, — дәп мураҗиәт қилди у қазақстанлиқларға. — Мән Көкчетав вилайитидә туғулдум, у йәргә 1944-жили көплигән чеченлар вә ингушлар охшаш мениң ата-анам мәҗбурий көчирилгән еди. Мошу еғир жилларда қериндаш қазақ хәлқи бизгә ярдәм қолини сунди. Уларниң өзиму бирни иккигә улап, аранла күн көрүвататти, бирақ шундақ болсиму, бизгә ярдәм қилди. Қазақстан биз үчүн вәтәнгә айланди. Биз буни ядимизда сақлаймиз һәм мошу хатирини балилиримизға, нәврилиримизгә вә кәлгүси әвладимизға йәткүзимиз. У Қазақстанда мустәқиллик жиллирида чоң өзгиришләрниң йүз бәргәнлигигә диққәт ағдурди. Корей дөләт академиялик музыкилиқ-комедия театриниң мудири, Қазақстан Җумһурийитииниң хизмәт көрсәткән әрбаби Любовь Ни Дөләт рәһбиригә сәмимий миннәтдарлиқ билдүрди. У үч дөләт миллий театрлар – корей, немис вә уйғур театрлириниң намидин сөзгә чиқти. — Биздә течлиқ вә разимәнликтә яшап, иҗат қилиш, әнъәнилиримизни сақлап, тәрәққий әткүзүш имканийитиниң моҗут екәнлиги үчүн Сизгә, һөрмәтлик Президент, чоңқур миннәтдарлиқ билдүримиз. Биз Сизниң театрлиримизға жуқури академиялик мәртивә бериш қарариңиз үчүн наһайити миннәтдармиз. Сизниң барлиқ идеялириңизни биз өз иҗадимизда бәдиий әкис әттүрүшкә тиришимиз, — деди у Дөләт рәһбиригә мураҗиәт қилип. Фестивальниң мәдәний программисиму наһайити бай болди. Дөләт рәһбириниң сөзидин кейин тамашибинлар «Өз елім» вокал-хореографиялик композициясини тамашә қилди. Елимиз эстрадисиниң юлтузлири Нурғали Нүсипжанов, Лаки Кесоглу, Ескендир Хасанғалиев вә «МузАрт» топи иҗра қилған мошу аммибап нахша пүткүл концертқа вәтәнпәрвәрлик роһ бәхш әтти. Ейтмақчи, фестивальниң концерт программиси хәлиқләр бирлиги вә достлуғи сәяситини әкис әттүрди. Артистлар нахша вә уссул тили арқилиқ йүздин ошуқ милләт яшаватқан вә 1300дин ошуқ этномәдәнийәт мәркизи паалийәт елип бериватқан мәмликәттики течлиқ вә разимәнлик һәққидә «һекайә» қилди. Фестиваль қазақстанлиқларниң чоң иҗадий ихтидарини, уларниң хәлиқ бирлигини сақлап қелиш вә күчәйтиш интилишини йәнә бир қетим намайиш қилған «Атамекен» вокал-хореографиялик композицияси билән аяқлашти