• Ишбиләрмәнләр
• 23 Желтоқсан, 2016

Достлуқ алақилири мустәһкәмләнди

Булту Әмгәкчиқазақ наһийәсиниң Әмгәк йезисида аилидики зорлуқ-зомбилиққа учрап, камаләткә йәтмигән балилири билән баш-панасиз һәм ишсиз қалған аяллар үчүн мәхсус өй ечилди. Уни алп тиҗарәт егиси әмәс, бәлки һөкүмәтлик әмәс тәшкилатниң рәһбири ачти. 25 жилдин ошуқ вақит мошу саһада паалийәт жүргүзүватқан «Интизар» қийин вәзийәттә ярдәм бериш мәркизиниң мудири Һурқиз Илиева Япония Әлчиханисиниң «Чөпниң томури» («Корни травы») программисиниң конкурсиға қатнишип, грантқа еришти. Йолдиши Мөмүн ака билән үч айниң ичидә бу өйни бәрпа қилип, зөрүр җабдуқлар билән тәминлиди. Мәхсус өйниң қурулуши җәриянида Япония Әлчиханисиниң вәкиллири бирнәччә қетим наһийәгә келип, қурулуш ишлири билән тонушқан. Әнди йеқинда болса, Японияниң Қазақстандики Толуқ һоқуқлуқ вә Пәвқуладдә Әлчиси Итиро Кавабата, Әлчиханиниң үчинчи кативи Таканаси Сатору вә аталған программиниң уйғунлаштурғучиси Ардақ Қыдырова Әмгәкчиқазақ наһийәсигә қәдәм тәшрип қилди. Уларни Алмута вилайәтлик ички ишлар департаментиниң башлиғи Толқын Кемелова, Әмгәкчиқазақ наһийәси һакиминиң биринчи орунбасари Нуржан Қудайбергенов, Палтивай йеза округиниң һакими Бахытгүл Дүйсебекова, «Еңбекшіқазақ» гезитиниң баш муһәррири Хайролла Ахметжанов, наһийәлик прокуратуриниң прокурори Али-Болатбек Тасболатов, ички ишлар департаментиниң Аяллар вә камаләт йешиға йәтмигән балилар һоқуқлирини қоғдаш бөлүминиң башлиғи Данияр Ашымов, Әмгәк йезисиниң жигитбеши Ташполат Һүсәйинов, Ханим-қизлар кеңишиниң рәиси Замира Абдрахманова, мәхсус өй ғәмхорчилири Гүлнара Сабирова, Халидәм Розиева вә башқилар қарши алди. Өйни түгәл арилитип, униң турғунлири билән тонуштурған Һурқиз Злавдун қизи меһманларни «дүгләк үстәл» әтрапиға тәклип қилип, «Интизар» қийин вәзийәттә ярдәм бериш мәркизиниң тарихи вә паалийити һәққидә ейтип бәрди. 2009-жили аилидики зорлуқ-зомбилиққа дучар болған аяллар, уларниң камаләткә йәтмигән балилири вә қериларниң һоқуқлирини һимайә қилиш мәхситидә қурулған мәркәздә ярдәмгә муһтаҗ адәмләргә психологиялик вә юридик ярдәм көрситилиду. Ахирқи икки жилниң ичидә мәркәзгә 80 адәм мураҗиәт қилған. Төрт адәмниң әризиси бойичә мәркәз юристлири сот ишлириға қатнишип, зәрдап чәккән адәмниң пайдисиға ишини һәл қилған. Мәркәзгә баш-панасиз адәмләрниң мураҗиәт қилиши – япон конкурсиға қатнишишқа сәвәп болди. Бу өйдә жилиға 20 ана вә 40 балиниң 3 айдин 6 айғичә турушиға имканийәтләр яритилған. Компьютер синипи, тикинчиләр бөлмиси вә китапхана бар. Һазир бу йәрдә икки аял яшаватиду. Уларниң бири – қазақстанлиқ жигиткә турмушқа чиққан Өзбәкстан пухраси. Бирақ, чәтәллик келин қейинаниниң көңлидин чиқмиғанлиқтин, икки балисини әгәштүрүп, мошу йәргә кәпту. Иккинчиси – мәлум сәвәпләр билән өй вә мүлкидин айрилған бечарә инсан. «Дүгләк үстәл» җәриянида Итиро Кавабата Һурқиз Илиева охшаш паалийәтчан аял билән тонушқанлиғидин хурсән екәнлигини йәткүзүп, униң әһмийәтлик лайиһини муваппәқийәтлик аяқлаштурғини үчүн миннәтдарлиғини изһар қилди. Япония Әлчисиниң ейтишичә, «Чөпниң томури» – Японияниң   җәмийәтлик тәшкилатларға маддий ярдәм көрситиш арқилиқ қазақстанлиқларниң һаятини яхшилаш мәхситидә әмәлгә ашурулуватқан программа. Японияниң Қазақстанни таллавалғанлиғи тәсадипи әмәс. Чүнки Қазақстан ядролуқ қуралсизлиниш вә ядро қуралини тарқатмаслиқ һәрикитигә чоң һәссә қошуп келиватиду. Ядро партлашлиридин зәрдап чәккән Япония Қазақстанниң бу һәрикитини жуқури баһалайду. Мәзкүр программа бойичә 1979-жилдин буян умумий баһаси 5 миллион 800 миң Америка доллар болған 79 лайиһә әмәлгә ашурулди. Уларниң төрти мошу Алмута вилайитидә орунланди. Япония Әлчисиниң Әмгәкчиқазақ наһийәсигә болған сәпири Ишиктә шәһиридә наһийә һакими аппаратида «Интизар» мәркизи, наһийәлик прокуратура вә ички ишлар департаменти уюштурған «Қазақстан аилидики зорлуқ-зомбилиқсиз һаят үчүн» акциясигә улашти. Яшлар намидин Эльвира Семенбақиева, һөкүмәтлик әмәс тәшкилатлардин «Қамқор» җәмийәтлик фондиниң рәиси Шолпан Бөкеева сөзгә чиқип, ядросиз һаят үчүн, аилидики зорлуқ-зомбилиққа қарши үн қошидиғанлиғини билдүрди. Нуржан Қудайбергенов наһийә һакими Бинәли Ысқақниң намидин  япон хәлқигә ялқунлуқ салимини йоллап, сәмимий миннәтдарлиғини йәткүзди, Қазақстан тарихидин дерәк беридиған соғиларни тәғдим қилди. Шундақ қилип, «Интизар» мәркизи билән «Чөпниң томури» программисиниң оттурисидики паалийәт Әмгәкчиқазақ наһийәси билән Японияниң Қазақстандики Әлчиханиси арисидики достлуқ алақилар билән мустәһкәмләнди. Рашидәм РӘҺМАНОВА, Әмгәкчиқазақ наһийәси. СҮРӘТТӘ: акция иштракчилири.