• Йеңилиқлар
• 23 Желтоқсан, 2016

Тәйярлиқ толуқ кетип бариду

Нурсултан Назарбаев «Астана ЭКСПО-2017» объектлирини зиярәт қилип, хәлиқара көргәзмигә тәйярлиқ көрүш мәсилилири бойичә кеңәшмә өткүзди.Дөләт рәһбири 1 300 пәтирлик ЭКСПО шәһәрчисини, MEGA Silk Way сода-оюн тамашә мәркизиниң бенасини, ЭКСПО идарисини, Энергияни тәтқиқ қилиш мәркизини вә Алжир, Катар, Хитай, Малайзия, Һиндстан үчүн бөлүнгән хәлиқара павильонларни зиярәт қилди. Нурсултан Назарбаев шундақла кеңәшмә өткүзүп, «Астана ЭКСПО-2017 Миллий компанияси» акционерлиқ җәмийити башқармисиниң рәиси Ахметжан Есимовниң хәлиқара көргәзмигә тәйярлиқниң кетип бериши  тоғрилиқ докладини тиңшиди. — 112 мәмликәт қатнишидиғанлиғини тәстиқлиди. Уларниң 104и өз комиссарлирини тайинлиди. 94 шәртнамә имзаланди, 75 мәмликәт миллий күнләрни өткүзүш күнлирини бәлгүлиди, — дәп хәвәр қилди Ахметжан Есимов. Кеңәшмә давамида Дөләт рәһбиригә мәхсус хәлиқара комиссия тәрипидин таллавелинған һазир ишләватқан әң яхши 24 лайиһидин энергетика саһасидики кәшпиятлар тонуштурулди. Тәкитләнгинидәк, бу лайиһиләр көргәзминиң мәхсус павильониға қойилиду. — Икки жилда наһайити чоң иш жүргүзүлди. Әнди мошу объектларни җабдуш, тегишлик кадрларни тәйярлаш керәк. Бу муһим вәзипә, биз уни назарәттә тутимиз, — дәп тәкитлиди Президент. Кеңәшмә йәкүни бойичә Нурсултан Назарбаев Премьер-Министр Бақытжан Сағынтаевқа «Астана ЭКСПО-2017 Миллий компанияси» акционерлиқ җәмийити билән бирликтә хәлиқара ихтисаслаштурулған көргәзмә аяқлашқандин кейин, униң объектлирини пайдилиниш мәсилисини қарап чиқишни тапшурди.