• Йеңилиқлар
• 16 Ақпан, 2017

Дөләт рәһбири зиялилар билән учрашти

Президент Нурсултан Назарбаев зиялилар, җамаәтчилик вәкиллири вә сәясий әрбаплар билән учрашти, дәп хәвәрлиди Президентниң Мәтбуат хизмити.Учришишқа М.Жолдасбеков, К.Сағадиев, Р.Шырдабаев, О.Әдбикаримов, Б.Измухамбетов, М.Қасымбеков қатнашти. Учришиш давамида Конституциялик ислаһатлар, йеза егилиги, чарвичилиқ, саламәтликни сақлаш, илим вә пән, кичик вә оттура тиҗарәт саһалирини йеңилаш, әмәлгә ашурулуватқан хусусийлаштурушқа мунасивәтлик хәлиқ үчүн муһим ихтисадий, иҗтимаий мәсилиләр муһакимә қилинди. Дөләт рәһбири Мустәқилликниң 25-жилида Қазақстан қийин йолни бесип өткәнлигини тәкитләп, җумһурийитимизниң келәчәктики тәрәққиятиниң асасий йөнилишлиригә мунасивәтлик өз пикрини оттуриға салди. — Қазақстан дунияға тонулди, ихтисадимиз сүръәтлик тәрәққий етиватиду. Әнди «Қазақстанниң Үчинчи йеңилиниши: дуниявий риқабәткә қабиллиғи» намлиқ Мәктүптә бәлгүләнгән мәхсәт вә вәзипиләрни әмәлгә ашуруш үчүн қол йәткүзгән утуқлиримиздин пайдилинишни билишимиз керәк, — деди Қазақстан Президенти. Нурсултан Назарбаев қазақстанлиқларниң алдида турған йеңи заманниң ховуп-хәтәрлиригә диққәт бөлди. — Базар ихтисади мунасивәтлирини таллиған җәмийитимизниң алдида тәрәққиятимизға тәсир қилидиған түп-асаслиқ йеңи вәзипиләр туриду. Дуниявий ихтисатта инновация күн тәртивидики асасий мәсилигә айланди. Индустриялик инқилап бизни айлинип өтмәслиги лазим. Биз ихтисадимизға инновациялик технологияләрни киргүзүшни билишимиз керәк, — деди Дөләт рәһбири. Шундақла Қазақстан Президенти бу мәхсәтләрни  әмәлгә ашуруш үчүн һаҗәт мәбләғ тәләп қилинидиғанлиғини тәкитлди. — Әгәр инновациялик технологияләр тәйярлашқа мәбләғ бөлмисәк, у вақитта бизгә дуниявий йеңи ихтисадий қурулушниң даирисидин сирт қелиш ховупи бар. Умумән, санаәтни тәрәққий әткүзүш үчүн йеңилиқларни киргүзүш арқилиқ әмгәк үнүмдарлиғини ашурған тоғра. Буниң үчүн карханиларниң, шундақла дөлитимиздики йетәкчи алий оқуш орунлириниң йенида илмий-тәтқиқат институтлири қурулуп, уларға һаҗәт қоллап-қувәтләш болғандила қол йәткүзүш мүмкин. Мәсилән, мошундақ илмий-тәтқиқат институтларни «Алатау» инновациялик технологияләр паркиниң, Назарбаев Университетиниң йенида ечишқа шараит бар, — деди Президент. Учришишқа қатнашқучилар Дөләт рәһбири тәшәббускар болған дөләтниң һакимийәт тармақлири арисидики вакаләтликләрни қайта бөлүшкә беғишланған ислаһатларни толуқ қоллап-қувәтләйдиғанлиғини билдүрди. Бу җәһәттин, биринчи новәттә, Парламентниң вакалитини кәңәйтишкә, униң мустәқиллиги вә җавапкәрлигини күчәйтишкә беғишланған қәдәмләрниң өз вақтида ташланғанлиғини тәкитлиди. Шундақла учришишқа қатнашқучилар җумһурийәтлик вә йәрлик бюджет мәблиғиниң хәшлинишини җәмийәтлик назарәт қилишқа, саһалиқ программиларниң орунлинишиға, йәр ислаһитигә, коррупциягә қарши күрәш аң-сәвийәсини қелиплаштурушқа, Бәш институционал ислаһатни әмәлгә ашуруш бойичә Милләт планида бәлгүләнгән вәзипиләрни пәйдин-пәй әмәлгә ашурушқа мунасивәтлик муһим мәсилиләргә тохталди.