• Йеңилиқлар
• 20 Сәуір, 2017

«Өчмәс йилтиз» әвлади яки Өзгиниму өз қилишни билидиған ана һәққидә

Рашидәм РӘҺМАНОВА, «Уйғур авази»/ Мунарәм Гайитова – Достлуқ йезисидики нураний анилиримизниң бири. Йәттә пәрзәнт қучқан у 1942-жили Лавар йезисида Турғанҗан ата билән Баһархан аниниң аилисидә дунияға кәлгән.Мунарәм үч яшқа кәл­гәндә, атиси шиддәтлик җәңләрниң биридә қаза болди. Аниси Баһархан егиликниң барлиқ еғир-йеник ишлириға арилишип, пәрзәнтлирини «қа­нат­лиққа қақтурмай, тумшуқлуққа чоқтурмай» чоң қилди. Аниларниң һәр күнки тиләклири иҗазәт болуп, урушму тамамланди. Арида бир-икки жил өтүп, җәң мәйданиға кәткән қериндашлири Музәппәр билән Мәмәҗан биридин кейин бири жутиға аман-есән қайтип кәлди. Йолдишидин айрилсиму, пәр­зәнтлириниң барлиғини қучиғиға қайта алған аниниң хошаллиғида чәк болмиди. Йеңи күч, йеңи ғәйрәт билән ишлиди. Мәлумки, уруштин кейинки жиллири Қазақстанға түрк, курд вә башқиму милләтләрниң вәкиллири көчирилди. Көпни көргән, көңли кәң Баһархан ана тәқипкә учриған аилиниң бирини өйигә киргүзүп, уларниму өз қанитиниң астиға алди. – Анам Баһархан 90 яшқа келип дуниядин өтти, — дәп сөзини давам қилди Мунарәм ана. — Биз, пәрзәнтлири, униң «жириғини йеқинлитип, еғирини йениклитишкә» тириштуқ. Қийин жиллардики еқидисини ақлап, анимиз халиғинидәк, бир-биримизни һөрмәтләп, из­зәт­ләп өттуқ. Әпсус, һазир төрт қериндишимниң һәм­мисила бақилиқ болуп кәтти. Бүгүн дадам Тур­ғанҗан билән апам Баһархандин туғулған бә­шимиздин 34 нәврә, 100 чәврә вә 118 әврә тарапту. Қериндашлиримдин қалған балилар мениң үчүн  алтундинму, һәттаки яқут билән марҗандинму қиммәт. Улар кимниң әвлади екәнлигини әстин чиқармисун, қерин­дашниң балилири ят болуп кәтмисун, бир-бирини тонуп-билсун, дегән нийәттә өзимизни «Өчмәс йилтиз» әвлади дәп атидим. Арилап-арилап уларниң бешини қошуп қойимән. Һә, һаяти көпкә үлгә болған Турғанҗан вә Ба­һархан Гайитовларниң әв­лади байлиқни пул билән әмәс, бәлки өмүргә кәлгән балилири билән баһалайду. Шуңлашқиму, уларниң аи­лилиридә кам дегәндә бәш, көп дегәндә он бир бала туғулуп, тәрбийиләнди. Өй­ниң кәнҗиси Мунарәмни Баһархан ана 18 йешида Меһирдин исимлиқ шофер жигиткә четип қойиду. 30 жил иҗил-инақ яшиған әр-аял бәш қиз вә икки оғул тепип, тәрбийилиди. Меһирдин ата 1992-жили дуниядин өтти. Бу вақитта балиларниң кәнҗиси Дилмурат йеңила 10 яшқа кәлгән еди. Мунарәм ана белини мәккәм бағлап, икки адәмниң жүкини ялғуз көтәрди. Пәрзәнтлириниң барлиғини оқутти. Заһидәм, Пәридәм, Гүлнарә – медицина хадимлири, Гүлзарә – муәллим, Һаҗимурат – тиҗарәтчи, Динарә – дизайнер, Дилмурат – әдлийә хадими болуп йетилди. Уларға қошумчә, Мунарәм ана 20 йешида ата-анисидин айрилип, тәнһа ялғуз қалған чавшән қизи Тамарани бағриға басти. Уни Ишиктә педагогика училищесида, андин Алмутидики Қизлар педагогика институтида оқутти. Ахирида уни өзиниң җийәнигә қошуп қойди. Мунарәм һәдә Тамара билән йезидики балилар бағчисида биллә ишлиди. Һазир һәр иккилиси һөрмәтлик дәм елишта. Мунарәм ана җәми­йәтлик ишларғиму йеңидин арилашти. Жутдаш достлири Ибадәт Ғанибаева, Рабийәм Абдрахманова, Майминәм Палтиева, Хатәм Иманбақиева, Хасийәт Ға­ниева вә башқилар билән «Җанан» бирләшмисини қуруп, жутиниң «отидин кирип, сүйидин чиқиватиду». Йезидики бирму иш уларниң қатнишишисиз өтмәйду. Җәмийәтлик ишларға у өзиниң җийәни, чоң һәдиси Анаргүлниң оғли, ички ишлар органлириниң ветерани Алимҗан Илиевниму елип кәлди. У бирнәччә жил Достлуқ йезисиниң жигитбеши хизмитини атқурди. Һазир униң ишини Һашимҗан Садиров давамлаштуруватиду. Йеқинда Мунарәм ана билән униң җийәни Алимҗан ака уюштурған қериндашлар чейиға бизму қатнаштуқ. Жирақ-йеқиндин бу учришишқа әвлатниң 125 әзаси кәпту. Улар бовиси билән момисидин қалған ялғуз ялдама – Мунарәм аниниң қучиғини гүлләргә орап, изгү-тиләклирини изһар қилишти. «Әң муһими – балиларға Алла инсап бәрсун. Мениң ата-анамдәк адәмләр һәр әвлатниң тарихида бар. Уларниң исмини яд етип, роһини хуш қилиш пәқәт инсаплиқ балиларниң қолидин келиду», — деди Мунарәм ана биз билән хошлишип. Әмгәкчиқазақ наһийәси.