• Йеңилиқлар
• 12 Мамыр, 2017

Қазақстан армиясиниң пәхри вә шан-шөһрити

Астанада Қазақстан Қураллиқ күчлириниң қурулғиниға 25 жил толушиға вә Улуқ Вәтән урушидики Ғалибийәтниң 72 жиллиғиға беғишланған һәрбий парад болуп өтти. Парадни Қазақстан Җумһурийи­тиниң Президенти – Алий Баш қомандан Нурсултан Назарбаев ачти. Мәйданға Қазақстан Җумһу­рийитиниң Дөләт байриғини Қазақстан Җумһурийити Дөләт күзити хизмитиниң байрақдарлар топи – чоң лейтенантлар Азамат Султанғазиев, Мерхан Қахарманов вә Қайрат Молдабаев елип кирди. Байрақдарлар топиниң бешида майор Улан Нурланов маңди. Мудапиә министри Сәкен Жа­сузақов парад сепини айлинип өтүп, қатнашқучиларни Вәтән һимайичиси күни билән тәбриклигәндин кейин мәмликәт Президенти – Алий Баш қомандан Нурсултан Назарбаевқа әскәрләрниң тәнтәнилик маршқа тәйяр екәнлиги тоғрилиқ доклад қилди. Дөләт рәһбири барлиқ қазақстанлиқларни вә Қазақстан Җумһурийити Қураллиқ күчлириниң 25 жиллиғиға беғишланған парад қатнашқучилирини тәбриклиди. Нурсултан Назарбаев бийил мәмликәт мустәқиллигиниң тарихида әң миқияслиқ парадниң өткүзүлүватқанлиғини, шундақла Қазақстан армиясиниң шәкиллинишниң мунасип йолини бесип өтүп, жуқури абройға еришкәнлигини тәкитлиди. – Парадқа бәш миңдин ошуқ адәм вә 400 һәрбий техника бирлиги қатнишиватиду. Бу бизниң шанлиқ армиямизниң пәхри вә шан-шөһрити. Мошу барлиқ жилларда дөләт һәрбийләрни һәртәрәплимә қоллап-қувәтләватиду. Дәсләпки әскирий қурулумлардин нәтиҗидарлиқ бехәтәрлик системисини вуҗутқа кәлтүргүчә чоң йол бесип өтүлди. Қазақстан армияси дөләтниң шәкиллинишиниң тәғдиранә пәйтидә өз алдиға қоюлған вәзипиләрни шәрәп билән орунлиди. Бизниң Қураллиқ күчлиримиз мәмликәттә вә чәт әлдә жуқури абройға еришти, – деди Қазақстан Президенти. Униңдин ташқири Дөләт рәһбири армияни йеңилашниң муһим йөнилишлиригә тохтилип, уни техиму тәрәққий әткүзүш үчүн бирқатар вәзипиләрни бәлгүлиди. – Һазир Қураллиқ күчләр мәмликәт билән биллә йеңилашниң тарихий басқучини баштин кәчүрүватиду. Терроризмға қарши күришиш пүткүл һәрбий блок паалийитиниң принцип җәһәттин йеңи йөнилиши болиду. Қазақстан армияси дәвиргә мунасип болуп, һәрқандақ ховупқа зәрбә беришкә тәйяр туруши керәк. Йәнә бир муһим вәзипә – шәхсий тәркипни күчәйтиш. Биз һәрбий хизмәтчиләрниң йеңи генерациясини тәрбийиләватимиз. Һәрбий кийимдики адәмләр виждан вә адиллиқ өлчими, кәлгүси әвлат үчүн үлгә-ибрәт болуши керәк. Дәсләпки қетим мәйрәмлик парадқа «Жас улан» һәрбий мәктәплири курсантлириниң қатнишиши тәсадипи әмәс, улар Қураллиқ Күчләрниң резерви болуп һесаплиниду. Бу армия  әнъәнилири вә қәдрийәтләр варислиғиниң яхши бәлгүси, – деди Нурсултан Назарбаев. Қазақстан Президенти Улуқ Вәтән урушиниң ветеранлириға течлиқ һаят вә мустәқил һәм күчлүк дөләтни қуруш имканийитини яратқанлиғи үчүн тәшәккүр изһар қилди. Дөләт рәһбири шундақла Қазақстанда течлиқ вә турақлиқни сақлашниң муһим екәнлигини тәкитләп, пәқәт армияниңла әмәс, бәлки мәмликәтниң барлиқ гражданлириниң Вәтән бехәтәрлиги тоғрилиқ ойлиниши шәрт екәнлигини атап көрсәтти. Ахирида Қазақстан Президенти һәрбий хизмәтчиләргә уларниң муқәддәс борчи тоғрилиқ әслитип өтти вә кәспий маһаритини ашурушқа, әскирий қериндашлиқ билән бирликни күчәйтишкә чақирди. Андин кейин мәйданда пиядә парад расчетлири тәнтәнилик марш билән сәп түзәп өтти вә қурал-ярақниң һәм һәрбий техникиниң механикилаштурулған колоннилири маңди.