• Әдәбият гүлзари
• 01 Маусым, 2017

«Мән һаятқа ашиқмән»

Йеқинда Әмгәкчиқазақ наһийәси Ават йезисиниң Мәдәнийәт өйидә Ө.Муһәммәдий намидики оттура мәктәпниң уйғур тили вә әдәбияти пәнлириниң муәллимлири вә уйғур синиплири йетәкчилириниң уюштуруши билән филология пәнлириниң намзити, язғучи вә педагог Гүлбәһрәм Хошаеваниң 60 яшлиқ тәвәллудиға беғишланған әдәбий кәч болуп өтти. «Мән һаятқа ашиқмән!» мавзуси астида уюштурулған мәзкүр кәч җәриянида оқуғучилар язғучиға беғишлиған шеирлирини  ядқа оқуса, мәктәпниң сәнъәт һәвәскарлири йеқимлиқ нахша-саз вә уссуллардин чачқилар чачти. Башланғуч синип оқуғучилири язғучиниң бирнәччә һекайисини ипадилик оқуп, көпчиликни һаяҗанға бөлиди. Кәч ахирида сөзгә чиққан Ават йезилиқ ханим-қизлар кеңишиниң рәиси Нурбүви Һәвәйдуллаева, «Бейбітшілік әлемі» хәлиқара қазақ иҗадий бирләшмисиниң вице-президенти Турсун Розиев, һәвәскар шаир Абдулһәй Дөләтов, филология пәнлириниң намзити Һәдийәм Әхмәтова вә башқилар язғучиниң иҗадийәттики алаһидиликлирини тилға елип, изгү-тиләклирини изһар қилди. Мая ЗӘЙНАВДИНОВА, Ө.Муһәммәдий намидики Ават оттура мәктивиниң муәллими. Әмгәкчиқазақ наһийәси.