• Яшлар вә вақит
• 03 Тамыз, 2017

Балилар көңүллүк дәм еливатиду

Язлиқ тәтил/ Гөһәрбүви ИСМАЙИЛҖАНОВА, «Уйғур авази»/ Мана һәш-пәш дегичә язниң иккинчи ейиму түгиди. Яркәнтлик оқуғучилар язлиқ тәтилни көңүллүк өткүзүватиду, дейишимизгә толуқ асас бар.  Чүнки наһийәдики 49 оттура мәктәпниң оқуғучилири мәктәпләр йенида тәшкил қилинған  сағламлаштуруш мәркәзлиридә, шундақла «Қарлығаш» спорт-сағламлаштуруш, «Көктал-Аришаң» вә ата-анисидин житим қалған һәм ғәмхорчисидин айрилған  балилар  мәктәп-интернати йенидики «Күншуақ»  лагерьлирида дәм еливатиду. Тәбиити гөзәл җайға орунлашқан  «Қарлығаш» лагерида  600дин ошуқ оқуғучи  үч мәвсүмдә дәм алди.  Тәкитләш керәкки,  биринчи мәвсүмдә – Луначарский, иккинчисидә ­– Көктал, әнди үчинчи мәвсүмдә Үчарал оттура мәктәплириниң муәллимлири тәрипидин лагерьдики һәрбир күнни көңүллүк өткүзүш үчүн барлиқ тәйярлиқлар көрүлүп, һәрхил мәдәний вә спорт мусабиқилири уюштурулди. Наһийәдики  тәминати төвән 46 аилиниң пәрзәнтлириниң вә 5  житим балиниң язлиқ дәм елишини тағ бағриға жайлашқан, һаваси таза һәм сүйи әлвәк  «Көктал-Аришаң» санаторийида  өткүзүши үчүн  наһийәлик бюджеттин 800 миң тәңгә бөлүнди. Шундақла уларни наһийәниң көрнәклик җайлирини зиярәт  қилиш үчүн сәяһәтләргиму елип  чиқиш көздә тутулған. Оқуғучилар Өсәк дәриясиниң бойидики әң мәнзирилик җайлар билән санаторийларни, «Нурлы жол» дөләт программиси бойичә селинип, пайдилинишқа берилгән йеңи заводларни, Нуркент-Алтынкөл төмүр йол станциялирини зиярәт қилди. Мәктәпләр йенидики сағлам­лаштуруш мәркәзлиригә келидиған болсақ, барлиқ мәктәпләр йенидики ихчам мәркәзләрдә дәм елишниң үч мәвсүми аяқлашти. Әнди 1-12 август арилиғидики төртинчи мәвсүмдә балилар дәм елиш билән биллә инглиз тилини үгинидиған болиду. Мошу йәрдә шәһәрдики Билал Назим, Әмгәкчи, Жамбул, Луначарский, Вәлиханов, Пәнҗимдики А.Розибақиев намидики вә Үчарал йезисидики оттура мәктәпләр йенидики ихчам мәркәзләрдики дәм елиш мәвсүмлиридә әмгәк қиливатқан тәрбийичи муәллимләр балиларниң язлиқ тәтилни көңүлдикидәк өткүзүшигә бар күч-ғәйритини сәрип қиливатқанлиғини алаһидә тәкитләшкә әрзийду. Мәлумки, язлиқ тәтил пәқәт дәм елиш әмәс, бәлки әмгәк қилип, җисманий жәһәттин чиниқиш вә тавлиниш мәзгили. Буни чоңқур һис қилған  жуқарқи синип оқуғучилири  ишләпчиқириш бригадилирида ишләп, шәхсий дехан егиликлиридә ата-анисиға қол-қанат болуватиду.   Панфилов наһийәси. Һазир һәммә мәктәпләрдә тәтил вақтида башланғуч синип оқуғучилири үчүн язлиқ лагерьлар уюштурулмақта. Әйнә шуларниң бири Уйғур наһийәси Ардолата йезисиниң мәктивидиму 1-июньдин өз ишини башлиған еди. Мәктәп мәмурийити тәрипидин униң үчүн барлиқ шараитлар яритилип, балилар  язлиқ тәтилни көңүллүк башлиди. Тәрбийичи Адаләт Худайбәрдиева, Айгүл Зайитова, Замира Мәһәмәтова вә Баһаргүл Әрсуллаеваларниң уюштуруши билән «Һәммә яхшилиқ – балиларға» намлиқ мәйрәмлик чарә-тәдбирләр, спорт мусабиқилири өтти, балиларниң қатнишиши билән қизиқ чөчәкләр сәһниләштүрүлди. Шуниң билән биллә асфальтқа сүрәт селиш конкурсиму балиларниң чоң қизиқишини һасил қилди. Шундақла яш гөдәкләргә ана жутиниң тарихини үгитиш мәхситидә тәбиәткә сәяһәтләр уюштурулди. Таза һава, гөзәл тәбиәт мәнзириси, муәллимләрниң йеза вә йеза адәмлири һәққидә ейтқан һекайилири балилар қәлбидә чоңқур һиссиятлар қалдурғини сөзсиз. Мошу йәрдә шуни қошумчә қилиш керәкки, бу күнлири йезимиздики иҗтимаий тәминати начар аилиләрдин йәттә бала Талғир наһийәсидики «Огонек» лагерида он күн һәқсиз дәм елип кәлди. Пурсәттин пайдилинип, әйнә шу балиларниң дәм елишиға мүмкинчилик яратқан барлиқ шәхсләргә тәшәккүр изһар қилмақчимиз. Патәм ТУРДИЕВА, мәктәп мудириниң тәрбийә ишлири бойичә орунбасари. Уйғур наһийәси.