• Ишбиләрмәнләр
• 26 Қазан, 2017

Гөзәллик әта қилғучи Дилфуза

Өз ишиниң маһирлири/ Һазир қәйәргила қаримаң, һәрбир кочида дегидәк гөзәллик салони бар. Һә, уларниң хизмитидин пайдиланғучилар йетәрлик. Болупму заман тәрәққиятиға бола, мода қоғлиған ханим-қизлиримиз әйнә шу салонларға пат-пат берип турушни турақлиқ әнъәнигә айландурди. Әң қизиқарлиғи, у йәрдики хизмәт түрлириниң баһаси «асман-пеләк» болсиму, өзлириниң чечидин башлап, қаш-кирпиклири билән тиймақлириға һөсүн қошушни халиғучилар сани күн санап өсмәктә. Биз бүгүн сөз қилмақчи болған Дилфуза Сейитбаева әйнә шу ханим-қизлиримизға гөзәллик әта қилғучиларниң биридур. У әсли ташкәнтлик. Өзбәкстанниң Бектемир наһийәсидики Билал Назим намидики мәктәптә билим алған. Дилфуза кичигидинла сәрәмҗан кийиниши вә өзара мунасивәттә мәдәнийәтлик болуши түпәйли тәңтушлиридин алаһидә пәриқлиниш билән биллә аялларниң упа-әңликлиригә әшна болуп өсти. Буниңдин ташқири, у сәнъәткиму зор иштияқ бағлап, Ташкәнттики уйғурларниң беши қошулған көплигән чарә-тәдбирләрдә нахша ейтип, көпчиликниң алқишиға еришти. Тохсининчи жилларда у атақлиқ нахшичи һәм бәстикар Яқуп Аблизниң рәһбәрлигидә тәшкил қилинған «Атуш» нахша-уссул ансамблиға әза болуп кирди. Бу сәнъәт өмигиниң Өзбәкстанда яшаватқан миллитимиз вәкиллириниң нахша-сазға дегән еһтияҗини қандуруп, уйғур миллий сәнъитиниң тәрәққий қилишида орни алаһидә десәк, буниңда биз сөз қиливатқан  сәккиз қирлиқ, бир сирлиқ Дилфузаниңму һәссиси барлиғи ениқ. Әнди у 2003-жили Алмута шәһиригә көчүп кәлгәндә, ханим-қизларға гөзәллик әта қилиш армини пәйдин-пәй рояпқа чиқишқа башлайду. Дилфуза шәһәрдики чоң аммибап сода мәркәзлириниң биридә сетиқчи болуш билән биллә визажист кәспи бойичә билим алиду. Андин бу кәсипкә өзиниң толиму йеқин екәнлигини чүшинип, «Svetlana stіlе» академиясидә умумий курстин өтиду. 2015-жили у Алмута шәһиридә исми дуниявий дәриҗидә тилға елинидиған визажист Самир Хазаминиң маһарәт дәрислиригә қатнишиш пурситигә егә болиду. Мана мошундақ тиришчанлиқ билән бу саһаниң ички-дуниясиға чоңқур чөккән Дилфуза 2016-жили Бейрутта (Ливан) нәқ шу Самир Хазаминиң өз қолидин сертификат елиш бәхтигә муйәссәр болиду. «Херидарлар» өз кәспиниң қир-сирини хелила өзләштүргән Дилфузаниң хизмитигә алдин-ала новәткә йезилишқа башлиди. Шу түпәйли униң хизмитидин пәқәт дост-яранлирила әмәс, бәлки кәсипдашлири билән жирақ-йеқин тонуш-билишлириму пайдилинидиған болди. Қисқиси, уларниң арисида «тәҗрибилик һәм маһир» мутәхәссис дегән намға еришти. Әлвәттә, бу өз саһасида маһирлар қатаридин көрүнгән қизни кәспийләр байқимай қоймайду. 2016-жилниң ахирилирида «World Beauty Congress» җәмийәтлик тәшкилати Дилфузани Дубай шәһиридә өтидиған макияж бойичә дуния чемпионатиға тәклип қилиду һәм уни шу байқашқа тәйярлайду. Убданла тәҗрибә топлиған қиз бу пурсәтни қолдин бәрмәй, Алмута шәһиридә паалийәт елип бериватқан макияждин дуния чемпиони Виктория Станевичтин тәлим алиду. Күндүз-түни тиришчанлиқ билән қилған әмгәк ахири өз мевисини бәрди. Дилфуза Сейитбаева Қазақстан Җумһурийитигә вакаләтән Әрәп Әмирлигидә өткән чемпионатта иккинчи орунни йеңивалди. Өз кәспиниң һәқиқий маһири аталған қизимизниң хошаллиғида чәк болсунму, у һазир шәһәрдики аброй-инавити үстүн салонларниң биридә хизмәт қиливатиду. Биз уни утуғи билән тәбриклигәч, келәчәктә техиму егиз пәллиләрдин көрүшигә тиләкдашлиқ билдүримиз. Халима БАРАТОВА, Өзбәкстан Уйғур этномәдәнийәт мәркизиниң рәиси.