• Әдәбият гүлзари
• 10 Қараша, 2017

“Өсәк вадисиниң даңлиқ ғәзәлхини”

Маливай оттура мәктивидә язғучи-шаирлар тәвәллудиға беғишланған әдәбий кәчләрни уюштуруш әнъәнигә айланған. Әйнә шундақ кәчләрниң бири «Бейбітшілік әлемі» хәлиқара Қазақ иҗадий бирләшмиси вә мәзкүр мәктәпниң уйғур тили вә әдәбияти пәнлири бирләшмисиниң уюштуруши билән атақлиқ шаир Хелил Һәмраевниң иҗадийитигә беғишланди. Кәч «Өсәк вадисиниң даңлиқ ғәзәлхини» мавзусида өтти.

Униңға «Бейбітшілік әлемі» хәлиқара Қазақ иҗадий бирләшмисиниң вице-президенти, профессор Турсун Розиев, хәлиқара Язғучилар иттипақиниң әзаси Абдулһәй Дөләтов, шаир Йүсүпҗан Җолаев, Әмгәкчиқазақ наһийәлик Уйғур этномәдәнийәт мәркизиниң Маливай йезисидики шөбисиниң рәиси Пәрһат Дөләтов, пешқәдәм устаз Иминҗан Юнусов вә башқилар қатнашти.

Дәсләп сөзгә чиққан мәзкүр билим дәргаһиниң мудири Клара Садықанова мәктәп оқуғучилири билән устазлириниң утуқлириға, өткүзүлүватқан чарә-тәдбирләргә вә уларниң бала тәрбийисидики әһмийитигә тохталди. Андин уйғур тили вә әдәбияти пәниниң муәллими Гүлзарим Шәрипова алдин-ала тәйярланған слайдлар арқилиқ қатнашқучиларни Хелил Һәмраевниң тәрҗимиһали вә иҗадийити билән тонуштурди.

Мәктәп оқуғучилири шаир иҗадийитидин шеирлар оқуп, сәһнилик көрүнүшләрни намайиш қилди. Шаирниң ана жут, вәтән, йеза һаяти, дехан әмгиги вә Өсәк дәрияси мавзусиға йезилған шеирлири кәч меһманлириниң зор алқишиға бөләнди.

Кәч давамида шаирниң әсәрлирини ипадилик оқуған оқуғучилар Пәхрий ярлиқ вә маддий соғилар билән мукапатланди. Шундақла бу кәчни уюштурушқа паал қатнашқан уйғур тили вә әдәбияти пәниниң муәллимлири Бүвинур Үсәнова, Риязәт Мәңсүрова, Гүлмира Бәхниязова, Гүлзарим Шәрипова вә мәзкүр қурларниң муәллипиниң әмгиги алаһидә тилға елинип, уларму соғисиз қалмиди. Мәктәп оқуғучилиридин тәркип тапқан «Ясмин» уссулчилар топиниң орунлишидики миллий вә заманивий уссуллири кәчни техиму җанландурди.

Сөйүмлүк шаиримиз Хелил Һәмраев – иҗадийәт беғида 40 жилдин ошуқ қәләм тәврәткән намайәндиләрниң бири. Униң исми жүригимиздә мәңгү сақлиниду.

Зулфира ҺАШИРОВА, Уйғур тили вә әдәбияти пәнлири бирләшмисиниң йетәкчиси.

Әмгәкчиқазақ наһийәси.