• Йеңилиқлар
• 17 Тамыз, 2012

Мәктәпкә тәйярлиқ

Сешәнбә күни Һөкүмәттә болуп өткән селекторлуқ кеңәшмидә Қазақстан Җумһурийитиниң билим вә пән министри Бақытжан Жумағулов әйнә шундақ һесават бәрди. Униң сөзичә, 1-сентябрь күни дөләт һесавиға селинған 61 мәктәп өз ишигини ачиду. —   1-сентябрьға қәдәр дөләт бюджети һесавиға 61 мәктәп вә 14 балилар бағчиси пайдилинишқа берилиду. Жил ахириғичә барлиғи болуп 146 мәктәп пайдилинишқа берилиду. Илгири һечқачан мундақ сүръәт болмиған еди, — деди идарә рәһбири. У шундақла министрликниң «100 мәктәп, 100 ағриқхана» программиси бойичә өз мәҗбурийәтлирини толуқ орунлиғанлиғини қошумчә қилди. —   Ильинка йезисидики 1200 орунлуқ ахирқи объектни пайдилинишқа бериш 30-августқа планланди. 1-сентябрьда мәзкүр мәктәп тәнтәнилик ечилиду, — дәп ишәндүрди министр. Шундақла униң сөзичә, һазир һал-оқити төвән аилиләрниң балилирини мәктәпкә тәйярлашқа актив ярдәм қилиниватиду. Мәсилән, 1-августта башлинип 30-сентябрьғичә давамлишидиған «Мәктәпкә йол» җумһурийәтлик акцияси даирисидә 100 миңдин ошуқ бала йәрлик бюджет һесавидин вә һамийлардин ярдәм сүпитидә бир миллиард тәңгилик ярдәм алди. Һөкүмәт мәҗлисидә моҗут проблемилар тоғрилиқму гәп болди. Әмәлиятниң көрситишичә, уларсиз мүмкин әмәс. Мәсилән, пәвқуладдә вәзийәтләр министри Владимир Божко икки проблемини оттуриға қойди. —   Биздә буниңдин 20 — 30 жил илгири селинған билим бериш объектлири наһайити нурғун. Шундақла мошу беналарниң ичигә қурулушчилар пәштин исситиш объектлирини орунлаштурған. Әнди болса, уларниң өрт бехәтәрлигини тәминләш вәзиписи туруватиду. Мән вилайәтләр һакимлиридин шундақ мәктәпләрни тәйярлашни илтимас қилған болар едим, — деди Владимир Божко. Умумән, Министрлар кабинетиниң әзалири регионларниң докладини тиңшап, йеңи оқуш жилиға тәйярлиқ көрүш толуқ дәриҗидә жүргүзүлүватиду, дегән хуласигә кәлди. Буниңда Һөкүмәт башлиғи Кәрим Мәсимов, әгәр қандақту-бир иш план бойичә жүргүзүлмисә, билим министри билән һакимларни шәхсий җавапкәрликкә тартидиғанлиғини вәдә қилди.