• Йеңилиқлар
• 24 Тамыз, 2012

Йеқимсиз хәвәрләр

Мәхсус операция әмәлгә ашурулди

Әслитип өтимизки, илгири һоқуқ қоғдаш органлири 11-июль күни Алмута вилайитиниң Таусамалы поселкисида адәмләрниң һалак болушиға елип кәлгән партлаш факти бойичә Җинаий кодексниң 24-233-маддиси асасида (терроризмға тәйярлиқ көрүш) җинаий иш қозғиған еди. Оператив-издәш чарә-тәдбирлири жүргүзүлүп, улар дачидики өйләрниң биридә яшаватқан, мошу җинайәтни әмәлгә ашурди, дегән гуман астида болған бир қатар шәхсләрни ениқлаш имканийитини бәрди. Қолға елиш вақтида улар тәслим болуштин баш тартти вә мәхсус бөлүмчә хадимлириға қаритип оқ атти. Мәхсус хизмәт бөлүмчисиниң бир җәңчиси яридар болди. 17-август күни әтигәнлиги саат 5тин 30 минут өткәндә, террорчиларни қуралсизландуруш бойичә операция елан қилинди. Операция әмәлгә ашурулидиған зонида алаһидә һоқуқ тәртиви җарий қилинип, йеқин җайлашқан өйләрниң турғунлири башқа йәргә көчирилди. Бәш җинайәтчи уҗуқтурулди, операция аяқлишип, вақиә йүз бәргән җайни тәкшүргәндә, у йәрдин йәнә төрт адәмниң җәсиди тепилди.  

Йолдики паҗиә

Қазақстан Җумһурийити Ички ишлар министрлиги мәтбуат хизмитиниң хәвәрлишичә, өткән йәкшәнбә күни саат 20дин 50 минут өткәндә Алмута — Екатеринбург автомобиль йолиниң 1 309-километрида чоң йол-транспорт һалакити йүз бәрди. Кузовиға шехил бесилған «Шанси» маркилиқ жүк тошуш машинисиниң 34 яшлиқ һайдиғучиси пайтәхткә қарап келиветип, қарши йолға чиқип кетиду. Бу йәрдә у Астана — Қарағанда рейси бойичә маңған маршрут автобусиға урулиду. Автобусниң кәйнидә келиватқан Қарағанда вилайитиниң турғуни башқурған «Ауди-100» машинисиғиму урулиду. Йеник автомобильда төрт адәм бар еди. Һалакәт йүз бәргән җайда полиция 14 адәмниң — йәттә әр кишиниң, алтә аялниң вә бәш — йәттә яш арилиғидики бир қизниң җәсидини ениқлайду. Йәнә икки адәм ағриқханида вапат болиду. Һалак болғанларниң бәшиниң йенида һөҗҗәтлири болуп, уларниң ким екәнлигини дәрһал ениқлаш мүмкин болди. Рәсмий мәлуматлар бойичә, автобуста барлиғи 26 адәм болған. Һәрхил дәриҗидә җараһәтләнгән қалған йолувчилар Астана шәһириниң вә Ақмола вилайити Аршалы йезисиниң давалаш мәһкимилиригә йәткүзүлди. Сот-медицина экспертизиси бәлгүләнди. Һазирқи вақитта зәрдап чәккәнләрниң тизими түзүлди, улар барлиқ медицина мәһкимилиридә вә ички ишлар бөлүминиң җавапкәр хадимлирида бар. Дүшәнбә күни кәчкә қәдәр һалак болған 13 адәмниң ким екәнлиги ениқланди, уларниң бири — Моңғулстан граждани.