• «Уйғур авазиниң» сәйилгаһи
• 05 Сәуір, 2018

Австралиядә уйғур тили дәрислиги йоруқ көрди

Түркияниң Стамбул шәһиридә өткүзүлгән «Уйғур мәдәнийити конгрессида» Мәғфирәт Юнус һәдиси Сәлимә Камал билән бирликтә тәйярлап, нәширдин чиқарған «Океаниядә уйғур садаси» намлиқ уйғур тили дәрислигиниң тонуштуруш мәрасими болуп өтти. Китап үч тилда — уйғур (әрәп вә латин йезиғида) инглиз вә түрк тилида йезилған. Ушбу китапниң киришмә қисмида йезилишичә, Австралиядә 150 нопуслуқ уйғур җамаити яшайдекән. Улар һәрхил саһаларда паалийәт елип бериветипту. Яшлар инглиз тилида билим еливатқанлиқтин, уларниң ана тилини, мәдәнийити билән тарихини билиш дәриҗиси барғансири суслишиватқан охшайду. Тәбиийки, бу әһвал чоңларни тәшвишкә салған. Шуңлашқа Сәлимә Камал ана тилини яш әвлатқа үгитиш йолини издәшкә киришкән. Австралиядә ана тилини үгитиш бойичә паалийәт елип бериватқан йәкшәнбилик мәктәпләрниң пәқәт оқуш материаллири үчүнла мәбләғ аҗритилип, оқутқучиға мааш төләнмәйдекән. Шундиму Сәлимә Камал 2006-жили ана тилини үгитиш бойичә йәкшәнбилик мәктивини ечишқа бәл бағлапту. Китапниң киришмә қисмида Сәлимә 2006-жилниң 4-июнь күни өтүлгән дәсләпки дәрис тоғрилиқ алаһидә һаяҗанлинип язған. Дәрисләр саат ондин он иккигичә давамлишидекән. Бийил 5 яштин 20 яшқичә болған оттуз нәпәр қиз-жигит ана тилини үгиниш истигини билдүрүпту. Сәлимә яшларға қизиқарлиқ вә чүшинишлик түрдә дәрис өтүш нийитидә қошумчә «Уйғур-инглиз тиллиридики аһаңдаш вә мәнадаш сөзләр» мавзусида тәтқиқат ишлирини елип барған. Иҗадий издинишләр өз нәтиҗисини бәргән. Маарип министрлиги ана тилини үгиниш мәктәплириниң паалийитини иҗабий баһалап, муваппәқийәт қазанған оқуғучилар билән оқутқучиларға мәхсус гуванамиләр тапшурған. Паалийәтчан оқутқучи Сәлимә Камалниң бу алийҗанап изгү ишиға утуқ тиләймиз. Гүлбәһрәм МОЛОТОВА, филология пәнлириниң намзити.