• Иҗтимаий мәсилә
• 04 Мамыр, 2018

Арқа сәп ветерани ярдәмгә муһтаҗ

Рашидәм РӘҺМАНОВА, «Уйғур авази»/ Һәр жили Ғалибийәт күни һарписида Улуқ Вәтән уруши вә арқа сәп ветеранлириға иҗтимаий ярдәм көрситилиду. Һә, униңға муһтаҗлар бу күнни «төрт көз» болуп күтиду. Хәлқимизниң бешиға еғир күн чүшкәндә җенини айимиған, бүгүнки күндә аҗизлашқан әзиз җанлар һәрқандақ һөрмәткә вә ярдәмгә лайиқ, әлвәттә. Бирақ, пәқәт мәйрәм һарписидиму? Пүтүнсүрүк һаятини җапа билән өткүзгән мөтивәрләрниңму тәл-төкүз һаят кәчүрүшни халайдиғанлиғи талашсиз. Амма 95 яшлиқ челәклик арқа сәп ветерани Гүли Тохтаева шу күнниң келәригә ишәнмәйду. «Өйгә меһман кәлди» дегәнни аңлап, ятқан орнидин турған ана тәһийигә йөлинип олтарди. Мән униң тимәнлигигә қайил болдум. Қизи Арзигүл һәдигә аниси һәққидә ейтип беришини илтимас қиливедим, у «Апам өзи сөзләп бериду» деди. Гүли ана ойлаш, әстә сақлаш қабилийитидинму айрилмапту. 1923-жили Челәктә дунияға кәлгән Гүли Тохтаева киндик қени төкүлгән жутида өсүп, билим алиду. Кичигидин сәнъәткә иштияқ бағлиған у шу чағларда Челәккә йөткәлгән Уйғур театриға кирип, уссулчи болушни арман қилған екән. Бирақ Гүлиниң бу армини әмәлгә ашмайду. Униң атиси Давут-тикинчи бәлгүлүк сәвәпләр билән рәпиқиси Саадәтни вә бәш пәрзәндини елип, Өзбәкстанға көчүп кетиду. Урушниң дәсләпки жиллири Гүлиниң акилири Маһмутҗан, Реһимҗан вә Рәхмәтҗан урушқа кетип, шиддәтлик җәңләрдә қаза болиду. Челәккә қайтип кәлгән Гүли бирдинла Уйғур театриға йолуқуп, ишқа елиниду. – Ана, театрда кимләр билән ишлидиңиз? – дәп соридим мән униңдин. – Немисини сорайсиз, қизим, уларниң һәммиси өлүп кәттиғу? Тохтаң, ядимға чүшүватиду. Ғуламхан Җәлилов, Әсқәр... униң фамилиясини унтуп қаптимән, «Народный әртис» Мәхпир Бақиев, Ризвангүл Тохтанова, товва, һә, есимға чүшти, «Заслуженный әртис» Реһангүл Мәрүпова, Кәрим Зәкировлар билән ишлидим. Уруш тамамланғандин кейин Гүли Тохтаева төмүрчи Үсүпҗан Һаҗиевқа турмушқа чиқип, бәш пәрзәнт тапиду. Аилиниң әһвали әндила яхшилинишқа башлиғанда, йолдиши қайтиш болиду. Бәш балини қатарға қошқичә Гүли ана ашпәзму болди, мулазимәтчиликму қилди, қурулуштиму ишлиди. Һазир Гүли ана кичик қизи Арзигүл билән туриду. Чоң қизи Айгүл Өзбәкстанда истиқамәт қилиду. Оғуллири аләмдин әтигән өтүпту. 13 нәврә, 18 чәврә вә 5 әврә сөйгән, талай җапа-мәшәқәтләрни көргән ана өтмүши һәққидә гәп қилғинида, пионер, комсомол вә партия қатарида өткән күнлирини әсләп, мәғрурлиниду. Бүгүнки күндә арқа сәп ветерани Гүли Тохтаева ярдәмгә муһтаҗ. Униң туруватқан 4 бөлмилик өйи конирап, өрүлүп кетидиған тәрәпкә өтүпту. Қизи Арзигүл Һаҗиеваниң көрсәткән һөҗҗәтлиригә нәзәр салсақ, униң бармиған йери, қақмиған ишиги қалмапту. Нәтиҗидә Гүли Тохтаева 651-болуп өй новитигә қоюлупту. – Маңа әнди немә керәк дәйсиз, қизим. Амма тирик җан болғандин кейин адәмниң тәл-төкүз, әл қатарида яшиғуси келиду, бирақ алған пенсиям дора-дәрмәктин ашмайватиду. Уму мәйли, мону туруватқан өйүмни көрмәмсиз. Һаятниң шунчә қийинчилиқлиридин аман қеливедим, қериғанда әски там бесивалмисекән, дәп қорқумән, – деди ана еғир “уһ” тартип. Әсли биз, уйғурлар, «житимни жиғлатмиған, қерисини қахшатмиған» милләт. Мәзкүр мақалә йоруқ көргәндин кейин Гүли аниниң һаятида көңүллүк күнләрниң йүз беришигә ишәнчимиз камил. Меһир-шәпқәтлик болайли, әзиз қериндашлар! Әмгәкчиқазақ наһийәси.