• Йеңилиқлар
• 28 Мамыр, 2018

Польша парламенти сенатиниң депутатлири билән учрашти

Йеқинда Қазақстан хәлқи Ассамблеяси Рәисиниң орунбасари – ҚХА кативатиниң рәһбири Леонид Прокопенко Польша Парламенти Сенатиниң депутатлири Вальдемар Краска вә Артур Вижоха билән учрашти.Учришишқа шундақла Польша Җумһурийитиниң Қазақстандики әлчиси Селим Хазбиевич, Польша Сенат офисиниң хадими Каролина Ожеховска, Астана шәһиридики консул Анита Сташкевич, Қазақстан Җумһурийити Парламенти Сенатиниң депутати Сергей Звольский, Акмола вилайити Заречный йеза округиниң һакими Наталья Милюк, Астана шәһири “Поляклар” җәмийәтлик тәшкилатиниң рәиси Елена Роговская, “SIMKON” җавапкәрлиги чәкләнгән ширкәтниң мудири Олег Мецик вә ҚХАниң вәкиллири қатнашти. Баш қошушта җәмийәтлик разимәнликни вә милләтләрара мунасивәтләрни уйғунлаштурушни тәминләш саһасида һәмкарлиқ вә тәҗрибә алмаштуруш мәсилилири қаралди. Леонид Прокопенко Польшидин кәлгән меһманларни конституциялик статусниң түзүлүш тарихи, ҚХАниң җәмийәтлик разимәнлик вә умуммиллий бирликни мустәһкәмләш бойичә вәзипилири һәм елип бериватқан ишлири билән тонуштурди. Натиқ өз сөзидә икки дөләт оттурисидики мунасивәтләрниң чоң ишәнчә вә очуқ характерға егә екәнлигини алаһидә тәкитлиди. “Бизниң дөләтлиримизни вә хәлиқлиримизни әнъәнивий достанә мунасивәтләр бағлаштуриду. Икки дөләт оттурисида алий дәриҗидә ишәнчә диалоги орнитилған, парламентлар, һөкүмәтләр вә тиҗарәтчиләр арисида яхши мунасивәтләр сақлинип келиватиду. Иккитәрәплимә мунасивәтләрдә мустәһкәм келишим-һоқуқ асаси яритилған. Биз Польша рәһбәрлигигә Қазақстанниң дуниявий сода тәшкилатиға киришидә, шундақла Астана ЭКСПО-2017 көргәзмисини өткүзүшкә бәргән илтимасини қоллап-қувәтләш көрсәткәнлиги үчүн сәмимий миннәтдарлиғимизни билдүримиз”, деди у. Польша Парламенти Сенатиниң депутатлири Қазақстанниң иҗабий тәҗрибисини вә Ассамблеяниң милләтләрара турақлиқни сақлаштики вә җәмийәтлик разимәнликни мустәһкәмләштики, шундақла җумһурийәттә яшаватқан барлиқ этносларниң һоқуқини тәминләш мәсилилиридики муһим ролини алаһидә тәкитлиди. Меһманлар Қазақстанниң Мәркизий Азиядики вә Евразия бошлуғидики Польшиниң асасий шериги сүпитидики алаһидә ролини атап көрсәтти. Учришиш қатнашқучилири икки дөләт оттурисидики һәмкарлиқни буниңдин кейинму кәңәйтиш вә тәрәққий әткүзүшниң зөрүрлүгигә алаһидә диққәт ағдуруш тәрәпдари екәнлигини тәкитлиди.