• «Уйғур авазиниң» сәйилгаһи
• 05 Шілде, 2018

Майсә сәйлиси вә көк чөшүриси

Майсә сәйлиси ـــ уйғурларниң әнъәнивий сәйлә-сәяһәт адитиниң бир түри болуп, у асасән қиш кетип, тәбиәт ойғинип, йәр-җаһан йешил кимхапқа пүркәнгән, дәл-дәрәқләр яширип, гүл-чечәкләр ечилишқа башлиған әтияз пәслиниң дәсләпки күнлиридә уюштурулиду.Уйғурлар майсә сәйлисини әзәлдинла баһарниң башланмиси сүпитидә қобул қилип кәлгән. Йеза турғунлири көкләм қуяшиниң иллиқ тәптидин алаһидә бәһирлинип, йеңидин көкирип, яшнашқа башлиған етиз-ериқ, бағ-варанларни арилап, баһар мәнзирисини тамашә қилип, һөзүрлиниду. Сәйлидин қайтқанлар буғдай майсилирини вә һәрхил гүлләрни дәстә-дәстә қилип, еһтирам билән ата-анилириға тәғдим қилип, уларни йеңи баһарға сақ-саламәт улашқанлиғи билән сәмимий тәбриклишиду. Қиз-жигитләрму бир-биригә көк майсә яки гүлләрни тутуш арқилиқ өзара муһәббитини изһар қилиду. Майсә сәйлисидә кишиләр сәйлә қилғач, йеңидин чиққан бедә көкини терип келип, башқа хуручларни қошуп, бедә (көк) чөшүрисини түгиду. Чөшүрә тәйяр болғанда, аилә әзалири дәстихан әтрапиға җәм болиду. Алди билән аилиниң чоңи бир тал чөшүрини елип, “бисмилла, йеңи аш, еғиз-бурнумдин таш” дәп еғизиға салиду. Шуниңдин кейин башқиларму шу сөзни тәкрарлап, көктин тәйярланған таамға еғиз тегиду. Бу күни холум-хошниларғиму һөрмәт билдүрүлүп, уларға бир қачидин чөшүрә киргүзүлиду. Кишиләрниң бир-биригә майсә, гүл вә көк чөшүрисини сунуш адити “йеңилиқ тутуш” дәпму атилиду.