• Дидар ғенимәт
  • 19 Шілде, 2018

Әллик жилдин кейин ана мәктивидә учрашти

Гөһәрбүви ИСМАЙИЛҖАНОВА, «Уйғур авази» Йеқинда Яркәнт шәһиридики Х. Һәмраев намидики уйғур оттура мәктивини буниңдин 50 жил муқәддәм тамамлиған синипдашларниң учришиши болуп өтти.Мәлумки, ушбу билим дәргаһидин миңлиған шагиртлар учум болуп, җәмийәттин мунасип орнини тапти. Улар аридин қанчилик вақит өтүшидин қәтъий нәзәр, өзлири учум болған алтун угиси билән меһриван устазлирини һечқачан ядидин чиқарған әмәс. Мәсилән, һәр жили бу йәрдә 50, 40, 30, 20, бәзидә 10 жиллиқ учришишларниң өткүзүлүши шуниң ярқин испати болса керәк. Бийилқи 50 жиллиқ учришишқа, йәни 1978-79-оқуш жили ана мәктиви билән хошлашқан 94 оқуғучидин Ташкәнт, Алмута вә униң әтрапидики наһийәләрдин болуп, 44 сабиқ синипдаш қериндашларчә дидарлашти. Синипдашлар дәсләп пешқәдәм устаз, хәлқимизниң сөйүмлүк шаири Хелил Һәмраевниң бюсти йенида униң роһиға тазим қилди. Сабиқ синипдашларни мәктәп мудири Зулфийәм Мәшүрова иллиқ қарши елип, бүгүнки мәйрими билән сәмимий тәбриклиди вә уларни оқутуш ана тилимизда жүргүзүлүватқан мәктәпниң бүгүнки һаят-нәпәси билән тонуштурди. Өз новитидә, сабиқ савақдашлардин Селимағча Мусаева, Нуранийә Насирова вә башқилар өзлиригә билим вә тәрбийә бәргән устазлириға, ана мәктивигә миннәтдарлиғини изһар қиди. Шуниңдин кейин вапат болған савақдашлириниң өйлиригә берип, роһиға дуа-тәгбир оқуди. Учришиш шу күни кәчқурунлуғи шәһәрдики «Арина» кафесида давамлашти. Әнвәрҗан Беширов риясәтчилигидә өткән кәчтә миллий нахша-сазлар вә һәзил-чақчақлар билән әллик жиллиқ сеғиниш сезимлирини изһар қилған жүрәк қетидики сөзләр ейтилди. Синипдашлар дәм ғенимәт, дидар ғенимәт дәмләргә толуп-ташқан учришишниң тохтимай давам қилишини истигән һалда, баяшәйәт расланған ақ дәстихан әтрапида пуғани қанғичә өткән-кәчкәнни әслишип, гөзәл яшлиғини ядиға алди. Учришиш қатнашқучилири мошундақ әстин чиқмас дидарлишиш дәмлириниң тәшәббускарлири болған синипдаш достлири Еләм Розиев, Реһимәм Паттарова, Розахун Исламов, Тохтағча Ғоҗашева, Меҗитхан Мәсумовқа чәксиз миннәтдарлиғи изһар қилип, бир-бирини қиймай хошлашти. Панфилов наһийәси. Сүрәттә: Х. Һәмраев намидики мәктәпни буниңдин әллик жил муқәддәм тамамлиған сабиқ савақдашлар.

43 рет

көрсетілді

0

пікір
Алдыңғы мақала Синипдашлар учришиши
Келесі мақала Студентлиқ дәвирни әскә алди

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *