- Йеңилиқлар
- 07 Қыркүйек, 2012
Уссул шәйдаси
Һәр қетим Челәк йезисида уюштурулған чарә-тәдбирләрдә, мәйрәмләрдә яш талант егиси Саидәм Фурқәтниң уссуллирини тамашә қилғанда, униң иҗрачилиқ маһаритигә қайил болимән. У маңа гоя уссул ойнаш үчүнла яралғандәк билиниду.
1998-жили Челәк йезисида аддий дехан аилисидә дунияға кәлгән Саидәм дәсләп йәттә йешида сәһнигә чиқип, җумһурийәтлик яш өсмүрләрниң «Ғунчә» фестивалиға қатнишиду вә І орунға егә болиду. 2006-жили болса, «Ғунчә» конкурсиниң Баш мукапитини йеңивалиду. Андин наһийәлик, вилайәтлик «Балбұлақ» байқишиға қатнишип, ІІІ орунға муйәссәр болиду.
— Саидәмниң уссулға болған иштияқини биринчиләрдин болуп, «Шавкәт-шоу» театриниң мудири Шавкәт Нәзәров байқиған вә өзиниң бирнәччә концертлиқ программилириға тәклип қилған, — дәйду Саидәмниң һәдиси Рошәнгүл сөһбәт ара. — Шундақла у тарихий Вәтинимиздин йәккә концертлиқ программиси билән кәлгән атақлиқ нахшичи, бәстикар Мөмүнҗан Аблекимниң, яш иҗрачилар Зулпиқар Зайитовниң, Назугум Тайированиң, Халбүви Исқақованиң концертлирида өз һүнирини намайиш қилди.
— Бу күнләрдә қизим Алмута шәһиридә ечилған «Аманнисахан» уссул клубида мәшиқлиниватиду. Клубта барлиқ шараитлар яритилған. Йетәкчиси Мәликәм Розахунова өзиниң уссул дәрислирини чоң җавапкәрлик билән өткүзүватиду, — дәйду Саидәмниң аниси Рәнагүл Василдинова һаяҗанлинип.
Һәр хил милләтниң уссуллирини иҗра қилип келиватқан Саидәмниң репертуари һазирниң өзидә хилму-хиллиққа егә. Миллий уссуллиримиздин башқа қазақ хәлқиниң «Аққу», «Гүлім», өзбәк хәлқиниң «Намангән», рус хәлқиниң «Калинка» шундақла, хорезм, әрәп, һинд уссуллири арқилиқ у өзиниң уссул ойнаш маһаритини намайиш қилип кәлмәктә.
Бир ечинарлиқ йери, Саидәм атисидин әтигән айрилип қалди. Дадиси Фурқәт Садиқов 1979 — 1980-жиллирида Авғанстан йеридә шиддәтлик җәңләргә қатнашқан бәйнәлмиләл җәңчи. Уруштики әрлиги үчүн бир нәччә медальлар билән мукапатланған. Қан мәйданида алған җараһити түпәйли 2006-жили аләмдин өтти. Аниси Рәнагүл һәдә қизиниң атисиз өсүватқанлиғини билиндүрмәй, һәр қачан униң йенида һәм ата, һәм ана орнида пәрванә болуп жүрмәктә.
Сөһбәт ара Саидәм Фурқәтниң «Мениң арминим — кәспий уссулчи болуш», дегән сөзини аңлап, хошал болдум.
Бизму өз новитидә, уссул сәнъитиниң ғунчиси болған Саидәмгә «Илаһим, арминиңиз әмәлгә ашсун», демәкчимиз.
Зоһра ИСИДУЛЛАЕВА.
Әмгәкчиқазақ наһийәси.
613 рет
көрсетілді0
пікір
