• Йеңилиқлар
• 03 Қазан, 2018

Бирлишишкә болған йол

Балқаш Қазақстан хәлқи Ассамблеясиниң “Ипәк йолидики сөһбәтләр” хәлиқара мәдәнийәтшунаслиқ лайиһисигә қатнашқучиларни қобул қилди.Мәзкүр лайиһә Сарыарқа даласиға Қазақстан, Қирғизстан, Өзбәкстан, Россия, Таҗикстан вә Хитай мәдәнийәтшунаслирини, тарихчилирини, сәясәтшунаслирини, язғучилирини топлиди. Биринчи күни қатнашқучилар ақын вә композитор Шашубай Қошқарбаевни хатириләп, униң мавзолейиға гүл қойди, андин кейин мәнзирилик Бектау-ата жилғисидики “Ұлы Дала өркениеті” этноавулини зиярәт қилди. Бу йәргә қәдәм тәшрип қилған меһманлар өзлирини худди өтмүшкә келип қалғандәк һис қилди. Уларни боғусақлар, чачқа вә қымыз билән қарши алди. Кигиз өйләр арилиғида миллий кийим кийингән ханим-қизлар қол ишлири билән бәнт болса, әрләр қазақчә күрәш вә ағамча тартиш бойичә күч синашти. Миллий нахша-уссуллар, һәрхил оюнлар, көчмәнләр турмушидин елинған көрүнүшләр мәйрәмлик көрүнүшни техиму бейитти. – Бектау-ата жилғиси вә Балқаш көли тоғрилиқ қедимий Хитай жилнамилиридиму ейтилиду, – дәп тәкитлиди Қазақстан хәлқи Ассамблеяси Рәисиниң орунбасари – Қазақстан Җумһурийити Президентиниң Мәмурийити ҚХА Кативатиниң мудири Леонид Прокопенко. – Хитай содигәрлири өз елигә мошу йәрләр тоғрилиқ мәлуматларни йәткүзәтти. Улар өз карванлири билән келәтти. Улуқ Ипәк йоли тармақлириниң бири мошу йәрдин өткән. Балқаш шәһиридә “Рухани жаңғыру” мәдәний-ақартиш мәркизи – яшлар коворкинг-мәркизи тәнтәнилик ечилди. У мошу йәрдики М.Хамзин намидики Мәдәнийәт сарийида барлиққа кәлди. Мәркәзгә пидаийлар үчүн штаб җайлаштурулуп, психолог кабинетлири ечилди. Бу йәрдә шундақла мәшиқлиниш зониси бар, латин һәрипидики қазақ тилини үгәнгүчиләр үчүн шараит яритилған. “Ипәк йолидики сөһбәтләр” лайиһисиниң биринчи күни “Балқаш күзи” намлиқ иҗаткар яшларниң фестивали билән аяқлашти. Иккинчи күни Балқашта көрнәклик җәмийәт әрбаби Мурат Әвезовниң тәшәббуси билән “Улуқ Ипәк йоли – тарих вә һазирқи заман” мавзусида хәлиқара конференция болуп өтти. М.Хамзин намидики Мәдәнийәт сарийида уюштурулған конференциягә язғучилар, мәдәнийәтшунаслар, тарихчилар, философлар, сәясәтшунаслар, шундақла ҚХА илмий-экспертлиқ кеңишиниң әзалири, этномәдәнийәт мәркәзләрниң вәкиллири вә студентлар қатнашти. Конференция давамида униңға қатнашқучилар Ипәк йолиниң умуммәдәний қәдрийәтләрни, милләтләрара вә конфессияләрара төзүмлүкни шәкилләндүрүштики ролини муһакимә қилди.