• Әнҗуман
• 22 Қараша, 2018

Улуқ симаниң тәвәллудиға беғишланди

Гөһәрбүви ИСМАЙИЛҖАНОВА, «Уйғур авази» Дуния әһлигә «Түркий тиллар дивани» намлиқ алтун қамуснамини йезип қалдуруп кәткән Махмут Қәшқәрий буниңдин 1010 жил илгири дунияға кәлгән екән. У яратқан бебаһа мирасниң қәдир-қиммитини пүткүл дуния етирап қилмақта. Панфилов наһийәсидики мәктәпләр билән колледжларда әдипниң туғулғиниң 1010 жиллиғиға беғишланған чарә-тәдбирләр давамлиқ уюштурулуватиду. Җүмлидин Яркәнт шәһиридики Билал Назим намидики уйғур оттура мәктивидә уйғур тили вә әдәбияти пәнлириниң он күнлүги Махмут Қәшқәрийниң һаятиға вә әмгәклиригә беғишланди. Униң давамида муәллимләр билән оқуғучилар әнҗуман, мушаирә вә “дүгләк үстәлләрдә” баш қошти. Онкүнлүктики әң муһим чарә-тәдбирләрниң бири – әдипниң тәвәллудиға беғишланған «Махмут Қәшқәрий – улуқ сима» мавзусидики әнҗуман болди. Мәктәп муәллимлири, китапханичилар вә ата-анилар қатнашқан әнҗуманни мәзкүр мәктәпниң уйғур тили вә әдәбияти пәнлириниң муәллими Рашидәм Улисаева ечип, риясәтчилик қилди. Махмут Қәшқәрийниң һаяти вә иҗадий паалийити һәққидә ейтип, униң бебаһа мираси «Дивану луғәтит түрк» әсәриниң әһмийитигә тохталди. Оқуғучилар Турди Самсақниң «М.Қәшқәрийниң шәнигә мухәммәслирини» ядқа ипадилик оқуди. Шундақла Маһмут Қәшқәрийниң әмгигидики қошақларни әсли нусхиси бойичә ядқа ейтиш мусабиқиси өтүп, униңға 5 – 10-синип оқуғучилири паал қатнашти. Онкүнлүк давамида Махмут Қәшқәрийниң әмгәклиригә мунасивәтлик көргәзмә, фотостендлар уюштурулди. Панфилов наһийәси.