• Висал
• 14 Қыркүйек, 2012

Ханим-қизларға беғишланған қош сәһипә

Бизниң уйғур қизлири

Һәртәрәплимә мәлуматлиқ мутәхәссис-кадрлар милләтниң әқлий ихтидарини бәлгүләйдиған муһим амилларниң бири. Әйнә шу нуқтәий нәзәрдин қариғанда, қайсила саһада болмисун, оқуп, йетилип чиққан яшлиримизни һәр қанчә алқишлисақ, шунчә әрзийду. Худаға шүкри, йетәрлик дәриҗидә болмисиму, һәр һалда кадрлиримиз сепиниң жилдин-жилға толуқтурулуп келиватқанлиғи хошал боларлиқ әһвал. Буни биз Яркәнт тәвәси мисалидинму көрүшимизгә болиду. Гезитимизниң ханим-қизларға беғишланған «Висал» сәһиписи арқилиқ әйнә шундақ яш, келәчигидин үмүтләндүридиған мутәхәссис қизлиримизни тонуштуруп өтүшни мувапиқ көрдуқ.

Һеч қачан һармаң, Дилназ! 

Дилназ Һезимова Яркәнт шәһиридә туғулуп, мошу йәрдә оттура мәктәпни тамамлиди. Камаләтлик шаһадәтнамә алғандин кейин, уйғур қизлири анчә бир қизиқип кәтмәйдиған һоқуқ-тәртип қоғдаш саһасини таллавалди. Мәктәпни әла баһалар билән түгәткәчкә, Чимкәнт шәһиридики Б.Момышулы намидики милиция мәктивигә оқушқа чүшти. Җумһурийәттики инавәтлик билим дәргаһлиридин болуп һесаплинидиған мәзкүр мәктәптә икки жил тәһсил көрүп, 2011-жили полиция лейтенанти унвани билән қолиға диплом алди. Әйнә шуниңдин бери Панфилов наһийәлик ички ишлар бөлүмидә аялларни зорлуқ-зомбилиқтин һимайә қилиш бойичә инспектор болуп паалийәт елип бериватиду. Дилназ Полат қизи бир жилға йетәр-йәтмәс вақит ичидә өзини әтраплиқ билимлик, һәр қачан издиниш билән хизмәт қилидиған хадим сүпитидә тонутушни билди. Дөләт тили билән рус тилини өз ана тилидәк өзләштүргәнликтин, аһали арисида аяллар һоқуқини һимайә қилиш мәсилилиригә аит кәң даирилик чүшәндүрүш-тәшвиқат ишлирини елип бериватиду. Оқуш орунлири билән мәһкимә-тәшкилатларда мәзмунлуқ лекцияләрни оқуп, өз саһаси бойичә һоқуқ бузушниң һәр қандақ көрүнүшлиригә қарши изчил һәм қәтъий күрәш жүргүзүватиду. Шуниң үчүнму Дилназ мошу аз вақит ичидә наһийәлик ички ишлар бөлүми вә Алмута вилайәтлик ички ишлар департаменти тәрипидин бир нәччә қетим тәшәккүрнамә вә Пәхрий ярлиқлар билән тәғдирләнди. — Мән бу саһани таллавалғинимға һеч қачан пушайман қилмаймән. Раст, бу ишниң җавапкәрлиги жуқури, қийинчилиғи йетәрлик. Шундақ болсиму, ички ишлар органлирида хизмәт қилишни һаятимниң мәзмуни дәп чүшинимән. Пурсәттин пайдилинип, дипломлуқ полиция хадими болуп чиқишимға қол учини сунған әр-аял меценатлар Сүрийәм һәдә Һезимова билән Дилшат ака Насировқа чәксиз миннәтдарлиғимни изһар қилмақчимән, — дәйду Дилназ Полат қизи соалимизға җававән. Өз алдиға ениқ мәхсәтләрни қоюп, уларни әмәлгә ашуруш йолида әстаидил паалийәт елип бериватқан Дилназға: «Һеч қачан һармаң!» демәкчимиз.

Ақ йол сизгә, Замира!

Яркәнт шәһиридә «Диана» медицинилиқ колледжиниң паалийәт елип бериватқиниға бир қанчә жиллар болди. Бу вақит җәриянида уни башқа милләт вәкиллири билән бир қатарда, нәччә онлиған қара көзлиримизму түгитип, оттура дәриҗилик медицина хадимлири болуп йетилип чиқти. Замира Шәрипова әйнә шулар җүмлисидиндур. Замира биринчи курстин тартипла оқушқа чин етиқати билән берилип, әлачи студентлар сепидин орун алди. Шундақла җәмийәтлик ишларғиму паал қатнашти. Наһийә, вилайәт даирисидә өткүзүлгән һәр хил конкурслар билән байқашларға иштрак қилип, колледжниң шәнини қоғдиди. Мәсилән, бийилқи жилниң өзидила Талдиқорған шәһиридә болуп өткән Алмута вилайәтлик «Әң илғар учумкар —2012» конкурсиға қатнашти. Вилайәттики медицинилиқ колледжлар студентлири арисидики бу күч синишишта Замира иккинчи орунни егиләп, диплом вә баһалиқ соға билән тәғдирләнди. Шуниму ейтип өтүш керәкки, униң билән колледж шәнини қоғдиған Сабира Мухтәрова вә Ғунчәм Тайиповаму яхши нәтиҗиләрни қолға кәлтүрүп, мукапатлиқ орунларни йеңивалди. Замира Абдурасул қизи аталған оқуш орнини қизил диплом билән тамамлиди. Бир-икки жил медицина саһасида хизмәт қилип, андин алий мәлумат елиш униң өз алдиға қойған асасий мәхсити. Биз адәм саламәтлигини сақлаштәк шәрәплик ишта тунҗа қәдимини бесиватқан Замира Шәриповаға ақ йол тиләймиз.

Нурәхмәт ӘХМӘТОВ.

Яркәнт шәһири.

 

Үч хәткә қачиланған үч тәғдир

Биринчи хәт

«... Немишкиду, билмәймән, мән күнчи болуп қалдим. Жигитим билән жүрүватқинимда анчә билинмәтти. Турмушқа чиққандин кейин, бу «ағриғим» техиму «үдәп» кәтти. Йолдишим иккимиз он бир жил бир синипта биллә оқудуқ, һәтта алтинчи синиптин башлап бир партида олтардуқ. Һәммидин қизиғи, иккимиз бир-биримизгә интайин охшаттуқ. Бәзи билмәйдиғанлар, бизни гезәкләр дәп ойлайдиған. Мәктәпни тамамлиғандин кейин, Алмутида биллә жүрдуқ. У институтта оқуди, мән басмиханиларниң биридә ишлидим. Аилә қурдуқ. Йәттә жил биллә яшидуқ. Мошу жиллар мабайнида мениң һаятим йолдишимни күнләш билән өтүпту. Немишкә шундақ, билмәймән, кочида у биригә яки униңға бири қариса болди, уни йолдишимниң ашнисидәк һис қилаттим. Йоқ йәрдин җедәл чиқираттим. Ахири, икки балисиғиму қаримай, өйдин бирәтола чиқип кәтти. У кәткәндин кейин мән уни яхши көридиғинимни, уни сөйгәнликтин бөләкчә қизғанғанлиғимни чүшәндим. Бирақ, чүшәнгинимдин нә пайда, һәммиси кәч болди. Икки баламни әгәштүрүп, кәчүрүм сорап алдиғиму бардим, бирақ у райидин қайтмиди... Һазир балилирим билән арилишип туриду, техи өйләнмиди. Шуниңға қариғанда, уму мени яхши көрсә керәк. Һә, мән ахмақ, униң маңа болған муһәббитини «күнләш» дегән «қизил ишт» билән қоғлап жүрүп, өлтүрүптимән. Ханим-қизларға ейтарим, муһәббәт билән сөйгүниң һимайичиси — қизғиниш әмәс, ишәнчә екән. Уни мән кәч чүшәндим. «Ат айлинип қозиғини тапиду», дәйдиған момам рәмити...  Бирақ, йолдишим әнди өйигә қайтип келәрму?..».

Еһтирам билән Гүлзар».

   

Иккинчи хәт

«Мениң мәхсус билим елишқа мүмкинчилигим болмиди. Һәрбий хизмитимни өтәп кәлгәндин кейин, Алмута шәһиридики қурулуш комбинатлириниң биригә ишқа кирдим. Гүлсүм билән шу йәрдә тонуштум. У — сугақчи, мән — кәпшәлигүчи. Көңлүмиз ярашти, аилә қурдуқ. Иҗил-инақ яшидуқ. Дәсләп қурулушчиларға берилгән ятақханидин бир бөлмә, кейинирәк шәһәрниң нәқ мәркизидин икки ханилиқ пәтир алдуқ... «Әқилни турмуш бийләйду» демәкчи, комбинатимиз уштумтут йепилип, ишсиз қалдуқ. Бир күни аялим яйма базарға чиқидиғанлиғини ейтти. Тонуши Хитайға қатнап товар әкелидиған, аялим уни базарда сатидиған болуп келишипту. Һәр иккимиз өйдә олтарғандин немә пайда, чиқса чиқивәрсун, дәп ойлидим. Байқисам, тапавити яман әмәс. Илгәрки бәқувәт күнимиз көп кечикмәй, әслигә кәлди. Әнди мән өйниң тирикчилиги билән балиларға қарашқа көчтүм. «Базарға чиқип көрәйму», дегән тәкливимни аялим анчә хуш көрмиди. Күнләр көңүллүк өтүвәрди. Амма бара-бара аялимниң мүҗәз-хулқи өзгиришкә башлиди. Әткән тамиғимизни, жуйған киримиз билән тазилиған өйүмизни яқтурмай, һә десила, җедәл чиқиришни адәткә айландурди. Бара-бара өйгә һарақ ичип келидиған болувалди. Көп вақит өтмәйла, тамака чекидиған адәт тапти. Қойсиңизчу, әйтәвир, қайси бирини ейтай, үч-төрт жилниң арилиғида аялимни тонумай қалдим десәм, ашуруп ейтқанлиқ болмайду. Бәк өзгәрди. Бу өзгиришни дәрһал байқиған уруқ-туққанлар, дост-бурадәрләр: «Хотунни — баштин», дәп мени биләшкә башлиди. Өзәмни әндила оңшашқа башлиғанда, һәммиси кәч болди. Бир күни кәчтә Гүлсүм, «Мән Пәрһатқа ашиқ болуп қалдим, униңға турмушқа чиқимән, маңа рухсәт бәр», дәп һүрпәйди. Оғул-қизи әр йетип қалған аялимдин мундақ сөзни күтмигән едим. Шуңлашқа немә қиларимни билмәй, есәңгирәп қалдим. Аял йолдин чиқса, уни бери қайтуруш бәк қийин екән. Ахири, ичидин чиққан үч балисини ташлап, Түркиядин келип сода қиливатқан түрк жигитигә турмушқа чиқивалди. Йолдиши өзидин үч яш кичик, дәп аңлидуқ. Һазир улар шәһәрдә истиқамәт қиливатқан охшайду. Һә, мән болсам, һәммини ташлап, үч балам билән йезиға келивалдим. Аялим башта балилирини көргили келәтти, мана үч — төрт жил болди, айиғи тартилди. Балилиримғу әр йетип қалди. Шундиму, бала дегән бәрибир ана меһриға муһтаҗ екән. Һәммини йошурмай чүшәндүримән... Йеқинда Алмутида истиқамәт қилидиған ағинәм мени йоқлап кәпту. Униңму аяли бир диний мәзһәбкә киривелип, ахири у икки балисини ташлап, өзигә охшаш сектида жүргән биригә турмушқа чиқивапту. Ата-бовилиримиздин «Гөш бузулса — туз салар, туз бузулса, немә салар?» дегән дана гәп қалған әмәсму. «Ағриқни йошурсаң, өлүм ашкарә» демәкчи, һазир аялларниң тәртиви өзгәрди. Аҗизлиримиз өзлириниң аилә алдидики җавапкәрлигини төвәнлитиватиду. Әгәр анилиримизниң тәлим-тәрбийиси, мәпкүриси тоғра болмиса, милләт келәчиги немә болмақ?! Мени аялимниң тәғдирила әмәс, бәлки барчә мусулман аяллириниң, қизлириниң тәрбийиси ойландуриду. Тамака чекип, һарақ ичип жүргән ханим-қизлиримизни қандақ қилип жүгәнләймиз? Уларға милләтниң келәчиги аниларниң қолида екәнлигини қандақ чүшәндүрүмиз?!

Изгү нийәт билән Турсунҗан».  

  Үчинчи хәт

Базарда сода қилип жүргинимдә, бир жигит билән тонушқан едим. Униң «өйлинимиз» дегән сөзигә ишинип, қандақ һамилдар болуп қалғинимни сәзмәй қаптимән. У мениң һамилдар екәнлигимни аңлиши биләнла қуйруқни хада қилди. Амал йоқ, йезиға, ата-анамниң йениға беришим керәк. Мундақ һаләттә өйгә бериштин қорқтум. Ахири, бир тонушумниң мәслиһити билән рус момийиға аборт ясаттим. Икки-үч айлиқ наресидини алдурушниң оңай болмиғинини униңдин кейинки мүшкүл әһвалим арқилиқ ениқ билимән. Аридин жиллар өтүп, өткән күнлиримгә кәчүрүм билән қариған яхши бир жигиткә турмушқа чиққан едим. Амал қанчә, маңа ғәмхорлуқ қилған рус момийи мениң анилиқ томурумға бирәтола палта чапқан екән. Мана бийил өйләнгинимизгә он жил болди. Пәрзәнт көрүшкә зар болуп жүримән. Йеқинда Ана билән бала саламәтлигини һимайә қилиш институтиға тәкшүрүшкә барған едим. Маңа ана болуш бәхти буйрумиғанлиғини шу йәрдә чүшәндим. У бәхитни мән жигирмә йешимда өз қолум билән қийиветиптимән. Мүмкин, бу — Алланиң маңа бәргән җазаси, бегуна наресидиниң көз йеши болар... Һазир йолдишим иккилән балилар өйидин бала беқивелишқа келиштуқ. Бирақ униңму өзигә чүшлуқ қийинчилиқлири бар екән. Бәзән әйнә шу қийинчилиқларға бәрдашлиқ беришкә йолдишимниң тақити йетәрму, дәп әндишә қилимән...

Еһтирам билән Гүлзиба».

Алмута шәһири.   «ВИСАЛДИН»: сир әмәски, мундақ хүнүк әһваллар пәқәт үч кишиниңла һаятида әмәс, кейинки вақитларда кәң овҗ еливатиду. Әнди муәллипләрниң илтимасиға бола, исимлири өзгәртивелинған үч муәллипниң ушбу хетини башқиларға савақ болуп қалар, дегән нийәттә бериватимиз. Мабада, һөрмәтлик гезитхан, силәр тәрәптин хәт муәллиплиригә берәр мәслиһәт, ейтар пикир-тәклиплириңлар яки араңларда, худди шундақ әһвалларға дучар болуп, немә қиларини билмәй, беши гаңгирап қалғанлар болса, мәрһәмәт, «Висал» сәһиписи арқилиқ ой бөлүшсәңлар болиду.

 

ШУАР әдәбиятидин

 Хәйир, бүйүк хияллирим

(Нәсир)

Йеңи бир күн, зиминға йоруқлуқ ата қилған йеңи таң қуяши, йеңи бир һаят... Йеңи тәпәккүр, йеңи хияллирим билән зимингә бақтим. Асман йеңи, йәр йеңи, қуяш йеңи, йеңи..., йеңи... йеңи... Қисқиси, пүткүл каинат йеңи, хияллирим тәбиәт дуниясидин инсанлар дуниясиға көчти. Йеңи инсан, йеңи қәдәм, йеңи ғәлибә... Бу тәпәккүрүмдики йеңилиқлармиду, яки?... Йәнила хиял илкидимән. Йеңи бир қәдәм кона бир қәдәмниң орнини басаламдиғанду? Һәр бир қәдәмниң йөткилиши йеңилиқтин дерәк берәмдиғанду? Һәр бир қәдәмниң вәзини охшаш боламдиғанду? Инсанлар өз һаятидин йеңи бир мәнзил ачаламдиғанду яки яқ... Яки наданлиқ?... Мениң хияллирим әмәлияттики реаллиғиммиду? Мән хияллиримға ишәнчә билән җавап издимәктимән, мән инсанларни сөйимән, хәлқимни сөйимән, әҗдат вә әвлатлиримни сөйимән. Улар дунияниң яратқучилири... Дәл мошу йәргә кәлгәндә, хияллиримдин чәксиз сөйүндүм. Соаллиримға иккилиниш ичидә әмәс, бәлки ишәнчә билән җавап таптим. Хәйир, мениң бүйүк хияллирим, сән мәңгү реаллиқниң ғоҗиси, дил садаси болуп қал.

Айтурған ҚАДИР. 

 

Ата-анилар «уһ» десун!

(Нәзим)

Оқ-я кәби мүкчәйдим, сени чоң қип баққичә, Көз жумди анаңму, силәр кирпик қаққичә, Әркиләтти «сақам» дәп, миң җапада                                                            чоң қилди, Әдәп-әхлақ үгитип, адәм қилди, оң қилди.   Намизида дуа қип, бәхтиңниму тилиди, Һәр кәлгәндә тәтилдә, сөйүп                                                бешиң силиди. Оқушуңни түгәтсәң атаң йәнә аварә, Аилидә йоқ шатлиқ, анаң бағри сәкпарә.   Орунлашсаң хизмәткә түгимәс —                                                вай-вуй ғемиң, Кийим-кечәк, киримиң туғулған күн,                                                                 той, чейиң. Чиққан техи яндишип, муһәббитиң                                                            бих сүрүп, Қандурмиса жүригиң, жүрәрсән                                                              қапақ түрүп.   «О-әш» десә балаңни гепиңгә һар келип, Һәптә-айлар йоқайсән бир-бириңни                                                            ят көрүп. Келин кәлсә ай қизим, күйоғлини вай балам, Жуқури өтүң дәватқан, алмай түзүк                                                                    җан арам.   Тойдин кейин кәлсә қиз, висалиға қариған, Қайғу билән шатлиқни көзлиридин мариған. Пүтүн өмри уларниң, пәрзәнт үчүн яралған, Роһи-җисми, риштиси әвладиға бағланған.   Нәврә бақсақ мәйлиғу, чәврә беқиш                                                            пәризму? Немә дегән түгимәс ата-анидики қәриз бу?! Ата-анилар қәдрини, сәнму әнди билгән сән, Балилириңниң отида, қанчә қетим                                                                                             көйгәнсән.   Ата-ана күндила, бақи әмәс саңа бил, Алла алса җенимни, чидимайсән көйәр дил. Қәдригә йәт, уларни рази қилғин,                                                            хуш қилғин, Ата-анилар «уһ» десун, бирәр қетим                                                            хуш болсун, Пәрзәндидин шатлиқни, һаят чеғи                                                            нәқ көрсун!

Аюп АБДРАХМАН.

 

Һәвәскарлар иҗадидин

Бағвән — устаз

Бағ арилап жүриду бағвән, Гүл-чечәккә төкүп меһрини. Қәләм билән гүл чекип бәзән, Устаз ачар шагирт зеһнини.   Ериқтики шох аққан сулар, Талай жилни кәтти йетәкләп. Һур бағдики гүлләр баһарда, Яп-йешил боп кәтти чечәкләп.   Бағвән — устаз, шагирти көчәт, Бағ — у мәктәп, шагирт мевиси. Мәй бағлиған мевиләр әлвәт, Устазларниң — әҗри-меһнити.   Устаз, десәм тәвринип жүрәк, Улғийиду аңа муһәббәт. Шуңа дәймән устаз — бағвәнләр. Болсун аман мәңгү — та әбәт.

Мукарәм Розибақиева,

                                                                                                        ҚазМПУ студенти.

Соалиға яриша җавави

—   Йолдишиниң кийим-кечигидин башқа бир аялниң чечини көргәндә қандақ аял қизғанмайду? —   Йолдиши сатраш болуп ишләйдиған аяллар.

***

—   Икки аял елишниң әң яман тәрипи? —   Икки қейинанаң болиду.

***

—   Саат билән ғевәтчи аял арисида қандақ пәриқ бар? —   Саат бәзидә тохтап қалиду.

***

—   Сәясәтчи билән аял арисида қандақ охшашлиқ бар? —   Һәр иккисиниң еғизи асанлиқчә бесилмайду.

***

—   Немә үчүн өйләнгән пәйттики дәсләпки айни «ширин ай» дәйду. —   Униңдин кейинки айлар дозақтикидәк болидиғанлиғи үчүн.

***

— Қандақ аяллар чирайлиқ көрүниду? — Һамилдар аяллар.

 

Сағлам милләт болуш үчүн сағлам әвлат керәк

Йошуридиғини йоқ, һазир коча-кочиларда, истраһәт бағлирида, кафеларда бәзи қизлиримиз тамакисини пуқиритип чекип, өзлирини, худди Көктә пәрваз қилғандәк, һис қилишиду. Лекин шу тамака чекиш арқилиқ қизлиримиз өзлириниң саламәтлигини зәһәрләватқанлиғини, өмрини қисқартиватқанлиғини билмәмдекин?! Бизниң сағлам милләт болуп йетилишимиз өзимизниң қолида. Чүнки сағлам милләт болуш үчүн сағлам әвлат керәк. Әнди сағлам әвлат болуш үчүн биз сағлам һаят тәризини тәрғип қилишимиз керәк. Милләт ғуруриға, шәнигә дағ чүшәрмәйдиған сағлам һәм салаһийәтлик анилардин болуш, пәқәт өзимизниң қолида.

Қәлбинур ТУРҒУНОВА.

Алмута шәһири.

Билип қойғиниңиз яхши

  Әр-аял жилиға оттура һесап билән 2450 қетим урушуп, күнигә оттура һесапта йәттә қетим тоқунушидекән. «ИТАР-ТАСС» агентлиғи тәрипидин елан қилинған  мәлуматларға нәзәр ағдурсақ, әр-аял көпирәк пул вә өй ишлири әтрапида уруш-талаш қилидекән. Тәтқиқатчиларниң тәкитлишичә, әр билән аял арисидики җаңҗалға асасән телеканаллар билән таам таллаш вә ухлаш пәйтидики хорәк тартиш сәвәп болидиған охшайду. Балилириниң арисиға кирип,  җаңҗаллишидиған әһвалларниңму нурғун учришидиғанлиғи ениқланған.

***

Қазақстан Җумһурийити статистика бойичә агентлиғиниң мәлуматлириға асаслансақ, 6419  508 аялниң 52,2 пайизини турмуш қурғанлар, 28,2 пайизини һеч қачан некадин өтмигәнләр, 12,6 пайизини тул қалғанлар, 7,0 пайизини аҗришип кәткәнләр тәшкил қилидекән.

***

Аяллар әрләргә нисбәтән аз дәм алидекән. Алимлар тәрипидин жүргүзүлгән тәтқиқатларға нәзәр ағдурсақ, әрләр бош вақтиниң 1,2 пайизини телевизор көрүшкә яки ухлашқа сәрип қилса, аяллар бош вақтини асасән өй ишлири билән базар вә дукан арилашқа беғишлайдекән.

***

Қазақстанда 30 — 64 яш арилиғидики 1000 аялға 888, 65 вә униңдин жуқури яштикиләргә 528 әр тоғра келидекән.

Гөзәллик булуңи

Чечиңиз қоюқ һәм юмшақ болиду

Ахшими йетиш алдида чечиңизниң терисигә еритилған қой мейини сүркәп, бешиңизни массаж қилисиз. Әтигәнлиги чечиңизни жуюштин бир саат авал 1 тал лимонниң сүйини бир қошуқ косметикилиқ сиркә сүйигә арилаштуруп, бешиңизниң терисигә сүркәйсиз. Униңдин кейин бешиңизни тухум шампуни билән жуйисиз.(Өй шараитида тухум шампунини тәйярлаш усули: 2 тал тухумниң сериғини бир стакан илман суға яхшилап арилаштуруп, чечиңизға сүркәйсиз. Бир сааттин кейин илман су билән бешиңизни жуйисиз.)

***

Бир тал тухумға 2 аш қошуқ сүргү (касторка) йеғини, 1 чай қошуқ сиркә сүйини вә 1 чай қошуқ глицеринни арилаштуруп, чечиңизниң терисигә сүркәп, иссиқ лөңгә билән бешиңизни орайсиз. Бир аздин кейин чечиңизни иссиқ һоға тутуп, униңдин кейин жуюветисиз. Чечиңиз қоюқ, ипәктәк юмшақ вә пақирап туридиған болиду.  

Үз терисини сағламлаштуриду

Шаптулидин тәйярланған маска үз терисини силиқлайду вә сағламлаштуриду.

***

Йеңи үзүвелинған яки тузланған помидордин тәйярланған маска қоруқ чүшкән үз терисигә косметикилиқ мәхсәттә пайдилинилиду.

***

Исситилған аптаппеләз мейини қуруқ үз терисигә вә қолға сүркисә, үнүми яхши болиду. 

(«ЗОЖ» гезитидин елинди).

 

Қош сәһипини тәйярлиған Шәмшидин АЮПОВ.