• Редакция почтисидин
• 30 Қаңтар, 2019

Исми әбәдийләштүрүлүши һаҗәт

Мениң бу инкасни йезишимға «Уйғур авази» гезитиниң 2019-жили 17-январь санида елан қилинған Сәвирдин Мәхсәтовниң «Һәқиқәт егилиду, сунмайду» сәрләвһилик мақалиси сәвәп болди. Мақалә муәллипи наһайити аддий тилда даңлиқ шәхс Мирзигүл Насировниң әмгәк паалийити, әҗрини баһалап, униң исмини әбәдийләштүрүш бойичә һечбир чарә көрүлмигәнлигини интайин ечинип йезипту. Мирзигүл Насировниң һаят йолини билмәйдиған чоң вә оттура яштики әвлат йоқ болса керәк. Уларни қайтилап олтиришниңму һаҗити йоқ, дәп һесаплаймән. Шуңлашқа мән «һечтин кәч яхши» демәкчи, Улуқ инсанниң исмини әбәдийләштүрүш бойичә өзәмниң оюмни билдүрмәкчимән. Мирзигүл Насировниң тәрҗимиһалида униң әмгәк паалийитини ана жути Түгмәндә муәллимликтин башлиғанлиғи мәлум! Шуңлашқа Түгмән уйғур оттура мәктивини вә аңлиқ һаятини гүлләп-яшнитишқа сәрип қилған иккинчи жути Чариндики Мәдәнийәт өйини Мирзигүл Насиров исми билән атиса, әқилгә мувапиқ болуши керәк, дәп ойлаймән. Мошу ишниң иҗабий һәл болушиға тегишлик рәсмий вә нарәсмий орунлар, җамаәтчилик болуп һәрикәт қилса, дәп үмүт қилимән. Адилҗан ҺӘМРАЕВ, пенсионер. Уйғур наһийәси.