• Җәмийәтлик тәшкилатларда
• 30 Қаңтар, 2019

Баш жигитбеши сайланди

Рашидәм РӘҺМАНОВА, «Уйғур авази» Әмгәкчиқазақ наһийәсидә йәтмиш миңдин ошуқ миллитимиз вәкили истиқамәт қилиду. Мәлумки, уйғурларда жигитбешисиз иш пүтмәйду. Болупму, мундақ чоң наһийәдә жут атисисиз паалийәт елип бериш қийин. 17 жил давамида Әмгәкчиқазақ наһийәсиниң чоң жигитбеши вәзиписини шәрәплик атқурған Турсунмәһәмәт Абдулсемәтовниң наһийә вә елимиз тәрәққиятидики әҗри һәққидә пәқәт әмгәкчиқазақлиқларға әмәс, бәлки пүткүл җумһурийәт уйғурлири яхши билиду. Амма саламәтлигиниң начарлишишиға бағлиқ икки жилдин бери Турсунмәһәмәт ака өз хизмитидин қолини үзүшкә мәҗбур болди. Шуниңдин бери наһийә баш жигитбешиниң вәзиписини бираз вақиттин бери униң орунбасари Үсәнҗан Абдрахманов атқуруп кәлди. Йеқинда наһийә округлириниң жигитбашлири баш қошуп, ушбу вә башқиму мәсилиләр әтрапида мәслиһәтләшти. Учришишқа җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси Ярмәһәммәт Кибиров, регионаллиқ жигитбеши Долқун Разиев, Талғир наһийәсиниң баш жигитбеши Октябрь Қурбанниязов вә Челәк, Байсейит, Қазақстан, Қарийота, Қорам, Ават, Рахат, Тәшкәнсаз, Баяндай, Амангелди, Бирлик, Әмгәк, Ғулҗа, Йеңишәр, Космос йезилиридин 28 жигитбеши вә җәмийәтлик ишларниң активистлири иштрак қилди. Жиғинни Ярмәһәммәт Кибиров ечип, наһийәлик жигитбашлири билән әмәлгә ашуруватқан ишлири һәққидә ейтип бәрди. У Әмгәкчиқазақ наһийәлик Уйғур этномәдәнийәт мәркизи вә униң йенидики жигитбашлири кеңишиниң паалийити һәққидә сөз қилип, Турсунмәһәмәт Абдулсемәтовниң җәмийәтлик ишлардики әмгигигә өзиниң иҗабий баһасини бәрди. Шуниң билән биллә униң саламәтлигигә бағлиқ наһийәниң чоң жигитбеши вәзиписидин өзини бошитишни илтимас қилғанлиғини йәткүзди. Шу сәвәплик наһийәгә йеңи жигитбешини сайлаш керәклигини ейтти. Жиғин қатнашчилири бу җавапкәрлик орунға җәмийәтлик ишларниң қайнимида жүридиған, турғунлар билән ишләштә бай тәҗрибигә егә «Йеңишәр» җәмийәтлик бирләшмисиниң рәиси Реһимҗан Ибдиминов, Челәк региониниң баш жигитбеши Һебибуллам Абдуллаев, Тәшкәнсаз йезисиниң жигитбеши Әнвәрҗан Баратов вә Челәк йезисиниң жигитбеши Иврайимҗан Шакировниң намзатлирини көрсәтти. Намзатлар елан қилинғандин кейин Һебибуллам Абдуллаев сөзгә чиқип, өзигә билдүрүлгән ишәнчә үчүн миннәтдарлиғини билдүрди. Мундақ чоң вәзипидин чиқишқа саламәтлигиниң яр бәрмәйдиғанлиғини ейтип, өз намзитини алдурди. Иврайимҗан Шакировму вақитниң қислиғиға бағлиқ ишләш имканийитиниң йоқлиғини ейтип, баш тартти. Әнвәрҗан Баратов болса, өзиниң наһийәлик жигитбеши охшаш чоң хизмәткә һазирчә тәйяр әмәс екәнлигини билдүрүп, өзиниң намзитини елип ташлашни илтимас қилди. Нәтиҗидә көпчиликниң қоллап-қувәтлиши билән Әмгәкчиқазақ наһийәлик Уйғур этномәдәнийәт мәркизи йенидики Жигитбашлири кеңишиниң рәиси болуп Реһимҗан Ибдиминов (сүрәттә) сайланди. Ахирида жигитбашлири Әмгәкчиқазақ наһийәсиниң йеңи баш жигитбешиниң мәсъулийәтлик паалийитигә муваппәқийәт тиләп, миллий мәтбуат, уйғур мәктәплириниң бүгүнки тәғдири, ана тилимиз, миллий мәдәнийитимиз билән сәнъитимизгә аит мәсилиләрни муһакимә қилди. Әмгәкчиқазақ наһийәси.