• Ишбиләрмәнләр
• 27 Ақпан, 2019

Тәдбирчанларниң бири еди

Гөһәрбүви ИСМАЙИЛҖАНОВА, «Уйғур авази» Мошу күнләрдә Панфилов наһийәсидә һәрхил саһаларда паалийәт елип бериватқан тиҗарәтчиләр аз әмәс. Уларниң сепи жилдин-жилға өсүп, бу ишниң епи-җепини тепиватқанлар қатариниң көпийиватқанлиғи һәммимизниң хошал қилиду, әлвәттә. Тиҗарәтчилик билән биллә жутқа көйүнүп, хәйри-еһсанлиқ ишларниң бешида жүрүватқанлар тоғрисида гәп қозғилип қалса, дәсләпкиләрдин болуп Дилмурат Ниязовниң исми тилға елинатти. Дилмурат Яркәнттә туғулуп өсти. Шәһәрдики Н.Крупская намидики оттура мәктәпни әла баһаларға тамамлап, Новосибирск шәһиридики қурулуш институтида оқуди. Андин Вәтән алдидики икки жиллиқ борчини өтәп қайтқан Дилмурат иш-паалийитини шәһәрдики ПМК-101 қурулуш мәһкимисидә башлайду. Алий мәлуматлиқ қурулушчи сүпитидә тәдбирчанлиғи һәм тәшәббускарлиғи билән көзгә чүшүватқан бир пәйттә тохсининчи жиллири йүз бәргән ихтисадий боһран униң охшаш онлиған алий билимлик мутәхәссис яшларниң кәспини өзгәртишигә сәвәп болди. Шу-шу болидудә, қурулуш инженери әнди тиҗарәт билән шуғуллинип, хошна ХХҖ арисида сода-сетиқ паалийитини җанландуруп, бу ишниңму епи-җепини тепивалиду. Тиҗарәтчилик кәң қанат йейип, бу жиллири Яркәнт тәвәси илгәрки Кеңәшләр Иттипақиғила әмәс, бәлки жирақ чәт әлләргиму тонулди. Қазақстан билән ХХҖ арисида қоюқ ихтисадий мунасивәт орнитилди. Шуниң нәтиҗисидә Алмутиға йеник машина билән қатнаш ишлири башланди. Әйнә шундақ бир пәйттә, йәни 2005-жили Яркәнт – Алмута йолида таң сәһәр йолға чиққан Дилмуратниң йеник машиниси йол һалакитигә учрайдудә, 36 яшлиқ ширғуран жигит паҗиәлик вапат болиду. Дилмурат Ниязовниң шәхсий һаяти һәққидә гәп қилғанда, у ибрәтлик яш аилиләр қатаридин тилға елиниду. У жутдиши Саһидәм билән аилә қуруп, үч пәрзәнт сөйгән еди. Бүгүн униң пәрзәнтлири Бәхитҗан билән Дилназ алий билим елип, җәмийитимизниң һәрхил саһалирида биркишилик хизмитини елип бериватса, кәнҗиси Ясмина атиси тәһсил көргән мәктәптә 10-синипта оқуватиду. – Шәхсән өзәм Ниязовлар аилисини яхши тонуймән, – дәйду устазим Зенәтбүви Абдуллақизи. – Мәрһумниң ата-аниси Азат ака билән Айшигүл һәдә наһийәниң ихтисади билән мәдәнийитиниң риваҗлинишиға биркишилик һәссисини қошқан инсанлар еди. Азат ака илгәрки «Октябрьниң 40 жиллиғи» намидики колхозда 30 жил шофер болуп ишлигән. Аниси Айшигүл һәдә шунчә жил башланғуч синип муәллими сүпитидә йүзлигән шагиртларға тәлим-тәрбийә бәрди. Бу аилидә өскән Арзигүл, Заһидәм, Зәйтүнәм, Саһибәм, Халидәм вә Адинәм тиҗарәтчилик билән шуғуллиниватиду. Биз, мәктәп муәллимлири, һаяти бевақит қийилған мәктивимизниң сабиқ, үлгилик оқуғучисиниң иш-паалийити һәққидә тәрбийә саатлирида ейтиштин ялиқмаймиз. Чүнки униң һаяти һәр җәһәттин үлгә-нәмунә еди. Униң хатирисигә беғишланған волейбол, баскетболдин турнирларни уюштуруш шуниң бир испати. Ниязовлар әвладиниң тунҗиси Арзигүл – наһийәдики тәдбирчан-ханим-қизлар кеңишиниң әзаси сүпитидә миллий мәдәнийитимизгә аит һәрқандақ ишта паалийәтчанлиқ көрситип, хәйрихаһлиқ ярдимини көрситиватқан тиҗарәтчилиримизниң бири. Дилмуратниң һаяттин өткинигә қанчә жил өтсиму у оқуған мәктәптә, һәм у яшиған мәһәллисидә, әл-жут, дост-бурадәрлири арисида яхши сөзлири қалди. Һәммисила униң тәдбирчанлиғи билән сахавәтлигини тәрипләйду. Дилмуратниң ата-анисини вә уни көргән-билгәнләр у һәқтә униң тәвәллудидиму мошу хилдики хатирилири билән ортақлишиду. Панфилов наһийәси.