• «Мәшъәлниң» меһмини
  • 06 Наурыз, 2019

Оти өчмигән гүлхан

Йеңи жил һарписида Челәк йезисида яшайдиған жутдишим Әлишер Сабировни учритип қалдим. – Мән Ғәйрәт йезисиниң ненини йәп, сүйини ичип чоң болдум. Башқилар қатарида мәнму шу жут үчүн бирәр яхшилиқ қилсам, дегән арминим бар. Шуңлашқа бийилқи Йеңижиллиқ гүлханни өткүзүшни һөддәмгә алсам, – дегән өзиниң хаһишини билдүрди. Дәсләп жутдишимизниң бу илтимасиға бәзиләр гуман билән қариған еди... Әсли Әлишер Сабиров 1985-жили Маливай йезисида туғулған. Аз вақит өтүп дадиси Сәйпуллам Сабировниң иш баби түпәйли уларниң аилиси Ғәйрәткә көчүп бариду. Мәзкүр жуттики И.Саттаров намидики оттура мәктәпни тамамлиған Әлишер 2002-жили җәнубий пайтәхтимиздики Қазақ автомобиль йоллири академиясиниң төмүрйол факультетиға оқушқа чүшиду. 2005-жили тәғдир уларниң аилисини Челәккә ташлайду. Алий оқуш орнини әла пүтәргән Әлишер 2009-жили Челәктә техникилиқ хизмәт көрситиш мәркизини ачиду вә йеза хәлқиниң, һәтта хошна йезилардин келидиған кишиләрниң техникисиға хизмәт көрситип, уларниң көңлидин чиқишқа башлайду. Күнләр әшундақ сирғип өтүвериду. Амма «Дәрт кәлсә, қошлап келиду» демәкчи, Әлишер Челәктики ишини рәткә кәлтүрүп қоюп, шуниң билән қатар Алмутида ишләватқан бир пәйттә уни рәһбәрлик Москваға командировкиға әвәтиду. У яқтин келип, Әлишер Ғәйрәт йезисида өтүватқан йеңижиллиқ гүлханға қатнишиду. Кечиси Челәктин Әлишерниң СТОниң ишиклири очуқ турғанлиғи тоғрисида хәвәр келиду. У кечиләп Челәккә қарап йолға чиқиду. Сәпәрдин кейин икки күн уда уйқа көрмигәнлиги яки чарчиғанлиғи үчүнмекин Қизилшәриқ йезисидин өтүпла көзи илинип кетип, йол-транспорт һалакитигә учрайду. Униңға Челәк дохтурханисида кәйни-кәйнидин икки қетим операция қилиду. Дохтурларниң көп күч чиқириши түпәйли Әлишер аман қалиду. Лекин ақхалатлиқлар униң олтиришиға һәм туруп меңишиға үмүт йоқлуғини ейтиду. Шу чағда у көрәр күниниң алдида екәнлигини сезиду. Уни аз дегәндәк, Әлишер дохтурханидин әндила түзилип чиқишиға дадиси Сәйпуллам акиму йол һалакитидин қаза болиду. Атисиниң намизиға қатнишалмиған Әлишерниң дәрди пәқәт өзигила аян еди. Лекин у барлиқ дәрдини ичигә жутуп, һәммигә бәрдашлиқ берип, сәвирликни биринчи орунға қойди. «Сәвирлик түви – алтун» дегини мошу болса керәк. Худайимниң қудритиму яки бир тәрәптин өзиниң кечә-күндүз тиришчанлиғи билән үзлүксиз мәшиқләрниң нәтиҗисиму, әйтәвир, Әлишер пәйдин-пәй олтиришқа башлайду. «Келәчәкни көзлигән – йетәр муратқа» демәкчи, Әлишер еғир һаләткә чүшүп қалғини билән күнини бекар өткүзүшни халимиди. Тирик адәмниң тирикчилик қилиши керәк әмәсму?! Әлишерму бир аилиниң егиси болғачқа, пәрзәнтлириниң ғемини қилип, бирәр ишниң пешини тутушқа бәл бағлайду. Дәсләп у өйидә тонуш-билишлириниң арқисида автомобильларни ғәмсизләндүрүш агентлиғини ачиду. Андин компьютер сетивелип, заманивий программиларни үгинип, визитка, тәклипнамә ясап сатиду. Бир жил ичидә иши бираз йолға қоюлғандин кейин заманивий идарә салиду. Паалийитини кәңәйтиш мәхситидә банктин бираз несийә елип, видеокамера, фотоаппарат һәм музыкилиқ аппаратларни сетивалиду. Өзи болса, видеосәһипилигүчи кәспини үгиниду. Бүгүнки күндә «SABІR STUDІO» мәркизини тәшкил қилип, һәрқандақ той-төкүн, мәрикиләрни видеоға чүширип, херидарларниң көңлидин чиқмақта. Һазир униң қаримиғида 6 жигит ишләйду. Униң әмгәксөйгүчлүгини вә йетиватқан утуқлирини инавәткә алған болуш керәк, мүмкинчилиги чәкләнгән яшларни қоллаш мәхситидә тәшкил қилинған «Саби» фонди өзлириниң имтиязлири бойичә бәлгүләнгән хираҗәтни йеңивелишқа беғишланған конкурсқа Әлишерниң қатнишишиға мүмкинчилик бәргән. Бу конкурста Әлишер бәлгүлүк орунларға еришидиғанлиғиға үмүт қилиду. Сәвәви, у барлиқ күч-ғәйритини, билим-иқтидарини өз ишиға җан-дили билән сәрип қиливатиду. Әлишер буниңдин сирт, миллий чалғу әсваплиримиздин дутар челишниму өзигә әмәк қиливалған. Өйгә кәлгән меһманларға үгәнгән сазлирини челип, зериктүрмәйду. Челәк тәвәсидә өтүп туридиған мәдәний чарә-тәдбирләргиму паал қатнишиду. Өйдә аниси Патигүл һәдә билән рәпиқиси Делора Әлишерниң икки қанити. Қош пәрзәнди Сабир билән Сабрина келәчәк арзуси, үмүти. Акиси Мунардин Әлишерниң еғирини йеник қилип, дайим пайпетәк болуп жүриду. Сиңлиси Арзигүл – сөйүмлүк акисиниң мәдәткари. ...Әлишерниң әмгәксөйгүч вә һәр ишни орунлуқ атқуридиған жигит екәнлигини жутдашлири яхши билиду. Шуңлашқиму униң бийилқи Йеңи жиллиқ гүлхан мәрикисини өткүзүшини йәкдиллиқ билән қоллап-қувәтлиди. Уму бу ишниң һөддисидин утуқлуқ чиқти. – Еғир пәйтләрдә мениң йенимдин тепилған аиләмгә, уруқ-туққан, қериндашлирим билән әл-ағинәмгә вә жутдашлиримға миннәтдарлиғим чәксиз. Шу күни йол һалакитигә чүшкинимдә, мениң һаятим әнди қайғулуқ һәм қараңғучилиқта өтиду, дәп ойлиған едим. Амма мән силәрниң қоллап-қувәтлишиңлар билән әл қатарида хатирҗәм яшаватимән, – дәп миннәтдарлиғини билдүрди Әлишер шу күни жутдашлириға. Бийил «Яшлар жили». Әлишерниң тиришчанлиғи, шу җүмлидин қиливатқан азду-тола хизмити «иш йоқ» дәп ятқан бәзибир яшларға үлгә-нәмунә болмақта. Бизму, өз новитидә, мақалә қәһриманиниң мошу хилдики хислити билән һәқлиқ рәвиштә пәхирлинимиз! Абдулҗан АЗНИБАҚИЕВ. Әмгәкчиқазақ наһийәси.

33 рет

көрсетілді

0

пікір
Алдыңғы мақала «Әҗдатлирим кәспигә варислиқ қилғинимдин хошалмән»

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

23 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы