• Анилар билән аләм гөзәл
• 06 Наурыз, 2019

Дәрәқ бир җайда көкләйду

Рашидәм РӘҺМАНОВА, «Уйғур авази» Һәқиқәтәнму, шундақ. Йеши сәксәнгә тақап қалған Мерванәм һаҗим Ибрагимова Әмгәкчиқазақ наһийәсиниң Байсейит йезисида туғулуп өсти. Мошу йезида әмгәк қилип, һөрмәтлик дәм елишқа чиқти. Аилә қуруп, ана вә мома аталди. Униңдин кейинму ана жутиниң тәрәққий етиши үчүн һармай ишлиди. Һазир у Байсейитниң әтивалиқ нураний анилириниң бири сүпитидә көпчиликниң һөрмәт-еһтирамиға бөлинип яшаватиду. Униң атиси устаз Иврайим Садиров дәсләп Левирхан исимлиқ аялға, униң вапатидин кейин Модәнгүл һәдигә өйләнди. Мерванәм – Левирхандин болған төрт пәрзәнтниң кәнҗиси. У Байсейиттики башланғуч вә Челәк йезисиниң Абай намидики оттура мәктивини тамамлиди. Чәтәл тили пәниниң муәллими болуш армини билән институтқа һөҗҗәтлирини тапшурди. Бирақ у оқушқа чүшәлмиди. Шу чағда «Қизил Юлтуз» колхозиниң мудири Кебек Ибрагимов тиришчан қизни колхоз ашханисиға рәһбәрлик қилишқа чақирди. «Қолидин бал тамған» Мерванәм ашпәзлик кәспигә садиқ болуп қалди. Ишләп жүрүп, Қарғали кооператив техникуминиң технология факультетида тәһсил көрди. Агроном жигит Шерилахун Өмүрзақов билән аилә қурди. Бәхитлик аилә үч оғул вә икки қиз сөйди. Бәхиткә қарши, бир оғли еғир ағриқтин қайтиш болди. Буниңдин 20 жил муқәддәм Мерванәм ана һәрәмгә барди. Диний билимини мукәммәлләштүрүшкә җиддий киришти. Оқуған намазлири билән қилған дуалирида барлиқ мусулманларға Алланиң рәһимини тилиди. Мерванәм Ибрагимова 1998-жили һөрмәтлик дәм елишқа чиқти. Мәлумки, шу жиллири базар ихтисади тәрәққий етишкә башлиди. Мерванәм ана дәм елишниң орниға өзигә йеңи иш издиди. Дәсләпкиләрдин болуп, йезида тиҗарәтчиликкә тутуш қилди. «Индира» кафесини ачти. Тапавити өскәндә житим-йесирларға ярдәм қилишқа башлиди. Урпи-адәт, миллий әнъәниләрни һәртәрәплимә үгинип, уларни яшларға йәткүзди. Иқрар қилиш керәкки, яшлар әмәс, бәлки 50 – 60 яшқа йәткән ханим-қизлиримизму гайида «өлүкни жуюш», «өлүккә кепинлик тикиш», түнәк һәм Молутни өткүзүш вә башқиму әнъәнә вә урпи-адәтлиримизни билмәйду. Әйнә шундақ пәйттә яшлар Мерванәм анидин мәслиһәт сорайду. Шундақ аниси бар жут – бәхитлик. Йәнә бир ейтип кетидиған нәрсә, Мерванәм ана бәш жилдин бери ағрип қалған адәмләргә дәм селип, уларни давалайдиған болди. – Сүрә-айәтләрдин оқуймән. Бемарниң ағриған йерини сийпап, дәм селип қойимән. Дуа қилип, униң тез сақийип кетишини Алладин сораймән, – дәйду ана. Илим-пән тәрәққий әткән бүгүнки күндә мундақ мөҗүзиләргә һәйран қалғинимму раст. Бирақ сири ечилмиған тилсим һадисиләрниң һаятта бар екәнлигини көрүп-аңлап жүримизғу! Алланиң бәргән хасийити түпәйли көпчиликниң разилиғиға бөләнгән ана үчүн әң муһими – шипа издәп кәлгән инсанларниң сақийип кетиши, уларниң көңлиниң хатирҗәм болуши. Көпни көргән, һаят тәҗрибиси мол мөтивәр атилар билән нураний аниларға һәрқандақ жут муһтаҗ. 18 нәврә вә 5 чәврә сөйгән Шерилахун ата билән Мерванәм һаҗим аниға узақ өмүр тиләймән. Тәбиәт һәдийә қилған хисләтлиригә ханим-қизлиримизниң мәнивий устазиға айланған Мерванәм анини алдимизда келиватқан хәлиқара Ханим-қизлар мәйрими билән сәмимий тәбрикләп, «Сехирлиқ қоллириңиз дәрт көрмигәй, ана!» демәкчимиз. Әмгәкчиқазақ наһийәси.