• “Дүгләк үстәл”
• 06 Наурыз, 2019

Уйғурларму нәзәрдин сирт қалмиди

Өткән һәптидә Алмута шәһиридики «Достлуқ өйидә» М.Әвезов намидики Әдәбият вә сәнъәт институти, Регионаллиқ «Белорусь этномәдәнийәт мәркизи» җәмийәтлик бирләшмиси “Мәнивий йеңилиниш” программиси даирисидә Қазақстан Язғучилар иттипақи вә ҚҖ Миллий китапханисиниң уюштуруши билән «дүгләк үстәл» өткүзүлди. «Белорусь. Иҗат вә тәғдир» мавзусида өткән мәзкүр әнҗуманға елимизниң йетәкчи әдәбиятшунас алимлири билән тонулған язғучи, шаир вә тәрҗиманлар, алий билим дәргаһлириниң студентлири иштрак қилди. Асасән, хәлиқләр достлуғиниң муһим тәркиви болған әдәбий әсәрләрни һәрхил тилларға тәрҗимә қилиш, мәдәний алақиларни қайта тикләш һәққидә мәзмунлуқ сөһбәт жүргүзүлди. Әнҗуман модератори, М.Әвезов намидики Әдәбият вә сәнъәт институтниң Тәһлил вә әдәбий алақилар бөлүминиң башлиғи Светлана Ананьева Белорусь вә Қазақстан язғучилириниң әдәбий җипсилиғини риваҗландуруш мәхситидә әмәлгә ашурулуватқан чарә-тәдбирләргә тохталди. У Белорусь Әхбарат министрлигиниң тәбрик хетини оқуп бәргәндин кейин сөзни меһманларға бәрди. Атақлиқ шаир, тәрҗиман «Ипәк йоли» нәшриятиниң мудири Бахытжан Қанапиянов, ҚХА Рәисиниң орунбасари, «Ирныхос» осетин этномәднийәт мәркизиниң рәиси Қазбек Мамсуров, философ-алим, ҚХА экспертлар комиссиясиниң рәиси Мухтарбек Шайкемелев, М.Әвезов намидики Әдәбият вә сәнъәт институтиниң йетәкчи хадимлири Альмира Қалиева, Гүлҗаһан Орда, Амангельды Муқан, Алма Тусупова, әдәбиятчи-тәрҗиманлар Шөмишбай Сариев, Ақыш Нурдәвлет, Любовь Шашкова, Римма Артемьева тәрҗимә саһасидики утуқ вә камчилиқлар һәққидә әтраплиқ тохталди. Белорусь әдәбиятиниң Қазақстан хәлқи тилиға тәрҗимә қилиш мәсилисидә қазақ, рус әдәбиятчилири билән бирқатарда уйғур язғучилириниңму әмгиги алаһидә тәкитләнди. Бу һәққидә филология пәнлириниң доктори, профессор Алимҗан Тиливалди әтраплиқ тохтилип өтти. У йеқинда язғучи вә тәрҗиман Әхмәтҗан Исрапиловниң белорусь язғучиси Алесь Карлюкевичниң балиларға беғишланған «Шубуршун вә униң достлири» әсәрини уйғур тилиға тәрҗимә қилғанлиғи һәққидә хәвәр қилди. Балилар қәлбидин чоңқур орун алғуси бу әсәр тилиниң раванлиғи билән тәрҗимә әсәрләр арисида жуқури баһаға егә болди. Кәчтә шундақла йеқинда Белорусь Әхбарат министрлиги тәрипидин Нобель мукапитиниң саһиби, улуқ шаир Р.Тагорниң дунияниң 49 тилида нәшир қилинған йеңи топлими тонуштурулди. Топламдики қазақчә вә уйғурчә тәрҗимиләр шаирлар Шөмишбай Сариев билән Әхмәтҗан Исрапиловниң қәлимигә мәнсүп. Әнҗуман ахирида кәч риясәтчиси өткән жили Белоруссиядә «Иҗаткар» әдәбий-публицистикилиқ, илмий-аммибап журналини тонуштуруш мәрасими болуп өткәнлигини тәкитләп, мәзкүр нәширниң тәсисчиси Әхмәтҗан Исрапиловқа журналдики тәрҗимә әсәрләр үчүн миннәтдарлиғини билдүрди. У шундақла уйғур язғучисини Белорусь Әхбарат министрлигиниң мошу әлгә зиярәткә тәклип қилғанлиғини йәткүзди. Хуршидәм ҺЕЗИМОВА. Алмута шәһири.