• 9-май – Ғалибийәт күни
• 06 Мамыр, 2019

Ветеранни йоқлиди

Гөһәрбүви ИСМАЙИЛҖАНОВА, «Уйғур авази» Панфилов наһийәси бойичә Улуқ Вәтән урушиға қатнашқан ветеранлардин һазир пәқәт иккисила һаят. Уларниң йеши тохсәндин ашсиму һели тимән, хатириси сағлам. Җәңчи атилар билән сөһбәтлишип қалсиңиз, дәрру көзлиригә яш алиду. Аридин 74 жил өтсиму, у күнләрни унтуш тәс. Яркәнтлик икки ветеранниң бири — Яқуп Данахунов Чоң Чиғанда яшайду. Биз билән болған сөһбәт башлинар-башланмайла у яшаңғирап қалған көзлирини қол яғлиғи билән сүртүп қойди. Әтималим, от билән оқниң арисида жүргән күнлири ядиға чүшсә керәк... — Бизниң теги-тәктимиз Уйғур наһийәсиниң Долата йезисидин, — дәп сөзини башлиди ақсақал. — Ата-анамдин кичик айрилип, житимчилиқниң дәрдини көп тарттим. Һәтта мәктәп дегәнниң ишигиниму ачмаптимән. Өзәмниң идригим бар охшайду, мәктәп көргән қурдашлирим билән жүрүп, анчә-мунчә сават ачқандәк болдумдә, йоқсизчилиқниң дәрди, тирикчиликниң ғеми билән болуп, етиз-ериқни маканлап жүрдуқ. Атисиз, анисиз қелип, бешимни сийпайдиған, маңа ғәмхорлуқ қилидиған һечким болмиди. Анам дадамниң аписи Селимхан момам билән кичик дадамниң Яркәнткә көчүп кәткәнлигини ейтип, «мүмкин болса, шуларни издәп тапқин» дәп җекәтти. Улуқ Вәтән уруши башланғанда он сәккиз жутдишим билән мәнму мәйданға атландим. Дәсләп Украинида алтә ай тәйярлиқ курсида оқуп, мәшғулатлар жүргүздуқ. Биз, йеза балилири, хәт тонумаймиз, шундиму алди билән қурал-ярақни етишни үгәтти. Я.Данахунов Литва, Эстония вә Белоруссияни азат қилиш үчүн шиддәтлик җәңләргә қатнашқанлиғини ейтип бәрди. Яқуп атиниң сағлам хатириси бизниң һәвәсимизни ойғитип, униңға болған һөрмитимизни ашурди. Шиддәтлик җәңләрниң биридә у қолидин яридар болуп, Челябинск шәһиридики госпитальда даваланған. Ғалибийәтни шу йәрдә қарши елип, 1946-жили өйигә қайтиду. Бу қетим у киндик қени төкүлгән Долатиға әмәс, бәлки Яркәнткә кетишни қарар қилиду. – Баһарниң худди мошундақ гүл чечәкләргә оранған күни еди. Яркәнткә кәлгән күнлиримни тил билән йәткүзүш әсла мүмкин әмәс. Бу йәрдә кичик дадам билән момам мени бағриға бесип қарши алди. Шуниңдин кейинла, мән яркәнтлик болуп қалдим, – дәп әсләйду ветеран. Яқуп Данахунов қолидики җараһәткә қаримастин, илгәрки «Октябрьниң 40 жиллиғи» намидики колхозда әмгәк қилди. У етиз-ериқ ишлириға арилишип кәтти. Ашлиқ тәрди, су тутти, һөрмәтлик дәм елишқа чиққичә бәрпакарлиқ әмгәк әтти. Яркәнтлик Зиләйбүви ана билән аилә қуруп, бир пәрзәнт сөйди. 1995-жили рәпиқисидин айрилған ата һазир қизи Гүлистан, күйоғли Һәмраҗанларниң қолида туриду. Улардин икки нәврә, алтә чәврә сөйди. Йеқинда наһийә һакими Темирлан Бектасов, «Нур Отан» партияси Панфилов наһийәлик шөбиси рәисиниң орунбасари Қанат Досмайилов, Чоң Чиған йеза округиниң һакими Мақсат Оспанбеков, униң орунбасари Реһанбүви Баратова, наһийәлик мәслиһәтниң депутати, Яркәнт оттура мәктивиниң мудири Мурат Әжибеков дәсләпкиләрдин болуп уруш ветеранини йоқлап, мәйрими билән тәбриклиди. Панфилов наһийәси. СҮРӘТТӘ: Чоң Чиған йеза округиниң рәһбәрлиги уруш ветераниниң һозурида.