- Йеңилиқлар
- 21 Қыркүйек, 2012
Павлодардики һәмкарлиқ форуми
19-сентябрь күни Павлодар шәһиридә Қазақстан Җумһурийити вә Россия Федерацияси рәһбәрлириниң қатнишиши билән ІХ Регионлар ара һәмкарлиқ форуми өтти.
Мәзкүр форум һарписида Павлодарға кәлгән Қазақстан Җумһурийитиниң Президенти Нурсултан Назарбаев индустриялик регионни арилап, вилайәт мәркизидики электролиз заводиниң йенида ечилған йеңи ишләпчиқириш орниниң ишчилири билән учрашти. Аллюминийни еритиш үчүн һаҗәт болған анод әнди Қазақстанда көйдүрүлиду.
Иҗтимаий объектларниму арилиған Президент регионлуқ жүрәк-қан томурлири хирургиялик мәркизидә болди. «Йеңи кардиохирургиялик мәркәзниң ечилиши — вилайәт үчүн чоң хошаллиқ. Биз медицинини тәрәққий әткүзүшкә алаһидә әһмийәт бериватимиз. Аниларниму, нәресидиләрниму давалашқа барлиқ шараит моҗут. Мошуларниң һәммиси аһалиниң саламәтлигини яхшилашқа қаритилған», деди Президент.
Нурсултан Назарбаев ІХ Регионлар ара һәмкарлиқ форумиға қатнишиш үчүн кәлгән Дөләт рәһбири Россия президенти Владимир Путин билән учришип, иккитәрәплимилик һәмкарлиқни техиму тәрәққий әткүзүш мәсилилирини муһакимә қилди. Атап ейтқанда, индустриялик-инновациялик вә регионлар ара тәрәққият, отун-энергетикилиқ комплекс саһасидики өз ара нәтиҗидарлиқ иш-һәрикәтләр мәсилилири тоғрилиқ сөз болди.
— Бүгүн биз йәнә икки дөләтниң ихтисадий-сода мунасивәтлирини мустәһкәмләшниң вә тәрәққий әткүзүшниң нәтиҗидарлиқ шәрти болуп һесаплинидиған регионлар ара һәмкарлиқ форумини өткүзүватимиз. Бу форум Қазақстан билән Россия арисидики инновациялик һәмкарлиқ мәсилилиригә беғишланған. Мошу күнләрдә Павлодарда 600дин ошуқ компания қатнашқан чоң йәрмәңкә өтүватиду. Шундақла умумий баһаси 2 миллиард долларни тәшкил қилидиған 27 шәртнаминиң имзалиниши күтүлмәктә, — деди Нурсултан Назарбаев.
Қазақстан Президенти шундақла бу форум башқа мәмликәтләр үчүн ихтисадий-сода бойичә һәмкарлиқниң ярқин үлгиси болуп һесаплинидиғанлиғини атап өтти. Өз новитидә Россия президенти Владимир Путин иккитәрәплимилик һәмкарлиқни тәрәққий әткүзүшкә вә уни мустәһкәмләшниң, шундақла чегаридаш регионларниң форумини өткүзүшниң әһмийитигә тохталди.
— Регионлар ара һәмкарлиқ бизниң мәмликәтлиримиз арисидики асасий иш-һәрикәтләрниң бири болуп һесаплиниду. Мәсилән, Россияниң 83 региониниң тәхминән 80гә йеқини Қазақстан билән мустәһкәм алақида болуп, товар айлиними дайим өсүп келиватиду. Бу чегара йенида туруватқан аһали үчүн наһайити әһмийәтлик. Сиз, Нурсултан Әбиш оғли, мошу форум тоғрилиқ тәшәббус көтәргән пәйттин башлап, у Бажхана иттипақи билән Бирпүтүн ихтисадий кәңликни қурушта әһмийәтлик роль атқурди, — деди Владимир Путин.
Қазақстан Җумһурийити билән Россия Федерацияси Президентлириниң қатнишиши билән өткән ІХ Регионлар ара һәмкарлиқ форуми мошу һәптиниң асасий вақиәсигә айланди. Форум даирисидә россиялик вә қазақстанлиқ идариләрниң, ишбиләрмән топлар вәкиллириниң қатнишиши билән бирқатар чарә-тәдбирләрниң өткүзүлүши икки мәқмликәтниң бир-биригә ихтисадий-сода һәмкарлиғи бойичә асасий шерикла әмәс, шундақла хошнидарчилиқ мунасивәтлири яхши йолға қоюлған дөләтләр екәнлигини ениқ көрсәтти.
563 рет
көрсетілді0
пікір
