• Йеңилиқлар
• 15 Мамыр, 2019

Депутат Әмгәкчиқазақ наһийәсигә кәлди

Йеқинда Қазақстан Җумһурийити Парламенти Мәҗлисиниң депутати Серик Үмбетов Әмгәкчиқазақ наһийәсигә қәдәм тәшрип қилип, наһийә «Ассорти ранчо» дәм елиш орни билән «Айдарбаев» чарвичилиғиниң паалийити билән тонушти. Рашидәм РӘҺМАНОВА, «Уйғур авази» Әң алди билән хәлиқ вәкили Топжан Жамалбеков рәһбәрлигидики Саймасай йеза округиға җайлашқан «Ассорти ранчо» дәм елиш орниға барди. Тиҗарәтчиниң ейтишичә, ранчониң ечилғиниға икки жил бопту. Униң тәркивигә сәккиз көл кириду. Икки жил ичидә 300 миллион тәңгә хәшлинип, йәттә коттедж селинған. Әтрапи тазилинип, йешилзарлиққа айланди. Тәвлүгигә 100 адәмни қобул қилиш имканийити бар. Қишта мәйдани 100 квадрат метрлиқ коттеджни иҗаригә елиш 10 000 тәңгә болса, язлиқлири униң баһаси 2-3 һәссигә көтирилиду. Эконом коттеджларму бар. Уларниң баһаси әрзәнирәк, әлвәттә. Дәм елишқа келип, белиқ олиғучилар үчүн көлләргә 200 000 белиқ кәлтүрүлүп, пәрвиш қилинмақта. Буниңдин башқа Т.Жамалбеков Уйғур наһийәсидә 300 гектар мәйданға абрикос, Әмгәкчиқазақ наһийәсидә 20 гектар мәйданға малина тикип, бағвәнчилик биләнму шуғуллиниду. Келәчәккә малининиң мәйданини 70 гектарға йәткүзүшни мәхсәт қилған тиҗарәтчи дөләттин 8 пайиз билән несийә алмақчи. Бу несийәниң пайизи төвән болуши билән башқиму йеникчиликлири бар. Мәсилән, несийәни қайтуруш икки жиллиқ дәм елиштин кейин башлиниду. Қошумчә несийә төләшниң кәштисини тиҗарәтчи имканийитигә қарап өзи бәлгүләйду. Депутатниң сәпири Саймасай йеза округидики «Айдарбаев» дехан егилигидә давамлашти. У буниңдин 10 жил илгири бәрпа болған. Башта егиликтә 10 сийир болған болса, дөләт программилириниң ярдими билән уларниң сани һазир 1000дин ашти. Күнигә 13 тонна сүт сеғилиду. 1 миллиард 200 миллион тәңгилик инвестиция җәлип қилиш арқилиқ 600 сийирға молҗаланған ферма селиниватиду. Егилик малниң озуғини өзи тәйярлайду. 2000 гектар йәрдә көмүқонақ вә соя пәрвиш қилиду. Буниңдин ташқири 500 гектар йәрдә помидор өстүриду. 600 гектар йәрдә шаптула вә алма бағлири бар. Ахирида Серик Үмбетов егиликләр паалийитидин көңли толғанлиғини билдүрүп, аһалиниң иҗтимаий әһвалиға тохталди. Униң тәкитлишичә, һазир елимиздә 31 миңға йеқин ана өй новитидә туриду. Бу мәсилини һәл қилиш үчүн дөләт тәрипидин 360 миллиард тәңгә бөлүнмәкчи. Әгәр бу иш қолға елинса, бәш жилниң ичидә нурғунлиған аилиләр өйлүк болиду. Әмгәкчиқазақ наһийәси.