• Сәнъәт
  • 30 Мамыр, 2019

“Арзу” Аватта концерт қойди

Рашидәм РӘҺМАНОВА, «Уйғур авази» Йеқинда Хәлиқара фестивальларниң лауреати, бийил қурулғиниға 60 жил болған Уйғур наһийәлик «Арзу» нахша-уссул хәлиқ ансамбли Әмгәкчиқазақ наһийәсиниң Челәк, Байсейит, Маливай һәм Ават йезилирида гастрольда болуп, сәнъәтхумар тамашибинни бәһримән қилди. Ансамбльниң тарихиға қисқичә тохталсақ, у 1959-жили Уйғур наһийәсиниң Чоң Ақсу йезисидики «Әмгәк» колхозида һәвәскарлар өмиги ретидә қурулуп, ансамбль қисқа вақитниң ичидила наһийә һәм Алмута вилайити даирисидә өз һүнирини намайиш қилди. Москва шәһиридә өткән пүткүлиттипақлиқ әмгәкчиләр сәнъәт фестивалида Польшида өткән хәлиқара көрүктә мукапатлиқ орунға еришип, 1962-жили “хәлиқ ансамбли» дегән мәртивисини алди. Атап кетиш керәкки, бу йәрдә ансамбльниң шу вақиттики рәһбири, Өзбәкстанниң хизмәт көрсәткән артисти Султанмурат Рәзәмовниң әҗри көп болди. Әлвәттә, һәрқандақ сәнъәткарниң һәртәрәплимә паалийәт елип бериши үчүн униңға маддий вә мәнивий ярдәм һаҗәт. 1974-жили ансамбль Уйғур наһийәлик партия комитетиниң биринчи кативи Һашим Арзиевниң қоллап-қувәтлиши билән қайта тәшкилләнди. Шундақла ансамбльға исми көпчиликкә яхши мәлум рәһбәр Ғупа Абдуманаповму алаһидә ғәмхорлуқ көрсәтти. Әнди униң репертуариниң йеңилинишида мәрһум музыкант, академик Азитим Бурһановниң әмгиги һәм үлүши зор болди. Униңға һәр жилларда Шамахун Нурумов, Юнус Имиров, Сәйдалим Амутов, Ульян Қурбанниязов, Халимәм Шаваева рәһбәрлик қилди. 1985 –1988-жиллар арилиғида «Арзу» хәлиқ талантлириниң пүткүлиттипақлиқ фестивалиға қатнишип, икки мәртә «Кичик алтун» медали билән мукапатланди. Ейтмақчи, әмгәкчиқазақлиқ қериндашлар үчүн «Арзу» ансамбли интайин мәзмунлуқ концерт тәйярлап кәпту. Ават Мәдәнийәт өйидә өткән концертни ансамбль «Өзһал» муқами сәними» билән ечип, бирдинла тамашибинларниң гүлдирас алқишиға сазавәр болди. Тәкитләш лазимки, 60 жиллиқ тәвәллудини нишанлаватқан ансамбль тәрәққиятиға 40 жилдин ошуқ һаятини сәрип қилип, талай сәнъәткарларни тәрбийилигән Уйғур наһийәсиниң Пәхрий граждини, нахшичи һәм муқамчи Қасимҗан Мухтәров, шундақла узун жиллар мабайнида ансамбльниң иҗадий риваҗлинишиға давамлиқ үлүш қошуп келиватқан талантлиқ нахшичи Светлана Қурбанниязова орунлиған нахшиларниму тамашибинлар давамлиқ алқишлири билән қарши алди. Ансамбльниң башқиму сәнъәткарлири тәрипидин иҗра қилинған нахша-саз, әвришим уссуллар, «Лотерея билети» вә «Тойдики сазәндиләр» миниатюрилири өз дәриҗидә орунлинип, әмгәкчиқазақлиқ тамашибинларға жуқури кәйпият беғишлап, хошаллиқ дәмлиридин бәһирлиниш имканийитини яратти. Концерт ахирида ансамбльниң рәһбири Гүлмира Мәхпирова йеза-йезилардин кәлгән меһманларға миннәтдарлиқ изһар қилса, җәмийәтлик ишларниң активисти Үсәнҗан Абдрахманов, ушбу ансамбльниң сабиқ рәһбири, Азат толуқсиз оттура мәктивиниң пешқәдәм устази Юнус Имиров вә Ават Мәдәнийәт өйиниң мудири Долқунҗан Розахунов «Арзуниң» гастрольлуқ концертиға жуқури баһа берип, сәнъәткарларға иҗадий утуқ тилиди. Әмгәкчиқазақ наһийәси.

91 рет

көрсетілді

0

пікір
Алдыңғы мақала Һәммини тәбәссүм әйләткән «Тәбәссүм»
Келесі мақала «Аманнисаханниң» Узунағаштиму «қизлири» бар

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

13 Қаңтар, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы