• Йеңилиқлар
• 05 Маусым, 2019

Яш математиклар бәйгигә чүшти

Мәшүр САСИҚОВ, «Уйғур авази» Йеқинда җәнубий пайтәхттики «Достлуқ өйидә» оқутуш уйғур тилида жүргүзүлидиған мәктәпләрдә математика пәнини онлайн билим бериш арқилиқ өзләштүрүш бойичә тонуштуруш мәрасими болуп өтти. Мошу жилниң январь ейидин башланған мәзкүр оқутуш системиси бойичә Талғир наһийәсиниң Бесағаш йезисидики 29-оттура мәктәпниң уйғур синипида оқуватқан оқуғучилар 100гә йеқин дәрис елип, 600дин ошуқ һесап чиқарди. Уларниң арисидин таллавелинған, йәни лайиһә тәләплиригә мувапиқ, бәлгүләнгән сайтларға тиркилип, у йәрдин өзлиригә пайдилиқ мәлуматларни елишқа мувәппәқ болған 20гә йеқин әлачи оқуғучи у күни онлайн системиси бойичә емтиһан тапшурди. Тәнтәниниң модератори, Алмута шәһәрлик Уйғур этномәдәнийәт мәркизи рәисиниң орунбасари Маһинур Исрайилова бүгүнки чарә-тәдбирниң асасий мәхсәт-муддиасини көпчиликкә чүшәндүргәндин кейин сөз новитини Алмута шәһәрлик Уйғур этномәдәнийәт мәркизиниң рәиси Һосманҗан Обулов вә Уйғур мәктивини қоллаш фондиниң рәиси, филология пәнлириниң доктори Алимҗан Тиливалди уйғур маарип саһасиға бүгүнки технологияләрдин пайдилинип, йеңилиқ киргүзүш, йәни онлайн системиси арқилиқ оқуғучиларниң билим дәриҗисини ениқлашниң пайдилиқ тәрәплиригә тохталди. Мәрасим давамида Бесағаш йезисидики 29-оттура мәктәпниң математика пәниниң муәллими Арзигүл Иманқулиева доклад оқуп, чоң экранда лайиһини әтраплиқ тонуштурди. Емтиһан нәтиҗиси бойичә 8-синип оқуғучиси Назугум Закирова ғалип чиқса, Шахсәнәм Исмайил билән Аминәм Ниязова ІІ вә ІІІ орунларға еришти. Мукапатлиқ орунлар егилири мәрасим уюштурғучилири билән һамийларниң мәхсус мукапатлириға сазавәр болди. Әнди емтиһанға қатнашқан қалған балиларға Алмута шәһәрлик Уйғур этномәдәнийәт мәркизиниң әзалири билән Бесағаш йезисиниң җамаәтчилик ишлириниң активистлири өзлириниң соғилирини тапшурди. Бу күни нахша-сазларғиму орун берилип, асасән гөдәкләрдин тәркип тапқан «Интизар» уссул топи көпчиликкә арамбәхш дәмләрни һәдийә қилди.