• Яшлар жили
• 25 Шілде, 2019

Мәхситигә йәткән Меһриниса

Бийил Яшлар жили. Бу жил мениң үчүнму әстин чиқмас, мәңгү унтулмас бир жил болди. Сәвәви, мән елимизниң Тунҗа Президенти-Елбасы Нурсултан Әбиш оғли Назарбаев билән учришип, униң қолини тутуп рәсимгә чүштүм, – дәйду хошаллиғи қин-қиниға патмиған Д.Асфендияров намидики Қазақ Миллий медицина университетиниң ІІІ курс студенти Меһриниса Нуриева. Сабирәм ӘНВӘРОВА, “Уйғур авази” Бийил Нурсултан Әбиш оғли Назарбаев келәчәк әвлатқа беғишлап Алмутидики Қазақстан-Британ техникилиқ университети бенасиниң алдидики аллеягә «вақит капсулисини» орнитиш мәрасимиға иштрақ қилди. Алий оқуш орунлириниң үлгүлүк студентлири қатнашқан мәзкүр тарихий вақиә гувачилириниң арисида Меһриниса Нуриеваму бар. «Вақит капсулисиниң» ичигә Н.Ә.Назарбаевниң келәчәк әвлатқа йезип қалдурған мураҗиити селинди вә у 2049-жилниң 22-июнь күни оқулидиған болиду, – дәйду Меһриниса. – Тунҗа Президентимиз-Елбасы Нурсултан Әбиш оғли Назарбаев билән учришип, униң яшларға ейтқан несиһитини тиңшаш мениң үчүн чоң бәхит. Тунҗа Президентимиз яшлардин зор үмүт күтидиғанлиғини ейтти. Әлвәттә, бизму қазақстанлиқ яшлар намидин Тунҗа Президентимизға өз миннәтдарлиғимизни йәткүздуқ. Меһриниса Нуриева №4-Чонҗа оттура мәктивини 2017-жили «Алтун бәлгүгә» тамамлап, Миллий биртуташ тесттин 103 балл елип, С.Д.Асфендияров намидики Қазақ Миллий медицина университетиға грантқа оқушқа чүшти. Мәзкүр билим дәргаһида билими вә тиришчанлиғи билән көзгә чүшкән Меһриниса оқуш орни рәһбәрлигидин көплигән тәшәккүрнамиләр билән тәғдирләнгән. Униң Тунҗа Президентимиз билән учришип, тарихий әһмийити муһим чаригә қатнишишиму тәсадипи әмәс.