• Йеңилиқлар
• 01 Тамыз, 2019

Қазақстанлиқ үлгә жилнамиси

Пайтәхттә Қазақстан Җумһурийитиниң Тунҗа Президенти Нурсултан Назарбаевниң Қазақстан хәлқиниң бирлигини тәминләш бойичә паалийитигә беғишланған “Елбасы вә хәлиқ” китави тонуштурулди. Китапни Қазақстан хәлқи Ассамблеяси чиқарди. Униң мәхсити җәмийәтлик разимәнлик вә умуммиллий бирликниң Қазақстан үлгисиниң қандақ шәкиләнгәнлигини, күчәйгәнлигини вә мукәммәлләштүрүлгәнлигини көрситиштин ибарәт. Нурсултан Назарбаевниң 1995-жилдин тартип 2019-жилғичә ҚХА сессиялиридики нутқи 360 бәтлик нәширниң нурғун қисмини егиләйду вә униң “жүриги” болуп һесаплиниду. Чүнки нәқ мошу чарә-тәдбирләрдә Тунҗа Президент һәр қачан мәмликәт хәлқини умумқазақстанлиқ гражданлиқ бирликни шәкилләндүрүшкә, җипсилаштурушқа, җәмийәттә течлиқ вә разимәнликни сақлашқа нишан қилинған йеңи идеяләр билән сөзгә чиқип, әһмийәтлик тәшәббусларни оттуриға қойған еди. Китапниң башқа қисимлириға Елбасыниң сәпдашлири, ҚХА әзалири, этномәдәнийәт бирләшмилириниң рәһбәрлири униң тоғрилиқ язған материаллар орунлаштурулған. Бу йәрдә Тунҗа Президентниң һәм милләтләрара мунасивәтләр саһасидики паалийитини вә униң сәяситини тәһлил қилидиған мақалилар, һәм Нурсултан Назарбаев Дөләт рәһбири вакалитини сақит қилғандин кейин пәйда болған миннәтдарлиқ сөзлири вә хатириләр йезилған шәхсий мәтинләр бар. Шундақла нәшир түрлүк жилларда чүширилип, китапниң намини ачидиған нурғунлиған фотосүрәтләр билән толуқтурулған. Қазақстан хәлқи Ассамблеясиниң йеңи нәширни тонуштуруш мәрасими Қазақстан Җумһурийитиниң Тунҗа Президенти – Елбасы китапханисида өтти. Чарә-тәдбиргә ҚХА Рәисиниң орунбасари – Президент Мәмурийити Қазақстан хәлқи Ассамблеяси Кативатиниң мудири Жансейит Түймебаев, Қазақстан Җумһурийити Парламенти Мәҗлиси рәисиниң орунбасари Владимир Божко, мәдәнийәт вә спорт министри Ақтоты Райимқулова, язғучи Мырзатай Жолдасбеков, ҚХА Рәисиниң орунбасари Шерзод Пулатов, Елбасы Китапханиси мудириниң орунбасари Күләйша Ақтаева вә башқиму нурғунлиған дөләт вә җәмийәт әрбаплири, алимлар қатнашти. Жансейит Түймебаев “Елбасы вә хәлиқ” китавини тәһлил қилип, уни “җәмийәтлик разимәнлик вә умуммиллий бирликниң қазақстанлиқ үлгиниң шәкиллинишиниң, мустәһкәмлинишиниң вә тәрәққий етишиниң тәпсилий жилнамиси” дәп атиди. – Течлиқ вә разимәнлик әң баштин тартипла пүткүл дөләт сәяситиниң асасини тәшкил қилди, иҗтимаий-ихтисадий вә сәясий ислаһатларни әмәлгә ашурушниң шәрти болди. Шуни тәкитлигүм келидуки, ҚХАниң қурулуши өзлигидин мәмликәт тарихидики муһим турақлаштурғучи амил болди, – дәп тәкитлиди ҚХА Рәисиниң орунбасари. У китапта ҚХАниң консультатив-мәслиһәт оргинидин умуммиллий диалог мәйданиға айланғанлиғиниң, мәмликәт тәрәққиятиниң һәрбир йеңи басқучида Ассамблея вәзипилириниң өзгирип, униң ролиниң өскәнлигиниң, мошу муһим қурулумниң изчил тәрәққий әткәнлигиниң очуқ көрситилгәнлигигә диққәт ағдурди. Йеңи китап шундақла Нурсултан Назарбаевниң течлиқ вә разимәнликниң қазақстанлиқ үлгини шәкилләндүрүш бойичә әмәлгә ашурған чоң нәзәрийәвий ишини намайиш қилиду. Жансейит Түймебаев шундақла Елбасы докладлириниң һәр қачан ениқ болғанлиғини, әнди бирлик вә разимәнликни мустәһкәмләш мәсилилириниң уларда умуммиллий қурулуш вәзипилири билән бағлаштурулғанлиғини атап көрсәтти. – Китап көрнәклик сәясәтчиләрниң, экспертларниң, Қазақстан хәлқи Ассамблеяси әзалириниң, этномәдәнийәт бирләшмилири рәһбәрлириниң изаһәтлири билән толуқтурулған. Бу нәширни бүгүнки күнниң муһим вәзипилиригә толуқ йеқинлаштуриду, – дәп қошумчә қилди ҚХА Рәисиниң орунбасари. “Елбасы вә хәлиқ” китавини тонуштуруш мәрасимида шундақла мәдәнийәт вә спорт министри Ақтоты Райимқулова, Қазақстан Җумһурийити Парламенти Мәҗлиси рәисиниң орунбасари Владимир Божко сөзгә чиқип, йеңи китапниң мәмликитимиздә ҚХА охшаш институтниң пәйда болуш сәвәплири билән шәртлирини үгиниш қуралиға айлинидиғанлиғини тәкитлиди.