• Йеңилиқлар
• 03 Қазан, 2019

Альтернатив энергетика саһасидики һәмкарлиқ

Әл-Фараби намидики Қазақ миллий дөләт университети вә Һиндстанниң RefexGroup ширкити әслигә кәлтүрүлидиған энергия мәнбәлири саһасидики һәмкарлиқ тоғрилиқ меморандумға қол қойди. Тәкитләш лазимки, университет – альтернатив энергия мәнбәлирини киргүзүш стратегиясини паал тәрәққий әткүзүватқан БМТниң турақлиқ тәрәққият бойичә хаби. Шуңлашқа бу йөнилиш алий оқуш орниниң асасий тәрәққият йоли болуп һесаплиниду. «Бизниң университетниң базисида әслигә кәлтүрүлидиған энергия мәнбәлириниң йеңи түрлирини киргүзүш уларниң келәчәктә тәрғибат қилишниң әҗайип орни болиду. Университетта йеңи энергия мәнбәлирини көрситиш мәркизини ечиш арқилиқ, биз тәҗрибилиримизни Қазақстанға, Мәркизий Азия вә Евразия кәңлигидә тарқитиш имканийитигә егә болимиз», деди ҚазМУ ректори Ғалым Мутанов учришишта. Өз новитидә RefexGroup щиркитиниң иҗраий мудири Раджагопалан Шайлеш университетниң инновациялик технологияләр саһасида чоң утуқларға йәткәнлигини алаһидә тәкитлиди. «Биз университетниң имканийәтлирини көрдуқ, илмий лабораторияни, технопаркни зиярәт қилдуқ. «Студентлар шәһәрчиси» беналириниң чедирлирида қуяш батареялирини орнитишни башлидуқ. Биз бу йөнилишни Һиндстанда тәрәққий әткүзүватимиз. Һазир болса, башқиму әлләр кәң даиридә давамлаштуруватимиз», деди иҗраий мудир. Қошумчә қилсақ, RefexGroup ширкити қуяш энергиясини тәрәққий әткүзүш билән шуғуллиниду вә Һиндстанда экологиялик таза энергия мәнбәлирини тәвсийә қилип келиватиду. Мәзкүр ширкәт Һиндстандики үч әң яхши куяш электростанцияни салған. Роза ЕРЕЖЕПҚЫЗЫ, ҚазМУ әдлийә факультетиниң оқутқучиси.