• Йеңилиқлар
• 10 Қазан, 2019

Үнүмлүк диалог

“Валдай” муназирә клубиниң мәҗлисигә қатнишиш үчүн Сочиға кәлгән Қазақстан Президенти Қасым-Жомарт Тоқаев Россия Президенти Владимир Путин билән учрашти. Владимир Путин Қазақстан рәһбиригә илтипат билдүрүп, Россиядә униң “Валдай” клубиниң ишиға қатнишиватқанлиғиға чоң әһмийәт бериливатқанлиғини тәкитлиди. – Сизгә хәлиқара “Валдай” клубиниң муназирилиригә қатнишиш тәкливини қобул қилғанлиғиңиз үчүн миннәтдарлиқ билдүргүм келиду. Биз үчүн дипломатик хизмәттә узақ ишлигән адәм сүпитидә Сизниң пикриңизни тиңшаш наһайити қизиқарлиқтур. Бу җәһәттин Сиз наһайити тәҗрибилик адәм. Сизниң хәлиқара мәйдандики, бехәтәрлик саһасидики бүгүнки әһвалға беридиған баһариңиз биз үчүн наһайити пайдилиқ вә қизиқтур, – деди Россия рәһбири. Владимир Путин ЕАИИ даирисидә бирликтә паал ишниң елип бериливатқанлиғини тәкитлиди. У шундақла мәзкүр бирләшмини техиму тәрәққий әткүзүш бойичә қарарлар қобул қилинғанда, надир ишәнчә дәриҗисиниң қолға кәлтүрүлгәнлигини атап көрсәтти. Россия Президентиниң сөзичә, мәмликәтлиримиз оттурисидики диалогму үнүмлүк тәрәққий етиватиду. Қасым-Жомарт Тоқаев Россия Президентиға Сочиға тәклип қилғанлиғи үчүн миннәтдарлиқ билдүрди. Униң пикричә, “Валдай” муназирә клуби – наһайити қизиқарлиқ форум. Президент шундақла россиялик кәсипдишиға Ғалибийәтниң 75 жиллиғини нишанлашқа тәклип қилғанлиғи үчүн миннәтдарлиқ билдүрди. Қасым-Жомарт Тоқаев алдики юбилейлиқ күнләрдә Москвани зиярәт қилиш нийитини тәстиқлиди. – Мән урушқа қатнашқан адәмниң балиси. Йеқинда Иваново вилайитидә Улуқ Вәтән уруши вақтида һалак болған 73 қазақстанлиқ җәңчи дәпин қилинған җай тепилди. Әлвәттә, биз Қазақстанда Улуқ Ғалибийәт үчүн һаятини бәргән җәңчиләрниң хатирисигә баш егимиз, – деди Қасым-Жомарт Тоқаев. Дөләт рәһбири Қазақстан-Россия һәмкарлиғида Қазақстанниң Тунҗа Президенти Нурсултан Назарбаев қолға кәлтүрүлгән сүръәт вә мәзмунниң сақлиниватқанлиғини тәкитлиди. – Өзара һәрикәтни йеңи мәзмун билән бейитишла қеливатиду, чүнки һаят бир йәрдә тохтап турмайду вә, әлвәттә, пәйда болуватқан мәсилиләрни һәл қилиш зөрүр. Мән бу ишқа тәйяр. Стратегиялик шериклик вә иттипақдашлиқни йеңи дәриҗигә көтиримиз, дәп ойлаймән, – деди Қазақстан рәһбири. Қасым-Жомарт Тоқаев шундақла Евразия ихтисадий иттипақи даирисидики интеграциялик җәриянлар бойичә өзара чүшәнчиниң жуқури дәриҗидә екәнлигини тәкитлиди.