• Йеңилиқлар
• 23 Қазан, 2019

Җинайәтчилик көрсәткүчи төвәнләватиду

Алмута шәһири полиция департаментиниң башлиғи генерал-майор Серик Күдебаевниң сөзичә, кейинки үч жилда еғир вә алаһидә еғир җинайәтләрниң сани 34,9 пайизға, оғрилиқлар 23 пайизға, қарақчилиқ һуҗумлар 18,9 пайизға, бузғунчилиқлар 64 пайизға, мүлүк оғрилаш 11,5 пайизға, зорлуқ-зомбилиқ 25,3 пайизға, тамагәрлик икки һәссигә, наркотик вә нәшихорлуққа бағлиқ җинайәтләр 2,1 һәссигә төвәнлиди. Шуниң билән бир вақитта мәзкүр йөнилишләр бойичә җинайәтчиликни паш қилиш әһвалиму яхшиланди. Бу шәһәр миқиясида көрүлгән тәшкилий вә әмәлий чариләрниң нәтиҗиси. Алмута шәһири һакиминиң көрсәтмисигә мувапиқ, департамент хизмәтлири икки сменида пиядә жүридиған полиция патрульлириниң ишини уюштурди. Шәһәрниң җинайәтчилик көп йүз беридиған 67 участкисиниң әтрапидики қора вә һойлилар полиция хизмәтчилириниң толуқ назарити астида болиду. Пиядә жүридиған патруль полициясиниң һәрбир маршрути үчүн айрим характеристика, вәзипә-план, маршрут-схемиси, шундақла криминогенлиқ җайларниң орни ишлинип чиқти вә һәр күни пиядә жүридиған патруль полициясиниң хизмити назарәт қилинип туриду. Шуниң билән бир вақитта полиция рәһбәрлиги җәмийәтлик орунларда станционарлиқ полиция постлириниң орнитилғанлиғини хәвәр қилди. “Барлиғи болуп 32 станционарлиқ полиция пости орнитилиду. Бу һәрбир наһийәгә төрттин келиду дегән сөз. Шуни тәкитләш керәкки, мәзкүр пунктлар ихчам, қолайлиқ һәм йоруқ. Һаҗәт болған әһвалда уларни дәрһал башқа җайларға көчиришкә болиду. Мошу мәхсәттә оператив вәзийәтни турақлиқ тәһлил қилип туруш көздә тутулған. Полиция пунктлири кечә- күндүз ишләйду: күндүзи бу йәрләрдә участкилиқ инспекторлар ишлисә, кечилири патруль полициялири хизмитини атқуриду”, дәп тәкитлиди Серик Күдебаев.