• Йеңилиқлар
• 23 Қазан, 2019

Классик язғучиға һөрмәт билдүрүлди

Абай намидики Дөләт опера вә балет театрида көрнәклик язғучи, заманивий қазақ әдәбиятиниң классиги Әбдижәмил Нурпейисовниң 95 яшқа толушиға мунасивәтлик тәнтәнилик мәрасим болуп өтти. Дәсләпкиләрдин болуп язғучини шанлиқ сәнәси билән Қазақстан Җумһурийитиниң дөләт кативи Қырымбек Көшербаев тәбриклиди. Дөләт кативи иҗаткарни шанлиқ тәвәллуди билән тәбрикләп, униң өз әсәрлири арқилиқ дуния китап мухлислири арисида шан-шөһрәткә егә болғанлиғини алаһидә тәкитлиди вә Президент Қасым-Жомарт Тоқаевниң тәвәллуд егисигә йоллиған тәбригини оқуп бәрди. Қасым-Жомарт Тоқаевниң тәбригидә Әбдижәмил Нурпейисовниң елимиз әдәбияти вә мәдәнийитиниң риваҗлинишиға чоң һәссә қошқанлиғи алаһидә қәйт қилиниду. – Сизниң өлмәс әсәрлириңиздә һәммини тәшвишләндүрүватқан Арал проблемиси өз әксини тапти. Сиз хәлқиңизниң арзу-арманлирини пүткүл инсанийәткә йәткүзәлидиңиз вә китапханларниң чәксиз муһәббитигә ериштиңиз, – дәп тәкитлиниду Дөләт рәһбириниң Тәбригидә. Андин кейин москвалиқ меһман – филология пәнлириниң доктори, әдәбиятшунас Николай Анастасьев, көрнәклик сәясий әрбап Қуаныш Султанов, Қазақстан Җумһурийитиниң мәдәнийәт вә спорт министри Ақтоты Райимқулова, Алмута шәһириниң һакими Бақытжан Сағынтаев, язғучи Елубай Смағулов, көрнәклик язғучи вә тәрҗиман Анатолий Ким тәвәллуд егисини шанлиқ мәйрими билән сәмимий тәбриклиди. Тәкитләш керәкки, талант вә маһаритини Голсуорси, Фолькнер, Толстой вә Шолохов охшаш сөз зәргарлири билән селиштуридиған, қисқиси, өзлирини әдипниң өлмәс әсәрлириниң мухлислири һесаплайдиған көплигән җәмийәт вә сәясий әрбаплири, иҗадий зиялилар, яшлар вәкиллири тәбриклиди. – Һәммиңларға маңа муһәббитиңларни изһар қилип, һөрмәт билдүргәнлигиңлар үчүн чоң рәхмәт, чүнки мән өз китаплиримни силәр үчүн язған. Яратқучи һәрбиримизни оюн-тамашә үчүн әмәс, бәлки әмгәк вә бәрпакарлиқ үчүн яратқан. Мән Яратқучиниң үмүтини бираз болсиму ақлидим, дәп һесаплаймән, – деди мәрасим ахирида Әбдижәлил Нурпейисов.