• Йеңилиқлар
• 06 Қараша, 2019

Макан-җайи тоғрилиқ ениқлима әмәлдин қалдурулди

Мошу айдин башлап мәмликәттә әң тәләп қилиниватқан рәсмийәт – макан-җайи тоғрилиқ ениқлима – әмәлдин қалдурулди. Башқичә ейтқанда, 1-ноябрьдин етиварән макан-җайи тоғрилиқ ениқлима дөләт хизмити реестридин чиқирилди. Буниңдин кейин ишқа орунлашқанда, медицина мәһкимилириниң, мәктәпләр билән балилар бағчилириниң, умумән, көп чағларда “һәр һалдиниң” орниға ениқлима сорайдиған башқиму нурғунлиған тәшкилатларниң тәливини орунлаш үчүн аһалиға хизмәт қилиш мәркәзлиригә мураҗиәт қилишниң һаҗити йоқ. Чүнки жуқурида аталған дөләт мәһкимилири билән тәшкилатлириниң әхбарат системиси Ички ишлар министрлигиниң мәлумат базиси билән бирләштүрүлгәнликтин, улар мундақ әхбаратни шулардин елиш имканийитигә егә болди. – Һазир мәмликәттә адрес вә турушлуқ җай чүшәнчиси тамамән өзгириватиду, уларни буниңдин кейин һәр қәдәмдә испатлаш-дәлилләш тәләп қилинмайду, – дәп тәкитлиди Һөкүмәттә болуп өткән мәтбуат конференциясидә Қазақстан Җумһурийити рәқәмлик тәрәққият, инновацияләр вә аэрокосмос санаити министриниң орунбасари Аблайхан Оспанов. Медицина вә оқуш орунлириға кәлсәк, уларму мәмликәтниң саламәтликни сақлаш вә билим бериш министрликлириниң әхбарат системилири билән бирләштүрүлгән. Министр орунбасариниң тәкитлишичә, һәр жили түрлүк тәшкилатларға көрситиш үчүн 20 миллиондин ошуқ түрлүк ениқлима бесип чиқирилидекән. Бийил қазақстанлиқларға пәқәт макан-җайи тоғрилиқла 9 миллион ениқлима берилипту. Аблайхан Оспановниң тәкитлишичә, келәр жилдин тартип башқиму ениқлимиларни пәйдин-пәй күчидин қалдуруш көздә тутулуватиду. Буниң үчүн әхбарат системилирини бирләштүрүш бойичә барлиқ зөрүр ишларни аяқлаштуруш керәк. – Зөрүр болған әһвалда қазақстанлиқлар өзлириниң қәйәргә тиркәлгәнлигини электронлуқ һөкүмәтниң egov.kz порталида яки eGov mobile қошумчиси арқилиқ тәкшүрәләйду, – дәп чүшәндүрди министрниң орунбасари. Шуниң билән бирқатарда Ички ишлар министрлиги Миграция хизмити комитети рәисиниң орунбасари Галина Сәрсенованиң тәкитлишичә, чегариға йеқин территорияләрниң турғунлири турушлуқ җайи бойичә ройхәткә елинғанлиғини тәстиқлиши керәк. Мундақ тәләп Россия вә Қазақстан оттурисидики тегишлик келишимләр даирисидә келишилгән вә у хошна дөләт билән болған чегара йенидики аһалилиқ пунктларда күчкә егә болиду. Әйнә шуниңға бағлиқ әмәлдики қанунға йеза округлири һакимлириға макан-җайи тоғрилиқ ениқлима бериш вәзиписини жүкләш көздә тутулған мәлум өзгиришләр киргүзүлиду. Чегариға йеқин аһалилиқ пунктларниң турғунлири әгәр Интернеттин пайдилиниш имканийитигә егә болса, электронлуқ һөкүмәтниң egov.kz порталидин ениқлима алалайду. У яки бу хадимниң нопуси тоғрилиқ әхбарат лазим болған дөләтлик әмәс тәшкилатларға, җүмлидин шәхсий компанияләргә кәлсәк, уларниң вәкиллири электронлуқ һөкүмәтниң шу порталида үчинчи шәхс хизмитиниң ярдими арқилиқ ениқлима алалайду. Буниң үчүн үчинчи шәхс SMS арқилиқ нопус тоғрилиқ бир қетимлиқ мәлумат елишқа разилиқ бәрсила купайидур.