• Яшлар жили
• 20 Қараша, 2019

«Тил — достлуқниң алтун көрүги»

Йеқинда Нур-Султан шәһиридики «Достлуқ өйидә» «Рухани жаңғыру» программиси вә “Яшлар жили” даирисидә Қазақстан хәлқи Ассамблеясиниң уюштуруши билән «Тил — достлуқниң алтун көрүги» намлиқ конкурс өтти. Мәзкүр конкурсниң асасий мәхсити – дөләт тилини үгинишни, қазақстанлиқ вәтәнпәрвәрликкә тәрбийиләш вә дөләт тилиниң мәртивисини, әһмийитини тәшвиқат қилиштур. Конкурста Нур-Султан шәһәрлик Уйғур этномәдәнийәт мәркизиниң, «Жайхун» Қарақалпақ этномәдәнийәт бирләшмисиниң, «Радима» Беларусь мәдәнийәт мәркизиниң, «Оберег» Украин җәмийитиниң, «Polacy» жәмийәтлик бирләшмисиниң, «Юнчи» Туңган этномәдәнийәт мәркизиниң вә Нур-Султан шәһәрлик Өзбәк этномәдәнийәт мәркизиниң вәкиллири күч синашти. Қаидә бойичә, конкурс үч басқучтин ибарәт болуп, униңда қатнашқучилар дөләт тилини қанчилик дәриҗидә билидиғанлиғини намайиш қилди. Ахирқи басқучта Нур-Султан шәһәрлик Уйғур этномәдәнийәт мәркизидин Розалина Махмудова, «Жайхун» Қарақалпақ этномәдәнийәт бирләшмисидин Айсанем Айимбетова, «Радима» Беларусь мәдәнийәт мәркизидин Светлана Тарасова, «Оберег» Украин жәмийитидин Юлия Лагуткина, «Polacy» җәмийәтлик бирләшмисидин Мария Жуликова, «Юнчи» Туңган этномәдәнийәт мәркизидин Залина Ибрагимова вә Нур-Султан шәһәрлик Өзбәк этномәдәнийәт мәркизидин Дильдора Абдулхаева қазақ классик әдәбиятиниң вә заманивий шаир-язғучилириниң әсәрлирини ипадилик оқуп бәрди. Конкурс йәкүни бойичә, биринчи орунни Нур-Султан шәһәрлик Уйғур этномәдәнийәт мәркизи, иккинчи орунни «Polacy» җәмийәтлик бирләшмиси, үчинчи орунни болса, «Юнчи» Туңган этномәдәнийәт мәркизи егилиди. Қошумчә қилсақ, Нур-Султан шәһәрлик Уйғур этномәдәнийәт мәркизи вәкиллири Розалина Махмудова, Аружан Арзидинқизи, Ислам Ниязов вә Балнур Йолдашқизи дөләт тилини яхши билидиғанлиғини намайиш қилип, утуққа йәтти. — Йеңи тилни билгиниң өз бөлмәңгә йеңи деризә орнатқан билән баравәр, — деди конкурсниң йәкүнини чиқарған Нур-Султан шәһәрлик ҚХА шөбиси кеңишиниң әзаси Амангелди Сыздықов. — Мәзкүр конкурс пайтәхтимиз яшлириниң паалийәтчанлиғини, уларниң дөләт тилиға болған һөрмитини көрсәтти. Дөләт тилини билиш – һәрбир қазақстанлиқ муқәддәс пәрзи. Мошундақ конкурсларни уюштуруш буниңдин кейинму давамлишиду дәп ойлаймән. Конкурс ахирида ғалип чиққанларға Тәшәккүрнамиләр билән маддий соғилар тапшурулди. Наргиза МАХМУДОВА. Нур-Султан шәһири.