• Йеңилиқлар
• 20 Қараша, 2019

Пайтәхттә вәтәнпәрвәрлик нахшилар фестивали өтти

Өткән һәптидә елимиз пайтәхтидә Қазақстан хәлқи Ассамблеяси Нур-Султан шәһәрлик шөбисиниң уюштуруши билән «Алтын күн» вәтәнпәрвәрлик нахшилар жанрида орунлинидиған нахшиларниң ІІ балилар фестивали өтти. Бийил елимиздә елан қилинған «Яшлар жили» даирисидә өткүзүлүватқан мәзкүр фестивальниң асасий мәхсити — қабилийәтлик яшларни қоллаш, уларниң иҗадийитини риваҗландуруш, яшларни вәтәнпәрвәрлик роһта, шәхстә гражданлиқ сүпәтләрни тәрбийиләштин ибарәт. Фестивальни киришмә сөз билән ачқан ҚХА Нур-Султан шәһәрлик шөбиси кативатиниң рәһбири Ләззәт Қусаинова фестивальниң мәхсити вә әһмийитини тәкитләп, қатнашқучиларға утуқлар тилиди. Фестивальға пайтәхттики миллий мәдәнийәт мәркәзлириниң иҗадий коллективлириниң вәкиллири, мәктәп оқуғучилири қатнашти. Умумән 6 яштин 16 яшқичә болған 25 бала иштрак қилди. Уларниң сәнъитини тәркивигә Нур-Султан шәһәрлиқ мәслиһәтниң депутати С.Солодовников, концертмейстр И.Волкова, дөләт академиялик филармонияниң солисти К.Турлыбековалар киргән жюри әзалири баһалиди. Фестиваль йәкүни бойичә биринчи орунни Уйғур этномәдәнийәт мәркизиниң вәкили, «Астана» нахшисини орунлиған Эларис Мусин, иккинчи орунни «Polacy» җәмийәтлик бирләшмисиниң вәкили, «Мой Қазахстан» нахшиси билән Мария Горелова, үчинчи орунни болса, Өзбәк мәдәнийәт мәркизиниң вәкили, «Десятый наш десантный батальон» нахшисини иҗра қилған Амира Пулатова егилиди. Фестиваль ғалиплириға уюштурғучилар намидин Тәшәккүрнамиләр вә баһалиқ соғилар тапшурулди.