• Йеңилиқлар
• 11 Желтоқсан, 2019

Талантлар мукапатланди

Дүшәнбә күни пайтәхттә Қазақстан Җумһурийити Һөкүмитиниң “Дарын” дөләт яшлар мукапитиниң лауреатлирини тәнтәнилик тәғдирләш мәрасими болуп өтти. “Дарын” дөләт яшлар мукапити талантлиқ яшларни үнүмлүк илмий, иҗадий, җәмийәтлик паалийити, шундақла спортта қолға кәлтүргән жуқури муваппәқийәтлири үчүн дөләт тәрипидин қоллап-қувәтләш мәхситидә һәр жили берилиду. Бу қетим лауреатларни Премьер-министрниң орунбасари Бердибек Сапарбаев, әхбарат вә җәмийәтлик разимәнлик, әмгәк вә аһалини иҗтимаий һимайә қилиш министрлири Дәурен Абаев вә Биржан Нурымбетов, Парламент Мәҗлисиниң депутати Нурлан Әлимжанов, көрнәклик мәдәнийәт, журналистика вә сәнъәт әрбаплири мукапатлиди. Мәрасимда бирнәччә қетим тәкитләнгинидәк, “Дарын” мукапитиниң лауреатлири Қазақстан яшлири үчүн үлгә-ибрәт болуп һесаплиниду. Шу нәрсә диққәткә сазавәрки, бийил мукапатлаш мәрасими Яшлар жилиниң йәкүнини чиқиришқа мас келип, Пидаийлар жили һарписида өткүзүлди. “Дарын” мукапити 1992-жили тәсис қилинди. Мошу жиллар мабайнида 29 яшқичә болған 200дин ошуқ адәм униң лауреатлири аталди. Мукапат әдәбият, пән, тәсвирий сәнъәт, журналистика, классикилиқ музыка, җәмийәтлик паалийәт, спорт, театр вә кино, эстрада сәнъити, хәлиқ иҗадийити охшаш 10 номинация бойичә тапшурулиду. Бийил “Җәмийәтлик паалийәт” номинация бойичә мукапат Қазақстан Җумһурийити Этноспорт ассоциациясиниң баш кативи Нурлан Ибрагимов билән “Қазақстан студентлар альянси” җумһурийәтлик студентлар һәрикити” җәмийәтлик бирләшмисиниң президенти Илияс Түстикбаевқа тапшурулди. “Пән” номинациясидә физик алимлар Нурлан Қанат билән Ерасыл Ерланулы ғалип чиқти. “Журналистика” номинациясидә мукапатқа бирқатар һөҗҗәтлик фильмларниң муәллипи Мырзабек Түсипов, журналистлар арисида жүргүзүлгән җумһурийәтлик конкурсларда мукапатлиқ орунға сазавәр болған Айбек Тасқалиев сазавәр болди. “Хәлиқ иҗадийити” номинациясидә айтыс маһири Мейирбек Султанхан билән Ғ.Қурманғалиев намидики вилайәтлик филармонияниң артисти, дирижери Жарас Сатыбалдиев ғалип чиқти. “Эстрада” номинацияси бойичә мукапат “Славян базири-2019” хәлиқара фестивали Баш мукапитиниң саһиби Әдилхан Макин билән “Казақконцерт” дөләт концерт тәшкилатиниң солисти Марат Әйтимбайға тапшурулди. “Классикилиқ музыка” номинацияси бойичә мукапат һәрхил музыкилиқ конкурсларниң лауреатлири, композиторлар Данара Мусахан билән Әзимбек Жамбаевқа берилди. “Әдәбият” номинацияси бойичә мукапатқа шаирә Жадыра Байбуланова билән шаир Бекзат Смағулов сазавәр болди. “Театр вә кино” номинациясидә М.Әвезов намидики Дөләт академиялик драма театриниң актери Аян Өтепберген билән Қ.Қуанышбаев намидики қазақ музыкилиқ драма театриниң актрисиси Алтынгүл Ерболқизи ғалип чиқти. “Спорт” номинацияси бойичә Төрт қитъә чемпионатида күмүч медальға сазавәр болған, муз үстидә фигурилиқ тейилиш бойичә 2019-жилқи қишлиқ Универсиадида иккинчи орунни егилигән Элизабет Турсынбаева билән дуния чемпионатида икки қетим күмүч медальға еришкән, Азия чемпионатида икки қетим иккинчи орунни егилигән, Қазақстан талланма командисиниң капитани Қамшыбек Қоңқабаев мукапатланди. “Дизайн вә тәсвирий сәнъәт” номинациясидә “ЖҮЗБАЙ ДИЗАЙН” ҖЧЙниң мудири, Қазақ мода бирләшмисиниң президенти Айжан Жүзбай билән һәйкәлтараш Мүсиреп Сырым ғалип чиқти.