• Йеңилиқлар
• 15 Қаңтар, 2020

Пидаий болмақ – яхшилиқ қилмақ

Сабирәм ӘНВӘРОВА, «Уйғур авази» 2020-жил – Қазақстанда пидаийлар жили болуп елан қилинди. Йәни, май ейида Қостанай шәһиридә болуп өткән Қазақстан-Россия яшлириниң форумида «Миллий волонтерлар системиси» тәшкилатиниң рәиси Вера Ким 2020-жилни “Пидаийлар жили” дәп аташ тәкливини оттуриға қойған еди. Президентимиз Қасым-Жомарт Тоқаев болса, бу тәклипни қоллайдиғанлиғини йәткүзүп, бийилқи жилни “Пидаийлар жили” дәп елан қилди. «... Пидаийлар – жүриги таза адәмләр. Улар – әлниң һәқиқий вәтәнпәрвәри, шуниң үчүнму уларға һөрмитим чәксиз» дәп тәкитлигән Дөләт рәһбири 2019-жилниң 26-август күни рәсмий түрдә 2020-жилни “Пидаийлар жили дәп аташ тоғрилиқ” Пәрманини имзалиди. Умумән, бүгүнки күндә дуния хәлқиниң 970 миллиони пидаийлар. Дәрвәқә, елимиздә пидаийлиқ билән шуғуллиниватқан, шундақла бу сөзни анчә чүшинип кәтмәйдиған инсанларму йетәрлик. Бир сөз билән ейтқанда, пидаийлиқ – инсанниң өз ихтияри билән һәқсиз ярдәм көрситиши. Хош, немишкиду, пидаийлиқ десә, һәммимиз бирдин яшларни ойлаймиз. Лекин һеч әлдә «пидаийлиқ билән пәқәт яшларла шуғуллиниши керәк» дегән қанун йоқ. Демәк, «җәмийәткә ярдимим тәгсун» дегән һәрқандақ адәм пидаийлиқ билән шуғуллиналайду. Җүмлидин АҚШта 24 яшқичә болған пидаийлар 22,6 пайизни, 25 – 44 яш арилиғидики пидаийлар 26,7 пайизни тәшкил қилса, 45 – 65 яшқичә һәм 65 яштин жуқури болған пидаийларниң сани 51 пайизға йетидекән. Әнди өз елимизгә қайтип келидиған болсақ, биздә чоңлар турмақ, пидаий болғуси келидиған яшларму еғизға толтуруп ейтқидәк көп әмәс. Чүнки «Жастар» илмий-тәтқиқат мәркизиниң 2018-жилдики тәтқиқатлириға асаслансақ, елимиздә 82,6 пайиз яш қазақстанлиқниң пидаийлиқ билән шуғулланмайдиғанлиғи ениқланған. Демәк, мәмликитимиздики һәр бәшинчи яш пидаийлиқ тоғрилиқ тамамән билмәйду дегән сөз. Ваһаләнки, бийилқи жил ушбу бошлуқниң орни толидиғанлиғиға ишәнчимиз камил. Елимиздә 2016-жили 22-декабрьда ”Пидаийлар хизмити тоғрилиқ» Қанун қобул қилинған. Қанун бойичә пидаийларниң хизмити – айрим шәхсләргә, кархана-ширкәтләргә, иҗтимаий топларға ярдәм көрситиш, әтрап муһитни һимайә қилиш, гражданлиқ мәвқәни шәкилләндүрүш, өзини-өзи уюштуруш, иҗтимаий җавапкәрлик, өзара ярдәм көрситиш вә җәмийәттә хәйрихаһлиқ көрситиш дәп атап көрситилгән. Пидаийлиқ – кишиниң өз ихтияри билән җәмийәтлик мәсилиләрниң һәл қилинишиға иқбал қилиши. Шуниңға қаримастин, елимиздә пидаий студентларниң қатарини көпәйтиш үчүн бийил пидаийлиқ билән шуғуллинишини халайдиған студентларниң стипендияси 30 пайизға өсидиған болди. Пидаий болуш үчүн адәмниң йеши, җинси, билими яки маддий әһвали һечқандақ роль ойнимайду. Муһими – нийәт. Чүнки яхшилиқ қилишни нийәт қилған һәрқандақ яштики адәм пидаий сүпитидә елимизниң тәрәққиятиға өз һәссисини қошалайду. Бүгүнки күндә елимизниң җай-җайлирида 200 пидаийлиқ тәшкилат хизмәт қилидекән. Шуларниң бири – «Еріктілер лигасы» җәмийәтлик фонди. 2014-жили қурулған фондниң тәркивидә бүгүн 2860 пидаий бар. Саламәтлик, билим, иҗтимаий саһада, экологиялик йөнилиштә вә өз-өзини риваҗландуруш саһалири бойичә елимиздә он миңдин ошуқ пидаий паалийәт жүргүзүветипту. Дәрһәқиқәт, 2017-жили елимиздики ЭКСПО көргәзмисини уюштуруштиму пидаийларниң тилға алғидәк әмгиги сиңди. Рәқәмләргә мураҗиәт қилсақ, «Астана ЭКСПО – 2017» көргәзмиси билән Қишлиқ Универсиада оюнлирида 8000дин ошуқ яш пидаий хизмәт қипту. Хуш қилидиғини, кейинки жилларда елимизниң һәр тәвәсидә яшанғанларға, житим-йесирларға, турмуш шараити начар аилиләргә, һәрхил апәтләрдин зәрдап чәккәнләргә, умумән, җәмийитимиздики ярдәмгә муһтаҗ инсанларға ярдәм көрситидиған бирләшмиләрниң сани көпийиватиду. Қисқиси, бүгүнки Қазақстандики һәммә пидаийларниң бешини қошидиған «Миллий пидаийлар системиси» моҗут. Шуниң билән биллә пидаийлар жилиға бағлиқ елимиздә «Qazvolunteer.kz» сайти ишқа қошулди. «Qazvolunteer.kz» пидаийлар биртуташ платформисиға бүгүнки күндә 800 пидаий билән 70 тәшкилат тиркилипту. Хошал қилидиғини, өткән Яшлар жилида елимиздә көплигән йеқимлиқ йеңилиқлар йүз бәрди. Хулләс, бийилқи жилдинму күтәр үмүтимиз зор. Пидаийлар жилида елимиздә нурғунлиған иҗабий өзгиришләрниң йүз беридиғанлиғи сөзсиз. Чүнки пидаий болмақ – яхшилиқ қилмақ демәктур. Яшлар жили яшлиримизға көплигән мүмкинчиликләрни яритип бәрди. Әндиликтә, пидаийлар жилини яшлиримиз үчүн дөләтниң ғәмхорлуғиға җавап қайтуридиған пәйт дәп чүшәнсәкму болиду. Қайтурими йоқ яхшилиқ болмайду. Хуласиләп кәлгәндә, пидаий болуш – һәрқайсимизниң қолидин келидиған изгү иштур.