• Һакимлар һесавити
• 22 Қаңтар, 2020

Йәнә шу су, йәр мәсилиси

Сабирәм ӘНВӘРОВА, «Уйғур авази» «Суниңму сориғи бар» демәкчи, жил башлинип, адәттикидәк, бийилму һакимлар хәлиқ алдида һесават беришқа киришти. Уйғур наһийәсидә наһийә һакиминиң һесавити дәсләп Ғалҗат йезисидин башланди. Жиғинға наһийәдин кәлгән вәкилләрдин башқа, Алмута вилайәтлик йеза егилиги башқармиси рәисиниң орунбасари Көйүмчан Өмәров қатнашти. Ғалҗатта, күн тәртивигә мувапиқ, дәсләп йеза һакими Мәрүпҗан Мәмировниң һесавити тиңшалди. У өткән жили атқурулған ишларға қисмән тохтилип, бийилқи жилниң планлири билән тонуштурди. Болупму, 2019-жилниң асасий йеңилиғи – Ғалҗат йезисиға йеңи амбулаторияниң селиниши болса, хәлиқниң әндики асасий мәсилиси – ичимлик су екәнлигини атап өтти. Өз новитидә минбәргә көтирилгән Уйғур наһийәсиниң һакими Шөһрәт Нурахунов 2019-жилниң иҗтимаий-ихтисадий тәрәққият нәтиҗилири вә 2020-жилниң планлири тоғрилиқ доклад оқуди. Инвестицияләр, агросанаәт, йеза егилиги, кичик вә оттура тиҗарәт, қурулуш, мәдәнийәт, билим, туризм, саламәтликни сақлаш қатарлиқ саһаларға айрим-айрим тохтилип, атқурулған ишлар билән камчилиқларни ейтқан наһийә һакими 2020-жилниң йеңилиқлиридинму хәвәрдар қилди. Шөһрәт Турдахуноғлиниң тәкитлишичә, өткән жили наһийәдики инвестицияләр көләми 12 миллиард тәңгини тәшкил қилған болса, бийилқи жили бу көрсәткүчни 25 пайиз өсүм билән 15 миллиард тәңгигә йәткүзүш планлиниветипту. Һакимларниң һесаватидин кейин новәт турғунларға берилди. Көпчиликтин су мәсилиси, Мәдәнийәт өйи вә кона ағриқхана бенасиға мунасивәтлик бирқатар язмичә соаллар келип чүшти. Наһийә һакими Ғалҗат вә Чоң Ақсу йезилириға су иншаәтлирини тартишқа сметилиқ һөҗҗәтлирини экспертизидин өткүзүшкә хираҗәт бөлүнгәнлигини, лайиһә экспертизидин өтүп, мәбләғ бөлүнсә, көп өтмәй ишниң қолға елинидиғанлиғини ейтти. Кона ағриқхана бенасиниң йеза үчүн пайдилинишқа берилидиғанлиғини, әнди уни қайси йөнилиштә пайдилиниш жутниң ихтиярида екәнлигини чүшәндүрди. Ғалҗат йезисиниң жигитбеши Махмут Турдиев амбулаториягә чиш дохтури һаҗәтлигини тәкитлисә, йеза турғуни Туғлуқ Илахунов мәктәп кочисидики транспорт һәрикитини рәтләш тоғрилиқ тәкливини оттуриға қойди. Хуласә сөзгә чиққан Алмута вилайәтлик йеза егилиги башқармиси рәисиниң орунбасари Көйүмчан Өмәров һакимларниң һесавитини қанаәтлинәрлик дәп баһалап, наһийәдә йеза егилиги саһасини техиму риваҗландуруш һаҗәтлигини алаһидә қәйт қилди. *** Ғалҗаттин кейин һесават жиғини Кичик Дехан йезисида давамлашти. Адәттикидәк, Уйғур наһийәлик мәслиһәтниң кативи Нурәким Есжан күн тәртиви билән тонуштурғандин кейин, сөз Кичик Дехан йеза округиниң һакими Ербол Абшаяқовқа берилди. Натиқ атқурулған ишларниң нәтиҗисигә тохталди вә орунланмай қалған ишларниму йошурмиди. Кичик Дехан йезисида Хәлиқ Қәһримани Мөрдүн Тейиповниң туғулғининиң 100 жиллиқ тойи жуқури дәриҗидә атап өтүлүп, мәктәп алдиға бюстиниң орнитилғанлиғини өткән жилниң муһим вақиәси сүпитидә тилға алди. Шуниңдин кейин наһийә һакими Шөһрәт Нурахуновниң һесавити тиңшалди. «Кичик Дехан йеза округидики бүгүнки асасий мәсилә – Чоң Дехан йезисидики ичимлик су мәсилиси болуватиду», дәп ейтқан наһийә һакими бу мәсилиниң көп өтмәй һәл болидиғанлиғиға көпчиликни ишәндүрди. Жут турғунлири намидин сөз алған Мельс Ахметжанов «ФАПниң йенидики бош турған йәрни күндүзки стационар үчүн пайдилансақ» дегән тәкливини оттуриға қойди. Бу соалға наһийә һакими тегишлик җавап бәрди. У ФАПниң қешидики қурулушниң қанун тәләплиригә лайиқ пайдилинишқа ярамсиз екәнлигини чүшәндүрүп, келәчәктә йезиға йеңи амбулатория селинидиғанлиғини вә мәдәнийәт өйини мурәккәп җөндәштин өткүзүш ишлириниң бийил һәл қилинидиғанлиғини тәкитлиди. *** Ават йеза округида болуп өткән жиғиниға Алмута вилайәтлик йәр мунасивәтлири башқармиси рәисиниң орунбасари Бөлтирик Жақыпов иштрак қилди. Ават йеза округиниң һакими Равиль Анадуллаев икки миңдин ошуқ аһалиси бар Ават йеза округиниң турмуш-тирикчилиги вә иҗтимаий-ихтисадий тәрәққияти һәққидә ейтип, 2020-жилниң иш планиға киргүзүлгән мәсилиләрниму тәкитләп өтти. Өткән жили округта 20 йеңи иш орнини ечиш планланған болса, җәми 24 йеңи иш орни ечилип, план 120 пайизға орунлинипту. Шуниңдин кейин наһийә һакими Шөһрәт Нурахунов «2019-жилниң иҗтимаий-ихтисадий тәрәққият нәтиҗилири вә 2020-жилниң планлири тоғрилиқ» доклад қилди. Сүмбә, Ават, Рахат вә Узунтам йезилириниң су иншаәтлирини йеңилашқа сметилиқ һөҗҗәтлирини тәйярлашқа вилайәттин мәбләғ сориливатқанлиғини тәкитлигән наһийә һакими бийилқи жилға планлиниватқан ишларни баян қилди. Андин новәт турғунларниң соаллириға берилди. Йеза ақсақаллар кеңишиниң рәиси Исмайил Ахмоллаев билән жигитбеши Қуддус Мәмәтов һакимларниң һесавитини қанаәтлинәрлик дәп баһалап, ичимлик су вә тосма мәсилисини оттуриға қойди. Жут турғунлири Турғанҗан Турсунов, Муһәббәт Әйсарова, Рысқожа Нақысбеков вә Руфат Ахмоллаев муһим мәсилиләр әтрапида сөз қозғиди. Наһийә һакими ейтилған мәсилиләрни һәл қилишқа бар күчини салидиғанлиғиға ишәндүрди. *** Аваттин кейин һакимларниң һесават бериш жиғини Чоң Ақсу йезисида давамлашти. Күн тәртиви бәкитилгәндин кейин, сөз Чоң Ақсу йеза округиниң һакими Ромэн Суджековқа берилди. Натиқ Чоң Ақсу йеза округиниң 2019-жилдики иҗтимаий-ихтисадий әһвали билән тәрәққият истиқбалиға әтраплиқ тохталди. Дәсләп йеза егилиги саһаси бойичә атқурулған ишларни тилға алған йеза һакими Чоң Ақсу йезисидики су иншаәтлирини йеңилашқа сметилиқ-лайиһиләш һөҗҗәтлириниң тәйярлинип, хираҗәт бөлүш мәсилисиниң қараштурулуватқанлиғини чүшәндүрди. – Көптин бери һәл қилинмай жүргән мәсилә – Чоң Ақсу вә Долата йезилириниң арилиғидики көрүк еди. Бюджеттин 30 миллион 280 миң тәңгә хираҗәт бөлүнүп, бу мәсилә һәл қилинди. «Өңірлерді дамыту» программиси бойичә 10 миллион 278 миң тәңгә бөлүнүп, 114 данә диодлуқ йоруқ қондурғулири орнитилди, – дәп тәкитлигән Ромэн Суджеков өткән жили Чоң Ақсу йезисида 50 орунлуқ амбулатория қурулушиниң қолға елинип, бүгүнки күндә ишниң 30 пайизи орунланғанлиғини қәйт қилди. Андин наһийә һакими Шөһрәт Нурахуновниң һесавити тиңшалди. Өткән жилниң нәтиҗилиригә тохтилип, бийилқи жилниң планлири билән тонуштурған Шөһрәт Турдахуноғли турғунларниң соаллириғиму тәпсилий җавап бәрди. Хәлиқ асасән йәр-су мәсилиси вә йеза округи тәркивидики мәдәнийәт дәргаһлирини мурәккәп җөндәштин өткүзүш тоғрилиқ соалларни қойди. Жут намидин сөзгә чиққан мөтивәрләр Шавдун Сопиев вә Авакри Сидиқов өз ой-пикирлири билән ортақлашқач, һәр икки һакимниң һесавитиға қанаәтлинәрлик баһа бәрди.