• Йеза нәпәси
• 12 Ақпан, 2020

Ичимлик су мәсилиси һәл қилиниду

Алмутиниң әтрапидики Жанатурмыс йезиси Ақсай дәриясиниң бойиға җайлашқан болсиму, униң аһалиси кейинки үч жил ичидә ичимлик су тапчиллиғини баштин кәчүрмәктә. Конириған трубилардики қисимниң төвән болуши аһалини ичимлик су билән турақлиқ тәминләшкә мүмкинчилик бәрмәйватиду. Су күнигә бир нәччә саатла берилиду, униң көләми адәмләрниң еһтияҗини қанаәтләндүрүшкә йәтмәйду. Йеқинда Алмута вилайитиниң һакими Амандық Баталовниң қатнишиши билән Қарасай наһийәси һакиминиң аһали билән өткән һесават учришишида мәзкүр мәсилә көтирилди. Йеза аһалиси вәкиллиридин тәркип тапқан тәшәббускар топ, пурсәтни пайдилинип, регион рәһбәрлигигә су тапчиллиғи һәққидә шикайәт қилди. Амандық Баталов наһийә вә вилайәтлик турушлуқ өй-коммунал егилиги мутәхәссислириниң һесавитини тиңшап, узундин бери һәл қилинмиған бу мәсилини һәл қилишниң оператив һәм қолайлиқ вариантини тепишни тапшурди. Һаким тегишлик хизмәтләргә февраль ейиниң ахириғичә вақит бәрди. Андин қобул қилинған қарар һәққидә аһалини хәвәрдар қилиш, шундақла дәрһал һаҗәт һөҗҗәтләрни тәйярлашқа киришиш тапшуруғини бәрди. Жаңатурмыста 5,5 миң адәм яшайду, – дәп тәкитлиди вилайәт һакими. — Йезини ичимлик су билән тәминләш мәсилисини шәхсий назаритим астиға алимән. Һаҗәт болса, вилайәт бюджетидин қошумчә мәбләғ бөлүниду. Һакимниң һесават учришишида аһалини хошал қилидиған бир йеңилиқ ейтилди. Үстимиздики жилниң март ейида топлуқ су проводиниң биринчи қисми ишқа қошулиду. 58 миң адәм яшайдиған Қарасай наһийәсиниң мәркизи – Хәшкиләң шәһириниң аһалиси ичимлик су билән толуқ тәминлиниду. Йеқинқи төрт жил ичидә вилайәт бюджетидин 9,4 миллиард тәңгә аҗритилип, 24 аһалилиқ пункт мәркизий су билән тәминләш системисиға қошулиду.