• Йеңилиқлар
• 12 Ақпан, 2020

Йеңи вице-премьер тайинланди

Қазақстан Җумһурийитиниң Президенти Қасым-Жомарт Тоқаевниң Пәрмани билән буниңғичә Қазақстан Кәспий иттипақлар федерациясиниң рәиси болуп ишлигән Ералы Тоғжанов Қазақстан Премьер-министриниң орунбасари болуп тайинланди. Ералы Луқпаноғли Тоғжанов 1963-жили 13-майда Ғәрбий Қазақстан вилайитиниң Шағатай йезисида туғулди. Мутәхәссислиги – юрист. Қарағанда дөләт университетини, андин кейин 1994-жили Қазақстан Пәнләр академиясиниң Дөләт вә һоқуқ институтини тамамлиди. Әдлийә пәнлириниң намзити, сәясәтшунаслиқ пәнлириниң доктори. Әмгәк паалийитини 1980-жили Ғәрбий Қазақстан вилайити Октябрь орман егилигиниң ишчиси болуп башлиди. Һәрхил жилларда тарих вә һоқуқ пәнлиридин дәрис бәрди. 1999–2000-жилларда Қазақ дөләт әдлийә университети хәлиқара һоқуқ факультетиниң декани, шөбә мудири вә 2000-2001-жилларда Қазақ дөләт әдлийә университети һоқуқ вә дөләт хизмити институтиниң мудири болди. 2001–2006-жилларда Қарағанда вилайити һакиминиң орунбасари лавазимини егилиди. Униңдин кейин икки жил Қазақстан Җумһурийити Әдлийә министрлиги Дин ишлири комитетини башқурди. 2008–2017-жиллар арилиғида Қазақстан хәлқи Ассамблеяси Рәисиниң орунбасари – Кативат мудири лавазимида ишлиди. 2017–2019-жилларда Маңғыстав вилайитиниң һакими болди. 2019-жили сентябрьдә Қазақстан Кәспий иттипақлар федерациясиниң рәиси болуп тайинланди. Иккинчи дәриҗилик “Достық” ордени, “Қазақстан Республикасының тәуелсіздігіне 10 жил” вә “Ерен еңбегі үшін” медальлири охшаш пәхрий мукапатларниң саһиби. Өйләнгән, төрт балиси бар.