• Йеңилиқлар
• 12 Ақпан, 2020

«Тунҗа Президент йоли билән» хәлиқ экспедицияси Чемолғандин башланди

Мәшүр САСИҚОВ, «Уйғур авази» Өткән җүмә күни Алмута шәһиридики «Достлуқ өйи» йениға жиғилған адәмләрниң кәйпияти үстүн. Чүнки улар Қазақстан Җумһурийитиниң ихтисадий-иҗтимаий тәрәққиятиға бебаһа төһпә қошқан шәхс — Тунҗа Президент – Елбасы Нурсултан Назарбаевниң туғулуп өскән жути Қарасай наһийәсиниң Чемолған йезисида өтидиған «Тунҗа Президент йоли билән» хәлиқ экспедициясиниң тәнтәнилик ечилиш мәрасимиға атланмақчи. «Йолувчиларниң» арисида җәмийәт әрбаплирини, алий билим дәргаһлириниң ректорилирини, илим-пән адәмлирини, Қазақстан хәлқи Ассамблеясиниң әзалири билән этномәдәнийәт мәркәзлириниң рәислирини вә яшларни учритишқа болатти. Улар дәсләп «Үш қоңыр» спорт комплексиға қәдәм тәшрип қилди. Заманивий үлгидә селинған ушбу спорт комплексида бу күни һәқиқәтәнму мәйрәмлик кәйпият һөкүм сүрмәктә еди. Һәрхил милләт вәкиллири өзлириниң миллий кийимлирини кийип жүрүши, дөләт тилида жараңлиған йеқимлиқ музыка билән елимизниң көк байриғини йәлпүлдитип турған яшларниң көплиги һәқиқәтәнму бүгүн бу йәрдә чоң тәнтәниниң өтидиғанлиғидин далаләт бәрәтти. Аз өтмәй буниңға һәммимиз толуқ көз йәткүздуқ. Умумий миллий лайиһәниң ечилиш тәнтәниси спорт маһири Саламат Наурызбаев, «Жас көсбасшы – 2019» мусабиқисиниң ғалиби Владимир Чепель, ҚХА әзаси Дамир Дигай вилайәтлик Чечән-Ингуш этномәдәнийәт мәркизиниң рәиси Адам Бойсаевниң экспедицияниң туғи билән күндилигини дағдуғилиқ рәвиштә оттуриға елип чиқиши билән башланди. Андин риясәтчиләр мәзкүр «Тунҗа Президент йоли билән» дәп аталған хәлиқ экспедициясиниң асасий мәхситигә қисқичә тохтилип, новәтни Йәттисуда даңқи чиққан Сүйинбай намидики вилайәтлик филармонияниң, «Талдықорған әуендері» вә «Үшқоңыр» ансамблириниң әзалириға бәрди. Көпчилик чоң экранда көрситиливатқан бепаян қазақ даласиниң өтмүш тарихидин сир чекидиған тарихий вақиәләр билән гөзәл тәбиәт мәнзирилирини тамашә қилғач, сәнъәткарларниң иҗрасидики нәғмә-навалиридин бәһирләнгәндин кейин мәрасимниң рәсмий қисми башланди. Униңда дәсләп сөзгә чиққан вилайәт һакими Амандық Баталов көпчиликни ушбу чарә-тәдбирниң башлиниши билән сәмимий тәбрикләп мундақ деди: – Ассамблеяниң 25 жиллиғи даирисидә өткүзүлүватқан бу экспедицияниң әһмийити шуниңдин ибарәтки, униң Елбасы Нурсултан Назарбаевниң туғулуп өскән жутида, йәни Йәттису тәвәсидә башлиниватқанлиғи билән махтинимиз, десәм хаталашмаймән. Тунҗа Президентниң тәшәббуси билән бәрпа болған Қазақстан хәлқи Ассамблеясиниң һазир аброй-инавити жуқури, җәмийәттики бирликниң сақлаштики ролиму алаһидә екәнлигигә һечким көз жумалмиса керәк. Шуңлашқа Президентимизниң өмүр йоли, мустәққиллигимизни қолға кәлтүрүп, уни техиму мустәһкәмләш йолидики қәдәмлири, стратегиялиқ программилири — һәммиси течлиқпәрвәрлик билән разимәнлик сәяситиниң нәтиҗисидур. Әнди экспедицияниң яшларға беридиғини мол дәйдекәнмиз, Тунҗа Президентимизниң һаят паалийити, қийинчилиқлар билән қизиқарлиқ вақиәләргә толуп ташқан тәрҗимиһали – Вәтәнгә, әл-жутиға хизмәт қилишниң үлгиси болуп һесаплиниду. Дунияда тәңдиши йоқ ҚХА Тунҗа Президентимизниң келәчәкни пәмләшни билидиған сәясәтчи екәнлигини йәнә бир қетим испатлайду. Бүгүнки күндә дунияда ҚХАниң «Бирлик», «Течлиқпәрвәрлик» вә «Разимәнлик» чүшәнчилири арқилиқ қобул қилинидиғанлиғи әйнә шуниң нәтиҗисидур. Мәрасим давамида сөзгә чиққан ҚХА Рәисиниң орунбасари Жансеит Түймебаев мундақ деди: – Тунҗа Президентниң тутқан йолини көпчиликкә, болупму яш әвлат вәкиллиригә йәткүзүш интайин муһим. Чүнки Елбасыниң йоли – Қазақстанниң мустәққилиги билән зич мунасивәтлик. Елимизниң қол йәткүзгән һәрқандақ утуғида Елбасыниң қол тамғиси бар. Ишәшлик ейтишқа болидуки, униң рәһбәрлигидә Қазақстан тәрәққий әткән әлләр қатариға кирди. Мән ейтқан болар едимки, җумһурийәт хәлқи дәл мошундақ дана лидер, сәясәтчи вә елимизни әң қийин ихтисадий боһранлардин елип чиқишқа муйәссәр болалиған шәхс башқурған әлдә яшаватқанлиғи билән пәхирлиниду. Шундақла ҚХА Рәисиниң орунбасари ушбу кәң даирилик экспедиция тоғрилиқ ейтип келип, униңға пүткүл Қазақстан хәлқи биркишилик һәссисини қошуши керәклиги вә ҚХА Рәиси Н.Назарбаевниң җәмийәтлик разимәнлик, милләтләрара достлуқниң Қазақстанлиқ үлгисини техиму риваҗландуруш бойичә тәшвиқат-тәрғибат, илмий, мәдәний чарә-тәдбирләрниң әмәлгә ашурулидиғанлиғини қәйт қилди. «Тунҗа Президент йоли билән» хәлиқ экспедицияси асасән үч йөнилиштин ибарәт. Биринчиси – бу асасий йөнилиш болуп, бүгүн өзәңләр гувачи болуватқандәк, у Елбасы дунияға кәлгән, әр йәткән Чемолған йезисида өтүватиду. Шуңлашқа униң ечилиш мәрасими дәл мошу жутта башлинишиму тәсәдипи әмәс. Иккинчи йөнилиш – җумһурийәт даирисидә өтүши. Шуниң ичидә Президент әмгәк йолини башлиған, яшлиқ чағлири өткән, җәмийәт әрбаби сүпитидә йетилгән Қарағанда, Темиртау шәһәрлиридә давамлишиду. Шуниңдин кейин елимизниң җай-җайлирини арилап чиқиду. Үчинчиси – хәлиқара йөнилиш. Экспедиция Елбасы билим алған Украинаниң илгәрки Днепродзержинск, һазирқи Каменское шәһиригә атлиниду. Андин Тунҗа Президентимиз мустәқил елимизниң тәрәққият йолида музакириләр жүргүзгән, башқиму дөләтләр рәһбәрлири иштирак қилған кеңәшмиләргә қатнишип, муһим мәсилиләр бойичә сөз сөзлигән әлләрдә давамлишидиған болиду. Бу чарә-тәдбирләр давамида Елбасы тоғрилиқ мәлуматлар билән қизиқарлиқ әслимиләр топлиниду. Әнди мошу жилниң июль ейида болса, Нур-Султан шәһиридә экспедиция йәкүни чиқирилип, хәлиқара әнҗуман өткүзүлиду. Униң ахирида экспедицияниң күндилиги билән барлиқ жиғилған материллар Елбасыға тонуштурилиду. Мәрасим давамида елимиздики милләтләр билән еләтләр арисидики достлуқниң сақлинишиға түрткә болған Тунҗа Президент – Елбасы тоғрилиқ иллиқ пикир ейтқанлар көп болди. Мәсилән, ҚХА әзаси, йетәкчи журналистлар билән экспертлар клубиниң рәиси, «Огни Алатау» гезитиниң баш муһәррири Атсалим Идигов, ҚХА әзалири Наталья Хоменко вә Роза Абилова шулар җүмлисидиндур. Экспедиция программиси бойичә бирқатар алий оқуш орунлириниң ректорлири, этномәдәнийәт мәркәзлириниң рәислири вә әхбарат васитилириниң вәкиллири Чемолған, Хәшкиләң, Жандосов вә Шалқар йезилиридики мәктәпләрдә «Бирлик вә разимәнлик» мавзулирида дәрис өтти. Андин экспедиция әзалири тәвәдики Қазақстан Җумһурийити Тунҗа Президентиниң «Атамекен» тарихий-мәдәний мәркизидә болуп, у йәрдә Жансеит Түймебаев мәркәзгә Елбасы тоғрилиқ китапни соға қилди. Меһманлар Қарасай наһийәсидики «Анаға құрмет» мирасгаһи билән «Батыр бабалар» мемориалини зиярәт қилди. Шундақла ҚХА әзалири тәвәдики бирқатар мәктәпләрдә болуп, хәлиқләр достлуғи һәм миллий разимәнлик мавзулирида докладлар оқуди. Ахирида экспедицияниң туғи билән күндилигини Амандық Баталов билән Жансеит Түймебаев Қарағанда вилайитидин кәлгән вәкилләргә тәнтәнилик рәвиштә тапшурди. Демәк, әнди новәттики мундақ экспедиция шу вилайәттә өтиду.