• Мөтивәрләр
  • 27 Ақпан, 2020

У дайим жут ғемидә

Яркәнт шәһириниң турғуни Әхмәт Исламовни пат-патла наһийәдә өтүватқан чарә-тәдбирләрдә учритип қалимән. Уни әву бир жили Яркәнт шәһиридики “Дөңмәлидә” өткән “Седә мәйримидә” учратқан едим. Яркәнт шәһириниң бәрпа болуши биләнла олтарғузулуп, та мошу күнгичә көкләп турған седиләрниң тарихидин учур бәргән чарә-тәдбир у жиллири һәммизни бир тәвритип қойған еди. Шу пәйттә Әхмәт ака мошу “Дөңмәлиниң” жигитбеши еди. Гөһәрбүви ИСМАЙИЛҖАНОВА, «Уйғур авази» Аридин он жилдәк вақит өтсиму, та һазирғичә у илгәркидәкла жут ғемида пайпетәк болуп жүриду. Жигитбеши хизмитини узун жиллар Яркәнт гуманитарлиқ техникилиқ колледжда устазлиқ қилип, һөрмәтлик дәм елишқа чиққан Яқупҗан Абдуқадировқа өткүзүп бәрсиму, “мән һерип қалдим” демәстин, өзи охшаш мөтивәрләрниң бешини қошуп, жигитбешиға қол-қанат, мәсләкдаш болуп келиватиду. Йеқинда мәзкүр мәһәллиниң жигитбеши Яқупҗан ака Улуқ Ғалибийәтниң 75 жиллиғи һарписида ветеранлар, арқа сәптә җасарәтлик әмгәк қилған жутдашларниң өйлиригә кирип, һалидин хәвәр еливатқанлиғини, мәйрәм һарписида «Ғалибийәткә һәссә қошқан бизниң җасур атилиримиз билән анилиримиз» намлиқ альбомға әхбарат топлаватқанлиғини ейтти. – Мәһәллимиздики ибрәтлик аилә егиси Әхмәт Турсуноғли бу күнләрдә 80 яшлиқ тәвәллудини қарши еливатса, рәпиқиси Турсунай һәдимиз билән аилә қурғиниға 50 жил толди. Аилидики хошаллиқ бу жутдашларниңму хошаллиғи. Чүнки Әхмәт Исламов наһийәниң иҗтимаий, ихтисадий саһасиға тегишлик һәссисини қошқан сабиқ қурулуш инженери һәм миллий мәдәнийитимизниң җанкөйәри сүпитидә елип барған вә бериватқан изгү ишлири аз әмәс. Аилидә тәрбийилиниватқан пәрзәнтләрму ата-ана избасарлири. Тәкитләш керәкки, наһийәлик Уйғур этномәдәнийәт мәркизи тәшкил қилинған пәйттин башлап, та мошу күнгичә у җәмийәтлик ишлардин қол үзмәй келиватиду, – деди Яқупҗан ака. Сөһбәтдишим өзи беваситә арилашқан, рәһбәрлик қилған қурулуш саһасиға алаһидә тохталди. – Шәһәрдики С.Киров (һазирқи Хелил Һәмраев) намидики мәктәпни тамамлап, Шәмәй шәһиридики қурулуш техникумиға оқушқа чүштүм. Үч жил давамида қурулуш саһаси бойичә шу дәвирниң йетүк мутәхәссислиридин нәзәрийәвий билим алдим. Мениң замандашлирим яхши билидуки, у жиллири “Межколхозстрой” дәп атилидиған Панфилов колхозларара қурулуш мәһкимиси болидиған. Дәсләпки әмгәк паалийитимни шу мәһкимидин башлидим, – деди мөтивәр шу жилларни әсләп. Тәләпчан, тиришчан мутәхәссисни наһийә рәһбәрлири байқап, билимини йәниму мукәммәлләштүрүш үчүн Новосибирск шәһиридики қурулуш институтиниң йенидики курсқа мәхсус йолланма билән әвәтиду. Әхмәт Исламов кейин наһийәлик йеза егилиги башқармисида өз мутәхәссислиги бойичә баш инженер болуп ишлиди. Әмгәк паалийитиниң ахирқи жиллири болса, Алмута вилайәтлик мемарчилиқ-шәһәр қурулуши башқармисида чоң инспектор, кейинирәк “ЖАГУ” туристлиқ ширкитидә иҗраий мудир болуп ишләп, һөрмәтлик дәм елишқа чиқти. Бир сөз билән ейтқанда, у қәйәрдә ишлимисун, адил әмгәк қилип, биркишилик борчини шәрәплик ада қилди. Һөрмәтлик дәм елишқа чиққан билән у жутдарчилиқ ишларда чәттә қарап турмиди. Наһийәдә Уйғур мәдәнийәт мәркизи тәшкил қилинған дәсләпки күнләрдинла у жигитбашлириниң, ақсақаллар кеңәшлириниң паалийитигә йеқиндин арилашти. Җүмлидин наһийәлик Уйғур мәдәнийәт мәркизи йенидики Ақсақаллар кеңишиниң рәиси сүпитидә һәм он жилдин ошуқ вақит биз жуқурида тәкитлигән “Дөңмәлиниң” жигитбеши сүпитидә ишлиди. Әхмәт акиниң қурулуш саһасидики әмгиги мунасип баһаланди. Наһийә, вилайәт рәһбәрлириниң пәхрий ярлиқлири, диплом, медальлири билән мукапатланди. – Мукапатларниң ичидә һәммидин әтивалиғи ҖУЭМ тәсис қилған «Сахавәт» медали. Чүнки жутум, хәлқим мениң еқидәмни жуқури баһалиди, – дәйду мәмнун болған һалда Әхмәт Исламов. Панфилов наһийәси.

14 рет

көрсетілді

0

пікір
Алдыңғы мақала Ана тилиги

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы