• Тәнтәнә
• 05 Наурыз, 2020

Миннәтдарлиқ мәйрими нишанланди

Рашидәм МИРЗӘХМӘТОВА, «Уйғур авази» Йеқинда Талғир шәһиридики Агробизнес вә менеджмент колледжиниң мәҗлисләр залида Миннәтдарлиқ күнигә беғишланған мәйрәмлик чарә-тәдбир болуп өтти. Униңға Қазақстан хәлқи Ассамблеясиниң әзалири, этномәдәнийәт мәркәзлириниң вәкиллири, студент-яшлар, җәмийәтлик ишларниң активистлири вә башқа меһманлар қатнашти. Тәнтәнини киришмә сөз билән ачқан Талғир наһийәсиниң һакими Жолан Омаров көпчиликни Миннәтдарлиқ күни билән сәмимий тәбриклиди вә мустәқил елимиздики турақлиқ билән паравәнликни қолға кәлтүрүштә хәлиқләр достлуғи билән милләтләрара разимәнликниң зор әһмийәткә егә екәнлигини алаһидә тәкитлиди. Шуниңдин кейин минбәргә көтирилгән Қазақстан хәлқи Ассамблеясиниң әзалири — җумһурийәтлик «Ахыска» түрк этномәдәнийәт мәркизи Алмута шәһәрлик шөбиси рәисиниң орунбасари Қазақбай Қасымов, «Элефтерия» грек җәмийәтлик бирләшмисиниң рәиси Георгий Иорданиди, җумһурийәтлик Уйғур этномәдәнийәт мәркизи рәисиниң орунбасари, җумһурийәтлик җәмийәтлик-сәясий «Уйғур авази» гезитиниң баш муһәррири Ершат Әсмәтов вә башқилар Қазақстан диярида бир аилиниң пәрзәнтлиридәк иҗил-инақ яшаватқан барлиқ милләтләр билән еләтләрниң тилини, мәдәнийитини вә урпи-адәтлирини сақлап, риваҗландурушиға кәң мүмкинчилик яритиватқанлиғини қәйт қилип, Қазақ елигә чәксиз миннәтдарлиғини билдүрди. Һәммимизгә мәлумки, бийил мәмликитимиздә көплигән муһим сәнәләр атап өтүлмәкчи. Қазақстан хәлқи Ассамблеясиниң 25 жиллиғи шулар җүмлисидиндур. Әйнә шуниңға мунасивәтлик Талғир шәһиридики истираһәт беғида мәхсус Аллея бәрпа қилинмақчи. Әйнә шуниңға тәвәдики әзәлдинла паалийәтчанлиғи билән тонулған Талғир наһийәлик Уйғур этномәдәнийәт мәркизи биринчиләрдин болуп үн қетип, униңға 50 данә арча көчитини тапшуридиған болди. Жолан Ыбырайақыноғли мәркәз рәиси Иминҗан Тохтахунов арқилиқ тәвәдики уйғур җамаәтчилигигә, җүмлидин барлиқ җәмийәтлик ишларниң активистлириға чәксиз алқишини изһар қилди. Тәнтәниниң ахири һәрхил милләт вәкиллиридин тәркип тапқан иҗадий коллективларниң қатнишишидики концертлиқ программиға улашти.